糖宮甜品專門店 (金巴利道)

營業中

休息中

同舊同事喺附近食飯食到一肚氣，跟住就搵到呢間甜品店下一下火。因為一行有九個人，都心大心細佢會唔會無位。點知打開個店門，一陣陣嘅榴槤香味超撲鼻，所以決定點都要等到佢有位爲止。不過等咗陣都好快安排到2樓俾我哋。成個餐牌都好多選擇，其實好多樣嘢都想試。不過俾佢頭先嗰榴槤味吸引到最後都嗌咗個榴槤雪花冰嚟食。唔知係咪榴槤食品製作需時，其他唔係食榴槤嘅同事一早已經刮到碗底都未到幾個榴槤控。等多咗陣，終於上檯啦。冇我喺樓下聞到嗰陣咁強烈嘅榴槤味，食落去個雪花冰係淡淡嘅清香。就算隔籬同事唔食榴槤，佢都唔覺得味道強烈到接受唔到。加埋啲脆脆片同小丸子，口感相當不俗。除咗雪花冰還有好多選擇，有個菠蘿雪花冰見同事叫都好正，下次有機會要試下。