尚青商號 (已搬遷) 新店位置

終於有機會試尚青商店啦😍，呢度裝修充滿台灣風味，一邊食嘢，一邊幻想一下去咗台灣旅行，都幾爽🥰。先嚟兩個小食，台式鹽酥雞熱辣香脆，粉漿唔會過厚，調味亦唔錯，肉質就正常水準；基隆甜不辣質感較實，最正就係鋪滿蒜粒，非常惹味👍。主菜叫咗一飯一麵，香菇魯肉飯附送溏心蛋半隻，酸蘿蔔同涼拌木耳，魯肉一般肥美，唔算非常突出，成個飯就係靠個調味取勝，除咗鮮甜嘅醬油，仲有木魚絲，芝麻，蔥花等，好食😋。埔里花雕牛肉麵係我全晚至愛，湯底酒味勁濃，唔算油膩，仲有粒粒杞子，直頭可以當湯飲，超正😍；我揀嘅手工寬麵麵質較韌較 raw，係我鍾意嘅口感；牛肉份量多，雖未算非常入味，但也煮得軟腍；加埋附送嘅油條同酸菜，真係超級滿足。