抓住冬天尾端，仲有少少涼意，熱底人表示即刻去打個邊爐🫕 好耐無嚟馬鞍山，去到新港城中心有間新開嘅台式火鍋，即去食！ 門口勁多人排隊😳唔通居民餓咗有新店好耐🙈排到你個時，係門口入座前要揀定邊個餐同飲咩湯，要介紹係唔同餐有幾款台式飲品送，排隊時記得睇定😉排骨湯已經賣哂！我哋點咗麻辣同藥膳，一辣一清，飲品就仙草奶茶同埋檸檬愛玉蜂蜜綠茶，入場前店員會直接幫你落埋牛，確保煲上左無耐，出去拎定醬料同蔬菜返嚟就ready，正😄 店內勁有台灣感覺，卡位用咗唔同嘅台灣火車車站，拎嘢食就係「夜市街」🤩任食區有好多特色嘢拎，甜不辣、米血糕、麻辣鴨血、特色貢丸，熟食仲有烘住嘅腸仔、關東煮🍢等👍🏻去到醬料區，出現腐乳，最驚喜有黑白芝麻，好開心😁 牛豬雞件新鮮，碟碟都好豐富，建議大家可以先點一碟食咗先，唔好按人頭點，鍾意先再點，珍惜食物😉仲有勁厚切午餐肉😲我自己鍾意藥膳湯底，幾濃，煮米粉好夾。菜類新鮮，中間食一下隔一隔，再嚟過😝麻辣都唔錯，唔算過辣，食鴨血麻辣齊哂😋最後要有一杯雪糕，即刻清哂😁 新店一般開始時都會多啲事故，職員處理得好好，好有禮貌。聽到有老友記客人唔識QR code落單，職員好有耐性解釋餐牌同幫手點餐👏🏻 好耐無食台式火鍋，滿足一下都好🤭 真係多人㗎🫢

一個法國主廚，帶佢嘅美食魔法入嚟四季酒店，已經令Caprice 蟬聯米芝蓮⭐️⭐️⭐️食材直接每日由法國🇫🇷送到香港，希望每道菜式做到令人覺得異想天開🤩 一入到餐廳，超寬敞，遠遠已經見到半開放式廚房，但一啲油煙味、食物香味都聞唔到，每個角落只有淡淡嘅清新味道🎍餐廳整體無過多嘅裝飾，只有幾個大型吊燈，唔覺俗氣😆兩層用餐位置嘅設計，下層主要二人枱為主，但唔會阻到上層望出窗外嘅景色👍🏻 今次我哋坐係下層窗口位，睇住維港竟然會慢咗落嚟，好似連渡海小輪都行得好慢🐌 小食餐包 除咗有開胃小食，餐包有五款，作為包控，試哂，我較推鬆軟系列，配佢有鹽無鹽牛油，好味👍🏻 前菜 傳統法式酥皮肉批伴醃製香梨 一上桌一刻，見到一幅非常靚嘅「畫」，好似一道門邀請你入屋咁。法式傳統嘅一道菜，「門框」用咗酥皮，「門身」係肉批，做得好貼好滿，一啲空間都無，味道好足，中間配一小啖梨，梨肉梨蓉均非常濃，做得到稍為中和整碟菜式😋 湯🥣 特色洋蔥濃湯 侍應上碟後倒熱湯一刻，洋蔥香味大爆發，每啖入口都係濃湯，絕對要全清🤭 肉🥩 香烤法國鴨肉伴鴨肝撻配香梨及咖啡 鴨肉味道剛好，侍應上碟一刻倒汁。如果熱度可以多少少，個汁配上去應該好少少。鴨肝撻個樣整到好似甜品，點啜好靚好工整，味道唔膩，舒服，我個人鍾意呢個撻😆 法國羊肉伴萵筍及鷹嘴豆泥配燒汁 羊肉點咗MEDIUM RARE，質感我哋都鍾意，唔羶，不過令我哋驚喜同樣又係配菜，萵筍鷹嘴豆泥好清新，有助提升肉味🤩 甜品🍧 法式栗子蛋糕伴柑橘及柚子雪葩 栗子算濃，值得提係入面嘅層次靚仔，一啖食落勁豐富，酸甜交錯但配得好好，唔會過凍，好好味🤤 多謝靚字寫上HAPPY BIRTHDAY 💛 最後朱古力做尾聲 服務方面今次用餐有唔穩定嘅地方，初初由一位男經理略略介紹，另一位男仕應介紹餐牌，留我哋自行討論。其後換另一位女侍應嚟，好熱情咁不停推介廚師精選，我想知當日時令魚係咩，佢就退去廚房問（唔係應該本身知😅）問完返嚟答我哋，再強調要點廚師精選，話咩都會有😅最後我哋點FOUR COURSES，開始上餐包時都無乜嘢，都係NICE。未幾就轉咗另一位女侍應嚟招呼我哋，之前嗰位女侍應無論係提供服務去我哋定隔離枱，全程幾乎黑面，我會奇怪「你初初招待時咁熱情，好似變咗第二個人咁😅」我觀察其他侍應係正常水準，同時上菜同時落汁、介紹菜式、一致性仍然做到。以上純係我個人觀察，可能該位女侍應返後台後發生咗啲事，令佢180度大改變，當然服務唔使24/7「四萬哥」，不過太大落差會容易令客人感覺麻麻，定係唔知佢發生咩事。純粹我個人用餐比較易受環境影響，呢點令我感覺美中不足。

