陳儀興尚潮樓 (太子道西)

十幾年前喺山林道 “潮州名廚” 試過潮州翅同埋滷水鵝肝, 大開眼界, 一試難忘. 從那天起, 鍾意咗潮州菜. 記得幾個月前去老友 “意大利長介” 屋企搞飯局, 佢叫我一齊搭車去攞滷水外賣, 就係新蒲崗 “陳儀興飯店”, “長介” 真係識飲識食. 自此家庭飯局都幫襯過幾次外賣, 主攻滷水鵝片鵝肝. 一直希望試下太子 “陳儀興尚潮流”. 神推鬼㧬, 今日嚟開飯.

🍽 餐廳裝修古樸典雅, 地下樓層以2-4人方枱為主, 沿樓梯上二樓, 設有多張圓枱. 氣氛一流! 今日點咗潮州翅, 荷包鱔, 蠔餅, 鵝肉鵝肝.

🤗 潮州紅燒翅. 結構似 “飲宴魚翅”, 當然呢個真材實料, 湯底唔會 “渴撻撻”. 大大碗, 味道不俗, 讚!

1

潮州紅燒翅

🐟 清燉荷包鱔. 聽講平時要預訂的. 用鹹酸菜葉包住去咗骨嘅白鱔, 有趣! 白鱔已經煮腍晒. 湯夠熱, 微酸, 好飲.

清燉荷包鱔

🦪 汕頭煎蠔烙. 蠔新鮮大隻, 啱啱炸起好好食. 論粉槳, 唔夠酥脆, 食到中途腍哂, 食四份一已經好滯. 相比之下, “將軍澳陳儀興” 嘅蠔餅明顯優勝.

汕頭煎蠔烙

🦢 鵝三寶. 鵝肉, 鵝肝, 鵝腸. 陳儀興嘅滷水非常靠得住, 甘香入味. 鵝肉OK, 唔會太韌. 鵝腸爽口, 唔算多肥膏. 鵝肝最出色, 入口溶化. 呢個三拼抵讚, 留番個肚試其他菜式.

鵝三寶

🤗 總結: 服務OK, 員工殷勤有禮. “陳儀興尚潮流” 提供多款傳統潮州手工菜式, 睇餐牌已經十分吸引. 滷水繼續出色, 潮州紅燒翅值得推介, 清燉荷包鱔甚有驚喜. 有機會試下其他手工菜式.