Olive Cafe (新領域廣場) (已結業)

換季時間最鍾意去南豐中心買衫，幾十蚊件可以著一兩季，永遠都是潮流時興的款式，雖然質料都是麻麻，但勝在價錢便宜。之後去了附近的Olive Cafe依肚。我跟朋友都點了最簡單的晚餐，價錢百多二百元。麵包配羅勒醬，味道清新。番茄濃湯番茄味道濃郁，微酸可以刺激食慾感，還帶有番茄獨有的甜味，十分開胃。煙三文魚凱撒沙律原棵羅馬生菜上面舖上芝士碎及煙肉碎，自行切開慢慢食，沙律新鮮爽脆，煙三文魚配沙律最夾。德國蜜糖芥末烤鹹豬手原隻鹹豬手即叫即炸，再淋上蜜糖芥末汁，豬手應該煮過去掉咸味，所以咸度適中，反而多了陣蜜糖香味，豬皮因為炸過的關係，所以帶點脆而且有咬口，充滿著骨膠原，肉質不會炸得太乾，還保留著肉汁，另外炸粗薯十分香脆，再加上些沙律菜，減輕油膩感。香煎鱸魚配意式香草車厘茄汁鱸魚的份量比較少，兩小塊而且比較薄肉，但外皮煎得香脆，魚肉雪白有鮮甜味，肉質結實，配上番茄汁帶點酸甜味道，另外蘆筍去掉外皮保留最嫩及翠綠的芯，所以特別爽脆。最後飲埋杯餐茶，七八成剛好。