從前呢個地方只得人龍同無乜嘢食，慢慢開始多間咖啡店進駐。今年多咗個公園，多咗一個空曠飲啡好去處，喺港島呢個隱蔽空間裡面，好啱曬住太陽嘆杯咖啡☕️ 原來有兩款豆俾你揀，我太傻仔，叫完先問🤦🏻‍♀️ House blend係巴西single origin豆 繼續係肥威，flat white，好耐無嘆過 牛奶朱古力味重，好淡嘅杏仁味 坐係露營椅上，外加吸收最天然嘅維他命D☀️ 見到露營椅，想露營了😌 朝早係度chill住飲咖啡都幾爽，不得不講，附近原來仲有個公園🤩 「舍區」 Quarry Side 係一個新起嘅社區休憩空間，成個setting感覺可以做到劇場、展覽，又有啲房可以俾人book，見到仲有一個「廚房」，旁邊仲有一大片草地係用嚟俾小毛孩🐶放電👏🏻

平時行銅鑼灣都覺得好逼又多人，尤其宜家開番關之後，想搵個地方靜靜地傾吓偈，介紹剛搬新鋪嘅The Grill Room俾大家😬 本身都想叫扒，不過到左之後再望menu好隨意來點不一樣😆 Steak Tartare 牛肉他他配法式千層薯 牛肉他他好冧，肉味先出，herbs味慢慢飄出來，後來輕輕辣一辣味蕾，再配埋好鬆化薯味十足，兩者配埋好香口好開胃🫢 Smoked Suckling Pig 煙燻香脆乳豬伴焦糖菠蘿 店員拎住一個好似裝首飾木箱出嚟，請我哋準備手機，一開，首先係輕柔而啖煙燻味先飄出，肉眼見到乳豬皮油好足好令。到食一塊肉時，啲煙燻味一啲都唔會過濃，肉身非常嫩，皮好脆🤤再有焦糖菠蘿嘅甜送個煙燻肉味，係好夾🤩 Braised Wagyu Beef Ragu Pappardelle 燴和牛蕃茄闊意大利麵，我哋都喜歡食pappardelle，要煮得好又要均勻地撈得好又入味，呢間做得好好，蕃茄汁食得出係有濃濃鮮茄，唔會偏膏味。燴和牛肉感非常幼嫩得嚟肉味重，而且好多舊一口牛，真係食得好滋味😋 作為包控，特別推介佢哋嘅酸種包，非常香，脆邊，一定要搽埋佢嘅牛油，香到爆炸，搞到我忍唔住要追加🙃 餐廳做緊drinks promotion，我哋就點紅酒嚟配，味道好重木味，air耐小小就黑梅 另外餐廳亦有提供free-flow，嚟自Nordaq sparkling or still water，每位10蚊😆 入到嚟隔離原來係人氣壽司店，道門隔聲做得好出色，所以一定唔駛擔心餐廳唔夠靜。 樓底算高，唔會壓迫。一間有限空間做到可以咁多獨立梳化位，仲要睇到半開放式廚房入坦大廚顯身手😍從裝修睇得出係希望帶俾客人入到嚟馬上靜到個人，好快就可以投入進食氛圍，燈光剛剛好，唔會過暗👍🏻 想拍拖、同三五知己傾吓偈，非常推薦

