影片
更多
2014-01-30
2766 瀏覽
上回七一，九龍代表Uncle K喺尖沙咀日航酒店主席廳擺咗一圍以「五行相生論」設計o既「五行風水宴」款待好友。（http://www.openrice.com/restaurant/commentdetail.htm?commentid=2330689）今回港島區代表高高Uncle同樣以「五行」取題，由JW萬豪酒店中菜廳大廚葉國輝師傅操刀策劃及烹調一頓「五行素食宴」，實行黎一個大比試。小肥覺得兩區代表各有各精彩，前者剛，後者柔，剛好形成一個太極八卦陰陽對比，可謂豐富絕倫，有意思得很 ！JW萬豪酒店地點真係好方便，金鐘地鐡站一出，經太古廣場乘坐升降機就可以直達酒店；駕車人士如消費滿$500更可享有三小時免費代客泊車服務；酒店正門搭扶手電梯落一層就喺萬豪酒店中菜廳入口。素食宴當晚，萬豪中菜廳全廳滿座，好在餐廳樓面高，地毯又吸音，行入去一啲都唔覺嘈吵，更何況高高Uncle一早訂咗間房，其實出面再嘈都唔會影響到我地。雖然話喺間房入面，大廳又咁爆，服務生理應忙到冇時間招呼我地，但酒店似乎人手充裕，房中可長期有位極為有禮o既姐姐仔同哥哥仔輪流負責斟酒、加茶、換碟、換毛巾、分餸等，細心周到。客人入
JW萬豪酒店地點真係好方便，金鐘地鐡站一出，經太古廣場乘坐升降機就可以直達酒店；駕車人士如消費滿$500更可享有三小時免費代客泊車服務；酒店正門搭扶手電梯落一層就喺萬豪酒店中菜廳入口。素食宴當晚，萬豪中菜廳全廳滿座，好在餐廳樓面高，地毯又吸音，行入去一啲都唔覺嘈吵，更何況高高Uncle一早訂咗間房，其實出面再嘈都唔會影響到我地。雖然話喺間房入面，大廳又咁爆，服務生理應忙到冇時間招呼我地，但酒店似乎人手充裕，房中可長期有位極為有禮o既姐姐仔同哥哥仔輪流負責斟酒、加茶、換碟、換毛巾、分餸等，細心周到。
客人入座不久，主人家隨即邀請葉師傅入房為其設計o既「五行素食宴」介紹一番。葉師傅簡單地道出，據中醫典籍「黃帝內經」所記載，「五行」其實係對應著人體o既「五臟」，配上「五色」食物可有效地作食療保養之用，下列為師傅所提到o既「五行」，「五臟」及「五色」之配對關係：
「木」對「肝臟」，配「綠色」食物（如青瓜）
「火」對「心臟」，配「紅色」食物（如杞子）
「土」對「脾臟」，配「黃色」食物（如黃豆）
「金」對「肺臟」，配「白色」食物（如杏仁）
「水」對「腎臟」，配「黑色」食物（如芝麻）
此外，人體「五臟」猶如「五行」般互相關連，取屬「火」o既心臟為例：因為「木生火」，如果心臟弱，除咗要以紅色食物保健心臟，同時亦要食多啲綠色蔬菜令屬「木」o既肝臟強壯；相反黎講，正所謂「水克火」，如果心火盛，則要以黑色食物增強屬「水」o既腎臟作為調和及平衡。
飯局中賓客多為三高人士，即膽固醇高、血壓高、血糖高，大家聽得入神之餘，當然係非常期待葉師傅o既晚宴傑作啦 ！師傅話，食療中之「五行」以「木」為首，故此素食宴亦由保肝o既綠色佳餚作起點，再以五行相生次序把菜式舖排成一個咸味循環，最後則呈獻五色甜品拼盤作為甜味循環作晚宴之終結。
頭盤「萬豪獻萃」中有三小碟冷盤，用木tray上，骨子得黎又襯托埋食品對應著o既五行，即「木」，真係好有意思！三款冷盤主材全為綠色o既蔬菜，有保肝之用，師傅建議大家由左邊味道較淡o既波菜百頁卷起食。「萬豪獻萃」之波菜百頁卷（木）：百頁卷味清爽脆，餡中除咗有波菜絲，仲有紅蘿蔔絲，師傅將一綠一橙o既蔬菜絲卷入百頁中，砌成太極八卦圖黎配合個五行主題，第一道菜已教人連聲讚好 ！
「萬豪獻萃」之柚子汁石榴帶子（木）：帶子質感幼嫩，配上清脆o既石榴，同埋酸酸甜甜o既柚子汁，口感豐富得黎好醒胃。
