影片
更多
2024-05-13
64 瀏覽
《鮨燐 - 上環》我個人覺得食Omakase 其實同開盲盒一樣，按照廚師嘅喜好同埋時令嘅食材而安排適合當日製作嘅菜式，你永遠唔到食嗰下唔知道你當日會食到啲咩😌食嘅係壽司師傅嘅手勢同埋烹調手法，從刀工、切法以及調味都經過精心計劃☺️留意到近排好多日式餐廳都有推出唔同優惠嘅廚師發辦套餐，今次就去咗一間我自己都幾喜歡嘅壽司店，平時多數去尖沙咀嗰一間，但係今次我又想試埋佢上環呢一間分店嘅做法，所以特登book咗喺收工之後過嚟食晚餐😎原來呢間壽司店喺港島已經有六年歷史，係區內有名氣嘅壽司店之一，出名食材新鮮而且抵食，當晚都見到好多一個人自己嚟食壽司嘅客人😎雖然餐廳用嘅食材都係從日本唔同地區運送過嚟，但係價錢又唔算好離地喎，原本14件廚師發辦嘅壽司套餐原價$1380，而家做緊六折優惠，只需要$828就食到啦💁🏻♀️啱晒情侶慶祝又或者同生意夥伴食飯去嘅地方🤭呢一個套餐以壽司為主，首先會上前菜三味，然後師傅會再於席前製作壽司，所以食到美食之餘仲可以向師傅偷吓添🤭💁🏻♀️前菜三味🔹松葉蟹配柚子醋啫喱及紫蘇花雖然細細碟，但係望落好精緻，松葉蟹肉配上酸酸甜甜嘅柚子醋啫喱，食落開胃而且味道清新，好喜歡上面落咗紫
我個人覺得食Omakase 其實同開盲盒一樣，
按照廚師嘅喜好同埋時令嘅食材而安排適合當日製作嘅菜式，你永遠唔到食嗰下唔知道你當日會食到啲咩😌食嘅係壽司師傅嘅手勢同埋烹調手法，從刀工、切法以及調味都經過精心計劃☺️
留意到近排好多日式餐廳都有推出唔同優惠嘅廚師發辦套餐，今次就去咗一間我自己都幾喜歡嘅壽司店，平時多數去尖沙咀嗰一間，但係今次我又想試埋佢上環呢一間分店嘅做法，所以特登book咗喺收工之後過嚟食晚餐😎原來呢間壽司店喺港島已經有六年歷史，係區內有名氣嘅壽司店之一，出名食材新鮮而且抵食，當晚都見到好多一個人自己嚟食壽司嘅客人😎雖然餐廳用嘅食材都係從日本唔同地區運送過嚟，但係價錢又唔算好離地喎，原本14件廚師發辦嘅壽司套餐原價$1380，而家做緊六折優惠，只需要$828就食到啦💁🏻♀️啱晒情侶慶祝又或者同生意夥伴食飯去嘅地方🤭呢一個套餐以壽司為主，首先會上前菜三味，然後師傅會再於席前製作壽司，所以食到美食之餘仲可以向師傅偷吓添🤭💁🏻♀️前菜三味
🔹松葉蟹配柚子醋啫喱及紫蘇花
雖然細細碟，但係望落好精緻，松葉蟹肉配上酸酸甜甜嘅柚子醋啫喱，食落開胃而且味道清新，好喜歡上面落咗紫蘇花，帶出陣陣嘅香味
🔹水梅貝
新鮮嘅水梅貝用咗甜甜嘅醬油製作，食落彈牙爽口，味道甘甜
🔹沖繩水雲
沖繩水雲其實即係海帶嘅一種，用咗酸酸美味嘅醋汁調味，咬落索索聲好爽脆，作為前菜十分開胃
💁🏻♀️壽司十四貫
