店鋪10:30先開門，我哋10點到已經見到有人排隊，好在早到拎定飛，未夠10:15分已經表示已full😛 早起的鳥兒有蟲吃，如果大家想朝聖記得要早啲到/一早book定枱。
店舖唔算大，裝修非常別緻，充滿濃厚嘅中國色彩。我哋雖然2個人，但竟然安排去一張大枱，原因係因為佢哋不設搭枱，可見店主對服務質素有一定堅持👍🏻
4
茶位要$18位真係好貴，但原來選用嘅茶葉都好講究。我哋隨便叫左水仙，飲落先發現同平時酒樓飲嘅水仙完全唔同。翻查先知原來佢哋選用左老欉水仙，而且係經過烘焙，有濃厚嘅煙燻木香味，甘香細味👍🏻👍🏻
第一叉 （半份）$158 👍🏻👍🏻👍🏻👍🏻👍🏻
招牌菜果然係名不虛傳，從來未食過咁好食嘅叉燒🤤🤤🤤，肥瘦適中，肉質淋滑，纖維細緻。叫第一叉係因為豬肉挑選咗「第一刀」嘅部位。所謂第一刀係指豬隻被送到豬肉檔時，第一刀斬落去嘅豬肉，亦即豬嘅頸椎、豬頭對下嘅一小部分，又名為梅頭咀，一隻豬只有一塊，非常矜貴。再加上香甜嘅蜂蜜作為蜜汁，好味程度簡直係驚為天人，叫佢「世一」叉燒絕對唔過份。未試過真係要試吓！🔥🔥🔥
1
2
鮮筍蝦餃2粒（小點）$33 👍🏻👍🏻👍🏻👍🏻👍🏻
點心做得好唔好，睇佢個蝦餃就知。蝦餃皮薄餡靚，蝦肉飽滿爽彈有鮮味，絕對係出色。另外抵讚嘅係佢可以叫兩粒，啱晒兩個人。
鮮肉燒賣2粒(小點）$33 👍🏻👍🏻👍🏻👍🏻👍🏻
職員表示所謂「鮮肉」就係指選用左新鮮豬肉。我先醒覺原來平時一般嘅燒賣唔係用新鮮豬好肉架咩？😆 一食先發現，原來真係唔同架喎😳 肉質係特別爽彈有口感，再配合菇味濃郁嘅香菇，先發現原來燒賣喺可以咁好食😛
香茜牛肉腸（特點）$43 👍🏻👍🏻👍🏻👍🏻👍🏻
腸粉煙靭幼滑，牛肉配合大量嘅芫茜（我至愛），冇得頂。不過同行友人唔食芫茜，就覺得唔啱食了，唔食芫茜嘅朋友要注意。
意大利黑醋伴米茄子 $62👍🏻👍🏻👍🏻👍🏻👍🏻
米茄子同一般茄子唔同，多汁又軟嫩而且不帶草青味。茄子切開沾上炸粉酥炸，再配合甜甜酸酸嘅意大利黑醋，係勁。好。味。🤤🤤🤤
冰花蛋球（小點）$33👍🏻👍🏻👍🏻👍🏻👍🏻
啲個又係必叫，其實即係沙翁。侍應剪開四舊之後，其實每一邊係等於1個完整嘅沙翁，份量非常之大，建議4人食😆 而呢個沙翁係我食過咁多沙翁當中最好食，蛋味超級香濃，外層鬆脆，內層軟熟，正👍🏻
懷舊煎糯米雞(特點）$43👍🏻👍🏻👍🏻👍🏻
一般糯米雞都係用荷葉包住嚟蒸，煎糯米雞第一次見，賣相都幾討好，侍應會幫你剪開四件。外脆內軟，糯米夠煙韌，餡料充足的，鹹蛋黃香甜，幾有特色。
叉燒餐包 （小點）$33👍🏻👍🏻👍🏻👍🏻
餐包係用左第一叉嘅叉燒黎做餡料，亦加入左少量洋蔥，口感豐富味道濃郁，唔錯。
煎韭菜粿 (小點) $33👍🏻👍🏻👍🏻👍🏻
厚厚嘅豬肉韭菜餡料，食落啖啖韭菜，兩面都煎得好香，唔錯嘅選擇。
總結：一星米芝蓮的確係當之無愧，比起同等係一星米之蓮嘅點心連鎖店，完全係唔同層次。第一叉必食，其他點心都係水準之上，服務亦都非常講究，侍應服務殷勤細心，質素拍得住酒店中菜廳，而價錢係非常相宜。下次要試吓晚市小菜！😎
食物：❇️❇️❇️❇️❇️
環境：❇️❇️❇️❇️
服務：❇️❇️❇️❇️❇️
價錢：❇️❇️❇️❇️
翻兜指數：❇️❇️❇️❇️❇️
1
1
