鬼金棒牛骨辣麻拉麵 (已結業)

之前「鬼金棒」推出全新姐妹店「鬼金棒牛骨湯拉麵」，一直都未有機會試。最近喺日本返嚟，好掛住夜麻麻食拉麵嘅感覺，就嚟到試吓。招牌牛骨拉麵（原味）$100 🐄湯頭係用牛白湯，以牛腿骨作為原料熬製，不過店家仲會加上濃黑的拉麵醬汁，所以出嚟嘅顏色係啡色嘅。原本期待係以牛骨味為主，但實際上最突出嘅係牛油嘅味道，而且係真牛油味！因為有少少騷味！🫣另外湯底嘅味道亦都偏鹹，其實好快就會膩，雖然佢有啲生洋蔥清一清口腔，但個人都覺得店家可以提供一啲拉麵胡椒或者黑椒，等食客食到一半可以改變下口味。（或者有，但我冇問🙈）店家選用嘅係細麵，據說同日本合作夥伴開發，掛汁的程度適中，口感偏爽，唔會好快腍。👌🏼配料主要有三種，第一種係西冷部位製成嘅牛叉燒，據說以醬油煎香，以肉味為主，帶少少鹹味同胡椒香。比較特別嘅係慢煮牛筋，比較少出現喺拉麵度，佢係保留少少爽口，但又夠腍嗰種。☺️最後係粟米筍，小編不嬲都一般呢樣嘢，不過就唔難食嘅，至少冇草青味。😂味玉 +$15拉麵本身冇蛋，要就另外加$15蛋。本身隻蛋唔太靚仔，醬油漬嘅感覺唔係好重，可能因為本身個湯已經夠鹹，隻蛋再鹹啲嘅話就會好重口味。佢以蛋味為主，味道香濃，都可以加的