甘棠燒鵝

營業中

休息中

放假都要搵好嘢食啦！今日又去咗甘棠燒味坐低第一次食堂食，好多人都冇寫過佢哋的燒味，其實呢度嘅滷水做得幾出色，今日叫咗個滷水鵝腸拼墨魚，鵝腸十分爽脆，脂肪亦清潔得好乾淨，冇躁味，入口好彈牙，墨魚爽口，又彈牙食得出係新鮮貨。之後叫咗甘一刀，係叉燒最肥嘅位置，非常之柔潤，外層好香口，睇落去好似好燶，其實入口剛剛好，雖然感覺好邪惡，但係食一兩件都OK。燒鵝处皮香脆，肉多汁又夠香，四個人食半隻啱啱好。點一條清蒸海黃花魚，老闆話唔係成日有，仲要係新鮮游水嘅，咁今日嘅要試吓啦！魚上枱果然夠滑，有魚味，上枱啱啱夠熟，加上豉油同埋蔥絲，非常之好味。其實甘棠燒味真係從來唔會失手，可惜係位置有啲吊腳，喺南華會保齡球長旁邊，但係為咗好嘢食，我都都唔介意。