牛牛日式火鍋放題 (北角匯二期) (已結業)

難得黎到港島，我哋三個去咗北角新開嘅一間牛牛日式火鍋放題 GyuGyu Shabushabu！見佢新開張，一人一鍋，環境都好似唔錯，就決定試一試！一入到去都見到位置好闊落，燈光都算光猛，成個環境都乾乾淨淨！我地揀左$238 日本極級豚肉放題套餐，湯底揀左美人豆乳鍋、骨膠原豬骨鍋同埋牛牛秘見鍋！我地推介美人豆乳鍋，佢好濃豆乳味，又香又滑，員工話好多女性都揀呢款啊！豬骨鍋就岩平時食得清淡啲既朋友，而牛牛秘見鍋其實即係壽喜燒，我地就覺得佢偏咸左少少同埋佢呢度壽喜燒冇雞蛋送嗚嗚⋯最愛既生雞蛋！至於肉類方面，肉質十分新鮮！啲牛好嫩而豚肉薄得黎好香豬肉味，但可惜冇雞肉供應，如果有埋雞肉就好啦！火鍋料選擇都不錯，想食既基本上都有，特別推介啲魚蛋好彈，彈過周星馳個瀨尿牛丸！但係菜既選擇就少左啲，主要得唐生菜、娃娃菜同羽衣甘藍。甜品黎講，就唔係其他火鍋店既自助雪糕機，而係貴價movenpick雪糕！仲有九隻味！總括而言，很不錯！