綠茶餐廳 (奧海城二期)

營業中

休息中

突然之間想坐得舒服食下一啲特色中菜，就嚟咗食新開綠菜分店😀龍井烤雞，係佢哋嘅招牌菜，下面有龍井墊住，所以保持到茶香味。雞唔算大隻，肉算嫩，不過就咸咗少少🤏🏻粉絲裹蝦，呢一味都幾算有驚喜，上枱時蝦係生嘅，店員撈咗汁落鍋煮大概八分鐘，夠鐘就撈起，蝦爽口，粉絲上色同味都夠👍🏻（香港先有）蔥香脆皮烤鴨，爆多蔥，鴨肉香而且多汁🤩蝦湯泡飯，呢道我哋個個一食就大讚，蝦湯湯頭非常濃厚，用泡飯做底係絕配😍（香港先有）鮮果鵝肝塔殼，凍點嚟講好清新，芒果唔酸，入面鵝肝都多，一口咬感幾豐富🥰西湖雷峰塔，呢個就打卡為主，鮮山藥配牛奶兩者味道偏淡🤔西湖藕韻，呢個值得叫，糯米藕煮得剛好，加埋脆藕片令口感增加層次，底用咗士多啤梨汁都幾特別，有多重味道都幾好😌我哋仲有叫喉口豬肉包同蛤蜊絲瓜，正常水準😬店門有位打扮得好靚嘅「仙女」彈古箏，有另類live背景音樂，不過坐得近佢都幾應聲，可能要大聲啲講嘢🫢 欣賞店內嘅裝修，幾雅致。相信餐廳係設計上想盡量多座位，想多啲儲物就唯有每張枱就做咗枱櫃，客人或者會覺得幾頂腳。店員服裝都跟番餐廳風格，不過服務就一般，可能會經常因為太過忙碌、或太專注耳機同事之間講嘢而忘記客人查詢。