入座送上前菜小食--醋泡木耳, 酸辣爽脆, 非常開胃。
大閘蟹有多款套餐, 不過家人不太好大閘蟹, 所以只好單點一隻滿足自己。
【大閘蟹】HK$118
揀咗大閘蟹乸, 即蒸熱辣辣, 雖然唔係好大隻, 只有手心般大, 不過蟹膏份量多, 橙色蛋黃質感蟹膏, 仲有creamy甘香蟹膏, 蟹肉鮮味;
食完大閘蟹還送上了熱辣辣薑茶驅寒。
【莆田扁肉湯】HK$32
紫菜湯鹹甜美味, 有8小粒薄皮包住嘅扁肉, 盡索湯汁, 一啖一粒, 帶點鮮肉香。
【酥炒芋芯】HK$98
芋芯粉嫩鬆化, 外層有層好透薄嘅炸皮兼沾上少少糖漿, 微脆甜甜地。
【蒜蓉豆豉蒸鰻魚】HK$188
鰻魚皮爽, 肉嫩微彈, 以蒜蓉豆豉調味提升了鮮味, 每件鰻魚都有一件多層腐皮墊底, 盡索鰻魚精華, 整個菜式配搭一流! 推介!
【福建紅菇海鮮鹵麵】HK$138
香甜湯底易掛汁, 麵條索咗湯汁同時又掛汁, 口感又林又滑; 配上多款海鮮、配料, 包括有爽口鮮甜蝦、蟶子、蜆、肉片、小棠菜碎等… 鮮香美味有層次。