獅子山下，完全估唔到喺天馬苑呢度新開一間粵菜餐廳。想搵個地方一班人有個靚靚角落、舒服地方食個飯，同屋企人朋友好去處，我推介呢度 片皮鴨皮脆，夾埋佢桂花、蒜泥同其他配料，無論包住食定就咁沾醬食，都好好食 （我哋二食揀咗椒香爆脆鴨件，就咁食就一般，比較啱送酒） 遠年陳皮一口脆腩，個層腩脂勁肥美，包得夠哂實，食落就知有幾juicy 陳皮欖角脆鱔球，呢個非常好食，第一下上碟你感受到佢油力無少到俾你，回鍋醬汁亦沾得好均勻，食到最尾陳皮香浮出嚟，正 蝦籽慢煮柚皮，柚皮整得好食唔容易，絕對係功夫菜之一，完全唔苦，非常柔綿，湯汁夠鮮都非常夾 焦糖菠蘿咕嚕五花腩，大讚焦糖菠蘿 其他點咗嘅仲有蟹醬蟹肉雙菇炆伊麵，雙重爆鮮味。薑汁炒芥蘭，界得好仔細，微薑，唔會好辣。 甜品方面全部唔算甜，糕點類全部都係佢哋自家製。我哋各有各喜歡嘅，雲石馬豆糕、擔仔砵仔糕、懷舊芝麻卷同埋紅豆沙。 開業個幾月，入到嚟樓底好高，枱與枱之間一啲都唔逼，有房可以book。中菜最正就係三五知己、一大班圍爐取暖，咩都傾一餐！ 餐廳提供晚市代客泊車服務，記得先預約車位。

今次去到石板街呢棟高樓大廈，食住個靚靚港島景，重點係食到星星法國大廚Chef Olivier Elzer嘅精心設計menu，又同朋友有個私隱地方傾下偈，仲要係勁嘆，特別推薦呢間餐廳俾啲最想俾驚喜另一半嘅人😆 頭盤係黑虎蝦🍤配零陵香豆加檸檬醬汁，原來零陵香豆可以咁提升到大蝦嘅鮮味！一放入口有幾重香味，正😋 （仲睇到小鮮肉係極精緻bar枱大顯身手😍） 跟住係上嘅係八爪魚🐙，一睇先有極濃嘅海膽泡沫，再夾住八爪魚片，仲有蕃茄脆粒同埋小小青檸，口感爽口 仲未完，有一口海鱸魚加上焦糖醬汁，係餐廳專屬嘅形式整嘅一道料理，加埋焦糖，甜甜地又帶到鮮味出嚟，勁👍🏻 一口魷魚🦑，自家製香料，辣辣地，食到呢度開哂胃lu😆 我第一次魔鬼魚，大廚將成條魔鬼魚放係鐵板烹調上碟，原來啲肉係咁嫩滑，完全估唔到😍記得一定要沾佢哋自製嘅醬汁，炸牛油出嚟極邪惡之醬，但點咗，番唔到轉頭🤩 喜歡食蒜，唔可以錯過佢哋嘅油封香蒜，入口柔軟，配條魚就夾哂！未完，配埋佢哋苦白菜沙律，無得頂😋 慢煮⼩⽺肩又係必食（小姐你到底有邊樣唔推介😒），真係超滑，而且係完全唔羶，怕羶就咁食肉就夠哂，會對羊肉改觀。鍾意羶味嘅，唔怕，又係沾佢個醬，mix埋之後精華在此，即刻變得好羶😎 再嚟一定一定要點埋佢地嘅炭香薯蓉，炭燒過嘅薯仔會沾上炭灰色，再加牛油同忌廉做薯蓉，呢個薯蓉係我嘅Top 1！最利害係佢仲保留薯粒，極豐富口感，我忍唔住自私食咗好多😛 到咗填埋「甜品胃」嘅時間，又係自家製雪葩再加北海道牛奶🥛雪糕🍦，匙羹篤到底有玫瑰啫喱仲有荔枝肉，好味到癲！另一但甜品係牛角酥窩夫配自家製雪糕，係來自法國嘅味，極滑，再配海鹽焦糖，呢晚真心填滿味蕾了🥰 四道菜每位HK$988，既然已經容許味蕾有極級享受，不如錦上添wine，加小小嚟個wine pairing 😎成件事就perfect😜 一個適合情侶嘅小小空間，或者幾個bff talk ，book位不妨問下有無呢個位😉 小房間作任何你想做嘅私人空間，生日驚喜？三五知己聚餐？相信都會有難忘嘅一日😏 露台位啱Men’s talk😎 期待下個月法國月佢哋有咩嘢食😆

