川之源

營業中

休息中

今日同同事試吓呢一間喺樓梯邊好容易錯過嘅四川菜。菜式十分之正宗，性價比高，上菜速度都好快，適合中午去食晏。擔擔面：醬汁好香，麵質彈牙，係四川重慶風味，所以偏向撈麵多啲，唔係好多湯嗰種上海擔擔麵。肥腸面：湯底濃郁，涵水肥腸好入味，洗得好乾淨，食到底都仲有好多肥腸，真材實料。涼拌雞腳：有好香嘅青辣椒味，脆口，如果唔食得辣嘅朋友可能會覺得有啲挑戰性，但係越食越想食，甜甜酸酸辣辣咁樣，非常開胃。餃子：厚皮的北方餃子，餃子餡料調味有用心。口水雞：如期望一樣好，有雞味、肉滑、辣度適中。桂花冰粉：非常清涼，又唔會太甜，充滿桂花香味，食完咁多辣嘢之後，最後來一個透心涼嘅甜品，簡直完美。