3鬚料理

營業中

休息中

OpenRice見到尖沙咀有呢間主題特別，環境舒服嘅餐廳，即刻book位同朋友去試試。一入到去就有老闆同店員嘅熱情招待同介紹佢哋嘅招牌菜。我留意到佢哋有個義賣區係做善事嘅卡位坐得非常舒服。餐廳以墨魚、魷魚、章魚為主題，菜式都完全反映到個主題，好有新鮮感。我哋叫咗個有唔同壽司同魚生嘅「3鬚名物卷」，賣相非常靚，而且食落都可以媲美出面中高檔嘅日本菜。另一道主菜櫻花蝦蝦子XO醬鮮蝦意大利粉同樣好有質素。好少見一道菜可以用咁多唔同形態嘅蝦煮埋一齊，鮮蝦肉質不錯，蝦子同XO醬嘅海鮮香都好夾個意粉，仲要係我最中意煮得al dente嘅扁意粉。呢度菜十分推薦。小食唐揚魷魚鬚都炸得幾香口，而且以$58嚟講份量都唔少。最後甜品「不是章魚丸」我覺得就比較遜色，佢只係用類似芝麻湯圓取代平時嘅章魚小丸子，但啲沙律醬同紫菜同木魚絲同原菜式一模一樣，我就覺得食返正常嘅章魚小丸子好食啲。不過整體而言，雖然人均消費接近$300，但食物質素對得住個價錢，菜式有創意分加，而且服務非常親切、坐得舒服，絕對值得推薦。