好耐無去食刺身食串燒，嚟到尖沙咀小巷中穿梭，搵到一間有驚喜巧有feel嘅居酒屋🏮 刺身要點係要新鮮，薄切青鯛恰到好處，肉質好嫩，特別之處係呢間居酒屋除咗有平時豉油加芥末，蘿蔔絲蔥花酸汁，不得了，提鮮到一個點😍每啖係勁滿足，每片切得好平均，刀法非常好👍🏻仲有墨魚刺身，我本身麻麻地墨魚質感，佢切得厚身啲，帶嚟係實啲肉，反而味道更加出，點磨好嘅鮮芥末豉油，好好味😋 （我自己好鍾意後面咁chill嘅格局，坐吧枱都唔錯） 日本室津蠔（半份，兩大隻），唔係講笑，手掌咁大、肥美、夠鮮、無海水味，仲要爽口，喜歡食蠔一定要點，叫埋清酒一定滿足到底🤩 壽司有深海池魚，肉質厚實又好味，本身已配少少芥末係壽司，一口食落非常滿足；仲未夠， 北海道海膽，完全無諗過呢啖有極滿海膽味，無腥味好乾淨，紫菜係好脆，成件壽司啪落口呢啖係回味無窮，不得了😎 輪到 串燒，大推蕃茄豚肉串，日本蕃茄多汁熟度剛好，好甜，再配燒得剛好嘅豚肉香，汁又帶有微酸感，呢啖又係超驚喜🥳 雞皮串，燒到剛好成舊係好脆，肥嘅部分係燒咗油香，正😁 柚子鹽燒白膳，柚子味配上魚皮香，肉好滑😆 牛舌 ，個厚度剛好，味夠，呢間唔會落多鹽，牛味出番好多😌 不得不提，佢個鮮魚奶湯，碗埋嚟已經爆魚香，奶白得很，先一啖落肚係舒服到一個點，而且你係好清楚知道係煮得好耐而係夠料，而係好清，配料新鮮，再加稻庭烏冬，記得一定要配啖湯飲，層次即時高三倍，飲哂成碗湯，完美哂❤️ 見佢有杯自家製檸檬特飲，係燒酒檸檬梳打，燒酒第一下苦係完全無哂，酸度上嚟平衡到，好好飲😳 幫襯呢晚枱枱都係熟客，個個一坐底，「上次我試過」「個陣你講嗰個刺身」等，亦同同行者特別介紹之前食過，餐廳店員會介紹是日鮮味推介，個個都讚不絕口👏 我自己最喜愛嘅係刺身，薄切配特別醬汁但做到將肉質同味道提昇；而Mr A最鍾意係個魚湯，佢曾經飲過最好飲嘅魚湯，嗰間餐廳已經無做，呢個湯完全喚起佢呢段記憶，味道係好近，好好飲極滿足🥰

愉景灣，一個會令你忘記你唔係香港嘅地方。唔知你最近一轉有無去旅行？我就無啦，不過嚟咗愉景灣，原來呢度有間土耳其餐廳，旅行感到底，一於試下土耳其菜，結果十分有驚喜😍 估唔到咁多選擇，睇到眼花撩亂😆 Mixed BBQ Plate 烤肉拼盤 （二人份），一上枱已經非常期待🤩，擺盤整齊，肉味極香。烤雞、羊同牛，香料夠但又唔會蓋過肉味。其實我係包控同澱粉質愛好者，不過想健康啲食少咗好多，但呢個拼盤嘅飯我係狂食，食咗大部分，唔係講香料加埋似炒米粉，完全唔濕，超級香，粒粒分明，凍咗仍然非常好食，係甜而香，好啱配肉😋連配菜都烤得出色，烤肉啖啖都好食，一上枱就快快食😝鋪係底嘅薄餅同平時食印度薄餅完全唔同，甜度高啲，口感有趣 Minced Meat Pide 碎肉薄餅 ，呢款形狀嘅薄餅第一次見，碎肉唔係全香料，亦唔係媽媽嘅味道，皮非常簿，邊小小脆，食落別有一番風味😁（同隔離拼盤比較就知唔少嘢啦，我鍾意食尖尖位😁） Buraq special salad 特制沙律🥗，配料撈上佢嘅汁，顏色亦吸引，勁開胃 Turkish tea 土耳其茶，佢似黑茶，聞落有淡淡檸檬味，飲落茶係淡味，但唔係檸茶，係滑身😌店員介紹係要加小小糖撈嚟飲，如果個人好疲累，飲一啖包舒服👍🏻 Ayran 芒果（右），呢杯係獨特嘅酸奶飲品，芒果味唔出，一杯yogurt嘅飲品，放係呢種杯，寧捨有風味🤓 Sirma 蘋果（左），佢係一支有氣礦泉水，一啲都唔甜，亦唔會話啲氣好勁，係舒服😌 想有渡假感，可以嚟愉景灣，好少香港人，我覺得全港外國人嚟哂呢度咁，好喜歡呢度嘅vibe🥰無得去旅行，不坊嚟呢邊行下😎橫掂都入到嚟，食下啲特色菜，一日離開下啦😌