🔹愛媛縣蜜柑鯛
魚肉帶有陣陣嘅水果香氣，肉身質地比較爽脆，師傅輕輕用鹽吊出魚嘅鮮味，味道相對較清新，作為第一件壽司會由淡味開始食起👍🏻
🔹鹿兒島烏賊
其實就即係墨魚，師傅用咗細切嘅方法，令到魚肉更加帶出到黏性同埋實身爽身，煙煙韌韌嘅感覺特別
🔹金目鯛配香蔥
師傅將魚皮用熱水灼一灼再燒香，令到魚肉可以迫番啲油出嚟，更加帶出到個油份同甘香，配埋新鮮嘅香蔥，食落有層次而且有不同嘅口感
🔹北海道帶子
肥美嘅帶子食得出新鮮嘅口感，有種黏黏糯糯嘅感覺，味道都幾清甜
🔹日本大分縣深海池魚
呢件壽司我印象好深刻，喺深海魚肉上面放咗自製芝麻醬，入口有好香芝麻味，而且深海池魚嘅油分本身都好高，配上芝麻醬之後好似食緊麻油肥豬肉咁👍🏻口感肥美香濃🔹間八魚
師傅話佢就係我哋平時叫嘅樟紅魚，上面落咗少少甜麵豉醬，成件壽司偏重味道，咸香味十足
🔹銀鱈魚BB
咁耐以來都只係喺鮨燐食過銀鱈魚嘅BB，師傅用咗柚子胡椒醬調味，又係勁厚同勁重油香嘅魚肉，不過師傅落wasabi都幾重手😝聽講係可以令到冇咁油膩
🔹神奈川梭子魚
外皮落咗少少糖再經過炙燒，外皮微脆，師傅在塗抹上青汁調味，入口立即溶化☺️個醬汁幾特別，可以話係當晚我最喜歡嘅壽司之一
🔹兵庫縣甜蝦
師傅物盡其用，將蝦膏同埋蝦油製作成醬汁再用返喺呢一件壽司嘅調味上面，食落香口惹味
🔹岩手縣赤貝
赤貝我就最鍾意睇師傅打佢嗰一下，超得意😝個肉質爽脆而且帶有海水味，係比較清爽嘅口感
🔹島根池魚
呢一件池魚同樣係比較濃味嘅一件壽司，同深海池魚屬於唔同科，不過同樣都係肥美肉厚嘅魚類，師傅用咗薑蓉蔥花製作，有啲混合咗中式嘅製作方法，口味特別
🔹長崎縣鯖魚
位列當晚我最鍾意嘅壽司第二位，好難形容佢嘅味道，好多層次而且味道有驚喜，喺軟滑嘅鯖魚壽司上面放上經過醋醃既蘿蔔片，切得好透薄，但係食落好爽口，可以幫助中和油膩感，呢件壽司令人印象深刻
🔹愛媛縣中吞拿魚腩
好多壽司店都會用大拖羅作結尾，但係呢度就用咗半肥瘦中拖羅，我就覺得唔使下下用到最肥美嘅大拖羅嘅，反而中拖羅嘅油唔會過多但係又食到有魚肉味，最緊要係冇血腥味，咬落軟腍，而且有肉香，油份魚味都配合得好好
🔹馬糞海膽
食廚師發辦，最尾一定會係呢件件萬眾期待嘅海膽壽司🥰師傅輕輕用咗特調醬油調味only，餘下嘅就由海膽自己發揮啦😌鮮甜美味，口內帶有餘香👍🏻好想偷咗成盒海膽走
💁🏻♀️味噌湯&師傅手做抹茶奶凍
食飽飽就輪到飲味噌湯啦，唔會死鹹而且微微透出一種香甜嘅感覺，唔知係咪味噌嘅關係，飲完個嘴仲會有陣甜甜地嘅感覺，入面仲有海帶同埋豆腐，飲完成個身暖笠笠🥸而甜品方面係師傅手作嘅抹茶奶凍，食落唔會太甜，奶凍上面放有黑豆，奶香同埋抹茶嘅澀味做得好平均，完美地為呢一餐畫上句號
張貼
