彩福皇宴 (已結業)

不知不覺又到十月，又係老爸嘅生日，一向鍾意食中菜嘅佢，今年都唔例外，醒目嘅我哋預早book咗，等佢開開心心慶祝生日！今次去咗皇室堡食飯，呢間就係彩福皇宴，由於係星期六，所以晚市都差唔多坐滿哂。今晚一共叫咗五個餸，第一個係片皮鴨一食，全鴨新鮮熱辣燒好，再由廚師即席逐塊逐塊片鴨皮落嚟，鴨片非常脆，再配麼麼皮同青瓜一齊食，完全唔肥膩，呀爸都讚好！食完鴨就到雞，呢個脆皮南乳雞，雞肉非常嫩滑，食雞唔食雞皮就走寶，呢個雞皮脆卜卜，醮完南乳食，啱啱好。下一個就係我！小弟叫Angus，就即係食安格斯牛肉！呢個燒汁野菌安格斯牛柳粒，牛肉炒到啱啱好，唔韌，又大粒，又有好多雞脾菇同荷蘭豆，好健康。清清地爸爸就叫個北菰紅燒豆腐，豆腐大大個，好重豆味，真係唔錯呀！最後一個就係帶子海鮮雜菜煲，呢個雜菜煲好足料，有大大粒帶子，好多象拔蚌粒，蟹柳粒，粉絲同雜菜，湯底非常鮮甜，推薦！見到爸爸食得咁開心，就知冇去錯地方了！