影片
更多
2011-10-08
481 瀏覽
因為每年都會訂購萬豪金咭，所以我哋兩公婆，得閒就會去萬豪開飯。萬豪金咭每年嘅費用好似係$2,680，有18次優惠，每次在萬豪進餐，都可享有一位免費優惠，換句話說，二人進餐，所有食物 (不包括飲品及加一)，均以半價計算，如三位進餐，則以66.67%計算，如四位進餐，則以75%計算，如此類推，所以兩人食用，就最優惠；不論是中菜還是buffet，都係一樣計算，例如$550一位buffet，冇咭的話，埋單需要$1,100，再加一，即$1,210，如果有咭，半價後，只需$550，再加一 (加一需要計原價) $110，即$660，平均每位只需$330，非常抵；而且優惠適用於所有萬豪嘅餐廳，包括機場嘅天際萬豪酒店，至於海外萬豪，我就唔肯定；除此之外，每張咭仲附送一本coupon，入面仲有好多優惠，例如lunch buffet或afternoon tea buffet嘅買一送一優惠 (又係半價)，四至十位於中菜廳或魚吧嘅半價優惠，30% wine discount，生日蛋糕coupon等等，當然仲有d住房優惠；最好嘅地方，就係可轉讓使用，即係一張咭，可以俾唔同人使用，唔需要跟人名，所以$2,680嘅價
萬豪金咭每年嘅費用好似係$2,680，有18次優惠，每次在萬豪進餐，都可享有一位免費優惠，換句話說，二人進餐，所有食物 (不包括飲品及加一)，均以半價計算，如三位進餐，則以66.67%計算，如四位進餐，則以75%計算，如此類推，所以兩人食用，就最優惠；不論是中菜還是buffet，都係一樣計算，例如$550一位buffet，冇咭的話，埋單需要$1,100，再加一，即$1,210，如果有咭，半價後，只需$550，再加一 (加一需要計原價) $110，即$660，平均每位只需$330，非常抵；而且優惠適用於所有萬豪嘅餐廳，包括機場嘅天際萬豪酒店，至於海外萬豪，我就唔肯定；除此之外，每張咭仲附送一本coupon，入面仲有好多優惠，例如lunch buffet或afternoon tea buffet嘅買一送一優惠 (又係半價)，四至十位於中菜廳或魚吧嘅半價優惠，30% wine discount，生日蛋糕coupon等等，當然仲有d住房優惠；最好嘅地方，就係可轉讓使用，即係一張咭，可以俾唔同人使用，唔需要跟人名，所以$2,680嘅價錢，可以俾一家人用或與幾個同事夾份，係非常超值。
今日比較得閒，所以就同老婆和媽咪一齊過海食飯。
茶，點了香片，一般酒店嘅中菜廳，都會有嗰蠟燭座，暖著壺茶，萬豪亦都冇例外，茶色呈甘綠色，清澈見底，清香撲鼻，呷一口，茶香滿溢，嚥下後，仍有餘香，靚茶，$15一位茶錢，不便宜，但水滾茶靚係事實。
未點菜，服務員已奉上一碟大豆芽和合桃，大豆芽嘅賣相唔掂，好似預早已經擺好出來，準備隨時攞出來食用，望落唔新鮮，冇人敢食；至於碟合桃，係老婆至愛，味香濃，偏甜，雖然質地比較實，但有咬感，唔使五分鐘，已經俾我們三人瓜分了。
九月、十月，當然係食大閘蟹嘅時間，所以今日有嗰”蟹宴”嘅餐牌，唔係一圍圍嘅蟹宴，只不過係以大閘蟹或蟹粉為主嘅菜式；大閘蟹$380一隻，就算折咗，都要$250一隻 (三個人，66.67%)，而且處理大閘蟹亦沒什麼難度，只要蟹靚，就好食，所以大閘蟹並不在今晚考慮之列。
點咗個蟹粉扒豆苗$280，仲想要個蟹粉炒星斑球$460，但係服務員非常細心，既然已經叫咗個蟹粉扒豆苗，佢建議我哋轉叫豉油皇煎星斑球$330，原本我哋都有d猶疑，蟹粉炒星斑球已經有d過份，怕會糟蹋咗d新鮮斑球，豉油皇豈不是更暴殄天物，不過我哋見嗰服務員咁有誠意推介，我哋亦不妨一試。有魚有菜，我哋再點咗半隻南乳吊燒雞$200，跟著就點湯，老婆同媽咪原本諗著叫原盅花膠嚮螺燉老雞$150，但係已經沽清，所以就轉咗肘子花膠燉菜膽$130，而我則點了嗰紅燒生拆蟹肉翅$370；最後，緊係要加嗰葡汁焗釀嚮螺$120，媽咪就要嗰蛋白蒸蟹拑$120，老婆就要嗰蟹粉焗釀蟹蓋$220，嘩，多咗d蟹粉，就要多$100，抵唔抵，就見仁見智啦。