將軍澳呢個區都有唔少選擇，海邊餐廳對住個海係正。夜晚終於有時會想喺啲隱蔽餐廳，想話浪漫情調一下。之前行過覺得呢間裝修幾靚，有啲掛燈又幾feel，就揀呢間。😍 餐牌多嘢揀，想有唔同嘅組合都有好多可能，飲品仲有好多特別嘅選擇。 餐湯揀左牛肝菌蘑菇，粒粒菇不在講，味道爆濃，絕對無hea，呢點欣賞 脆炸雞件配青檸蜜糖醬，雞件整得好食，唔厚粉，點個醬好好味，唔會死甜，小小fresh🤩 蟹肉露筍燴意粉配鮮蝦頭膏，啲蟹肉同蝦味爆得好勁，可以揀意大利飯或者意粉，而且份量唔少，卷極都仲有🙃 炭燒厚切豬鞍扒，呢個大驚喜！勁好食，好香炭燒，令肉味好出，非常juicy！配料全部烤過，勁好味，要讚下個南瓜蓉，整得好得！😋 炭燒類絕對可以encore，大推呀呢個！ 揀咗兩杯飲品，Sun Flower，passion fruit 非常清新，去咁啲油膩感，做vip勁抵，超大杯，而且係好濃； 波蘿斑蘭葉，香味夠，味道唔會好濃👍🏻 最後都係要來甜品，超好，可以要半份。Tiramisu ，自家製，口感浮浮，味道夠😆 服務好好，會主動斟水，亦好有耐性介紹嘢食🙈所有熱食熱盤上👍🏻 我最鍾意發掘一啲做到品質保證嘅餐廳，多過一間分店仍然做得好，係值得讚😝未諗食咩，不妨考慮下呢間，好有情調㗎

去PMQ多，都唔知有咩食。嚟緊咁多活動，咖啡都飲唔到幾多，食下嘢都要。呢間5月先開嘅意式餐廳，入到嚟彷彿即時離開香港，HH又得，毛孩又嚟得，大滿足😬 真係唔係講笑㗎，份量唔少！睇落去你就知 前菜一上，真係「嘩」，一盤係二人份，多到呢😧 有火腿、豬肉丸、多種芝士、魷魚係大家一嚟就篤，酥酥的。一定要提呢個Breakfast in Tuscany- 火腿蛋多士，一定要叫炒蛋，勁滑，蛋味十足，第一次食到咁好食嘅西式炒蛋😍 配埋佢哋個包，係好好食，淨係食前菜都不得了。 有四款意粉，你會點揀呢？Why not all!! 白酒蜆肉，蜆好多好鮮；蕃茄羅勒，勁夠茄味；卡邦尼，係用咗豬面頰肉，撈埋隻煎蛋，勁好食；松露蘑菇，個汁菇味係食過最濃，而且唔水，好味😋真係唔係講笑，4個人食係食到最盡🤣 主菜嚟啦，紅鯛魚仲有烤薯仔，一細啖鮮味嫩肉齊；炸豬扒配巴馬臣炸薯條，唔厚粉，剛好夾到，肉juicy；烤松子蔬菜，補下菜又得😎 去到呢度都未完，一人一甜品，白朱奶凍配佢哋自己整嘅新鮮野莓糖漿，好好食；My Auntie’s Toast- 多士配Mascarpone軟芝士，一定要加埋蜜糖落去，超夾；Morning Gloria，又乳酪又有Granola，佢嘅乳酪係有機，硬身啲結啲，質感出嚟都滑滑地，唔會好甜，食完都舒服😌 星期五、六同日先有呢個Brunch，朝早10至下午5點，重要要留意，任飲套餐都係每個人198，兩個鐘任飲意大利汽酒、紅白酒、啤酒、伏特加及琴酒😝 （早啲嚟就可以係呢個戶外位打卡，我飲杯先😉2個慢慢chill又得，一大班人嚟傾偈中間有大枱圍埋又得）