金鳳大餐廳 (山林道)

營業中

休息中

【油尖旺區】【金鳳大餐廳】之前幾次想去呢間餐廳，都因為太多人，要排隊，所以食唔到。適逢復活節假期嘅星期一晚，我都諗住打定輸數，可能都係食唔到。點知入到去，得啲卡位有人，中間嘅枱櫈全部都係吉嘅，任我坐。咁我就梗係把握機會，好好咁嘆吓金鳳大餐廳呢間扒房啦。我就叫 $206 嘅「美國安格斯肉眼扒餐」，首先有「餐包」，都算港式西餐必備。之後餐湯我加 $20 轉「龍蝦湯」，都冇乜期望㗎喇，所以飲落冇乜特別都唔會太失望。跟住到主菜「美國安格斯肉眼扒」，我揀咗五成熟，鐵板上，就係要佢咋咋聲咁先過癮。本身個味道都可以，加 $2 要埋「蒜蓉」，就為呢啲本身質素唔係太高嘅牛扒加上好重要嘅元素，如果本身塊扒好靚就唔建議落。嘢飲我加 $18 飲「雜果賓治」，正正常常啦，冇乜特別嘅。加一之後係 $271 埋單，都係當食個港式情懷，感情嘅分數佔多。。。（地址：尖沙咀山林道9A號地舖）呢間餐廳我寫過其他分店嘅用餐體驗以及食物，如果想睇，可以打以下 hashtag 搜尋返嗰次嘅用餐體驗記錄：