「萬豪獻萃」之青瓜拌花蛤（木）：青瓜蒜味香濃，又夠爽脆，味覺上絕對係主角，而味淡o既花蛤則淪為陪襯品 。諗深一層，師傅依個舖排其實好有心思，因為「木生火」，食完綠色o既食物就輪到紅色，火紅色o既花蛤正正成為「木生火」o既轉捩點。
杞子桂圓燉花膠（火）：花膠杞子湯用上湯做底，一滴油都見唔到，既健康又得體！此外，紅色o既杞子同龍眼肉o既甜味清香濃郁，上湯又唔會過咸而奪走前者之清甜，兩者毫無衝突，有如太極中陰陽調和般，妙哉 ！
鮮豆漿浸斑片豆苗（土）：豆漿雖然係白色，但其實係由黃豆所製成，即為黃色食物，所以屬土。講真，小肥從來都冇諗過豆漿可以用黎浸魚肉 ，個人覺得個概念其實有少少怪，哈，不過食落又OK wor。用豆漿浸住o既斑片意外地一啲都唔嚡、唔老，肉質可以話係出奇地幼嫩，咸豆漿湯味道好輕好清，且唔油膩，飲落潤滑得好似同個喉嚨敷緊mask咁 ！
XO醬淮山百合炒鮮鮑（金）：所謂「土生金」，師傅以黃色屬土o既雀巢盛載住白色屬金o既菜式，用食材描繪出兩行相生之關連，真係別出心裁 ！原隻鮮鮑軟腍得黎帶點煙韌，師傅所用o既XO醬份量啱啱好，唔會太辣之餘，又唔會蓋過鮑魚本身o既鮮甜味，配上屬金o既淮山百合及其他蔬菜，菜式整體非常香脆野味。
咸肉五穀米炒飯（水）：醫學小常識，五穀米纖維高，營養價值較白米更加豐富，不過飯粒較嚡同粗，而且如果進食五穀米時咀嚼得唔夠，絕對係會令腸胃不適；食五穀米最健康o既食法係要溝埋白米一齊食，咁樣腸胃會容易適應啲。五穀米同白米本身冇乜味，所以師傅炒製時加咗咸肉同粟米粒以作調味及增強爽脆o既口感。要讚o既係此道無蛋炒飯毫不油膩，乾身非常，入口一啲都覺得飯粒粗糙，連同咸肉及粟米做到好夠香脆，咁健康美味o既炒飯XO仔都係第一次食到，真係教人拍案叫絕！
食完一round五色五行素菜，當然係輪到甜品出場啦！甜品同樣地有五款，款式對應住五行及五個代表顏色，以拼盤呈上，每款都係用杯仔上，杯仔就如餐單所示般排列成圓形，表現出五行相生相連，循環不息。所謂「水生木」，新o既五行甜品循環亦要由屬木o既青色密瓜開始食起。
五行甜品拼盤之密瓜雪葩（木）：密瓜雪葩味道甜得黎唔會過火，而且唔會封喉，好清涼，因為雪葩最快溶，先食都好合情理。五行甜品拼盤之草莓果涷（火）：草莓果涷味似羅拔臣啫喱，好清甜，最緊要係一啲都唔酸 ！
五行甜品拼盤之豆腐布甸（土）：從布甸o既質感可以食得出豆腐布甸真係用黃豆生磨而成，微甜o既味道亦非常清新。五行甜品拼盤之淮山百合涷（金）：五行甜品中依味最唔啱小肥口味，因淮山百合口感較嚡，味道較淡同「齋」 。
五行甜品拼盤之蜂蜜龜苓球（水）：細細個成日聽啲大人講，食龜苓膏好，滋陰、補腎、去暗瘡，似乎真係有根據架bor，因為咁啱同葉師傅一開場提到o既黑色食物有補腎之效不謀而合 。甜品拼盤中大小雙肥最愛此道龜苓球，龜苓球滑溜彈牙，配上香甜o既蜜糖簡直係冇得頂，成功地為素食宴劃上一個完美o既句號 ！
近住年尾，高高uncle都百忙中抽空安排咗一頓「五行素食宴」，與一眾三高好友一邊品嚐美饌，一邊分享中醫食療心得，小弟有份參與其中，深感榮幸萬分 ！萬豪中菜廳地點方便，餐廳衛生寬敞舒適，服務生亦親切體貼。最值得一讚再讚o既係大廚葉國輝師傅o既心思細密，以及知識廣博；佢能夠將中醫學上五彩繽紛o既食材融匯成別出心裁而又美味美觀o既中菜式，再加以設計去配合五行五臟相生論、太極陰陽論等哲理上，實在令人嘆為觀止 ！食客能夠健康用膳，同時又可以增進對中醫食療o既認知，小肥覺得餐廳應該考慮將此份餐單正式列入餐牌內，起名為「五行食療宴」或「五行素食宴」或「五行食療素食宴」，並以中英雙語加插說明，相信無論係本地或海外客人都會大受歡迎！
張貼
