香江花月 (百誠大廈)

營業中

休息中

同朋友嚟呢度食晏，所以冇食佢哋招牌嘅火鍋，冇得評價。中午最忙嘅時分，一點到兩點，人都唔算多，可能係星期三，星期五可能會比較迫，我哋嗰日全場得五六張枱，基本上好清閑，所以真係享盡環境優勢，佢哋嘅佈置好特別，有懷舊嘅收銀機、雀籠、電話、人力車，連去廁所嘅時候，經過走廊兩旁都係一啲舊時嘅報紙，相當得意，廁所都好特別，用返懷舊嘅階磚同埋舊時嘅水龍頭。另外仲有一個特別嘅舞台佈置係人力車、舊郵筒同大牌檔枱凳，門口隔離有另外一個好得意嘅螢光大波波房間，專門俾人打卡，我哋都影咗好多相，所以覺得呢度主要都係食環境。食物嚟講普普通通，價錢偏貴，我哋四個人每人平均都要百五蚊，都係唔算好飽，點心造型幾特色，其中一個外型係荔枝，上面仲有小小嘅綠葉，幾靚幾吸引，原來係煎堆，另外上湯鮮竹卷、春卷同义燒味道－般，送甜品係桂花糕，普通啦，我覺得太甜啦。聴講點後有下午茶時間，茶錢同點心都有折。呢度好啱帶老人家嚟懷舊，或者同外國來的朋友嚟享受老香港情懷，應該幾受落。