因為焗釀需時，所以先上湯；嗰肘子花膠燉菜膽，湯底非常清甜，半滴油都冇；花膠一件過，厚而腍，彈牙，唔太膠；肘子略鹹，但適合放湯調味；白菜則冇什味道，燉完湯嘅菜，通常都唔好食；至於嗰紅燒生拆蟹肉翅，蟹肉的確係生拆，但湯底略杰，翅係散翅，細針，都唔可以話針，講得難聽d，應該話鼻毛先真，真係非常”幼細”，其實萬豪d翅，都試過幾款，真係麻麻哋，但成日都心思思想食，真係要記緊，以後唔好再係萬豪食翅！
我嘅至愛之一，葡汁焗釀嚮螺，size唔大，但非常香口，表面焗得脆脆，內裡係嚮螺肉粒，混和肉碎和洋蔥粒等等，因混有葡汁焗製，味道非常香濃，大廚並非把所有食材剁碎，反而係刻意把部份食材，如嚮螺肉，切粒，加強嚼頭；印象中，只有港島香格里拉嘅夏宮及萬豪嘅焗釀嚮螺，係值得推薦；只可惜近年，唔明點解要用些藍色嘅鹽墊底，但此舉反而令到我們食得唔暢快，記得以前係用一塊餐巾，摺成一個兜狀，隻嚮螺就安然地放係中間，塊餐巾唔單止可以兜著隻嚮螺，仲肩負起隔熱嘅作用，因為隻嚮螺焗完出來，嗰殼仲有d熱，塊餐巾就可以讓我們輕易地扶著隻嚮螺，否則，就好難穩妥地搯入面d餡來食。
至於嗰隻比普通焗蟹蓋貴$100嘅蟹粉焗釀蟹蓋，一揣出來，未上枱，嗰服務員已經自動自覺地跟我們說，需要再做過，因為實在太燶了，嗰蟹蓋表面雖然未至於黑色，但係我哋就望到係深啡色，哈哈；再等十幾分鐘，終於見番隻焗蟹蓋啦，今次嗰造型就好得多，表面呈金黃色，亦都係脆脆咁，幾好；入面當然有蟹肉和蟹粉，仲有d洋蔥絲，今次係切絲，唔係切粒，相信係由於蟹肉呈絲狀，並非粒狀，所以大廚故意將洋蔥切絲，而非切粒，都頗細心；相信由於有蟹粉嘅關係，入面係呈啡色，而非白色；咬感跟平時食開嘅蟹蓋差不多，味道則多咗一份蟹粉嘅香味，比平時濃，但講真，蟹粉嘅味道比預期中差，有蟹粉香味，但唔夠濃，若有所失；整體上來說，我覺得平時嘅焗蟹蓋比蟹粉焗更勝一籌，一來，觀感上白色嘅內餡比較吸引，予人一種新鮮嘅感覺，二來，蟹粉嘅味道蓋過蟹肉嘅鮮味，浪費了新鮮蟹肉嘅精髓。
至於蛋白蒸蟹拑，今日亦失準，一看蛋白表面已經不合格，好似月球表面咁，凹凹凸凸，唔夠皮光肉滑，隻蟹拑都算大隻，但係賣相就唔掂，成隻散哂咁，自己人食飯都蠻可以，如果要請客，就貽笑大方；雖然賣相失分，但味道就保持一貫水準，蛋白嘅表面唔靚，但內裡依然香滑，蟹拑亦新鮮，彈牙，唔錯。
頭盤過後，輪到主食，蟹粉扒豆苗，一望已知大廚絕對唔吝嗇，蟹粉幾乎鋪滿成碟豆苗，非常吸引，可惜食了第一口，大失所望，與蟹粉焗釀蟹蓋嘅情況一樣，蟹粉唔夠香！論炒功，的確唔錯，豆苗並冇炒得過火，爽脆，剛剛好，只可惜蟹粉質素比較差，應該改善一吓。
跟著係豉油皇煎星斑球，並冇任何裝飾，一隻白色嘅大圓碟，上面好工整地擺咗八塊金黃色嘅斑塊，望落比較乾身，夾了一塊，已經聞到一陣非常濃郁嘅豉油味，好香，一啖咬下去，並唔鹹，豉油嘅質素唔錯，夠香味但唔太鹹，難得，魚肉質地亦唔差，一來夠厚身，二來夠彈牙，就算咬咗一口，剩餘嗰半塊都唔會散開，而且外面雖然乾身，但頗脆口，內裡嘅魚味依然可以保存，肉質亦算嫩滑，的確係一個唔錯嘅食法，值得欣賞。
最後係南乳吊燒雞，一貫嘅做法，一貫嘅味道，未食，已經有一陣濃烈嘅南乳味，如果喜歡更濃味，可以醮多些南乳醬，皮，夠簿夠脆，亦冇多餘嘅脂肪，肉亦嫩滑，印象中，都未見失手。
甜品，點了椰汁燉官燕，再加一碟麻蓉煎堆仔，煎堆仔一碟三個，剛好一人一個，皮唔算簿，反而覺得厚得有道理，一來有嚼頭，二來唔會太多麻蓉，太甜，但係三個則大細不一，有點影響賣相。
椰汁燉官燕，份量合理，但唔夠滑，味道亦略淡，福臨門比萬豪做得出色。
埋單原價$2,490，三位免一位，即$1,660，再加一，$1,660 + $249 = $1,909，折實每人平均$636。張貼
