The Farmhouse 咖啡廳

最近同媽咪去咗The Farmhouse 咖啡廳食佢哋新推出嘅「東南亞薈萃」主題自助餐，除咗可以望到海景，食物款式超多選擇；分咗冷、熱兩區，真係要留肚去食！自助餐有多款東南亞異國傳統名菜，包括越式香茅豬扒、叄巴醬香料烤雞、馬來西亞炒貴刁、菲律賓燒乳豬、泰式蠔仔餅等等；仲有最受歡迎嘅海鮮區、刺身、串燒、粉麵等等。冰鎮海鮮最推薦龍蝦，龍蝦肉質夠彈牙！刺身區一定要食帶子、三文魚同八爪魚，三文魚油香豐腴，帶子鮮甜。熟食區推薦🌟菲律賓燒乳豬皮香肉嫩、泰式蠔仔餅香脆無比、仲有即叫即燒嘅串燒同豬頸肉，魷魚同豬頸肉encore咗幾次😋🤩主食泰式菠蘿炒飯好夠鑊氣；松露汁意大利雲吞都好出色，醬汁好creamy！食到最後一定要食埋甜品先走！佢哋嘅雪糕旋轉櫃真心吸引，最愛班蘭同椰子味，入面仲有啲脆脆喺度增加口感～芒果糯米飯同班蘭蛋糕每件精緻小巧，啱晒小鳥胃但又想試唔同甜品嘅大家🥰