影片
介紹返💁🏻♀️。。🇭🇰 無限時雞煲火鍋 在屯門 🇭🇰。住家飯 HomeFood。屯景大廈地下C號舖。無限時 雞煲火鍋啤酒放題川味麻辣滑雞煲。大排檔奇味滑雞煲。台式三杯滑雞煲。港式咖喱滑雞煲。特濃沙嗲滑雞煲。星期一至四 - HKD158。星期五至日 或 紅日 - HKD178🤫 尋日腳仔又帶我喺大西北覓食..佢話今次要去食港式茶記地道雞煲火鍋..位位百六蚊有找唔使加一😳仲要係無限時任食😱本來聽到以上幾隻字嘅介紹個心都已經打定輸數..諗住係捨命陪君子..地方好可能會係大排檔坐街邊..好有風味唔太乾淨嗰隻🤪點知去到位於屯門市中心邊皮位嘅呢間住家飯又有啲驚喜喎🤩估佢唔到係一間地方好新淨企理..整整齊齊有卡位嘅茶餐廳～🤫 呢度雞煲有五種口味任君選擇..分別係標明辣椒仔嘅川味麻辣雞煲..仲有平時食雞煲好常見嘅奇味雞煲..聽到周圍每枱都叫嘅三杯滑雞煲..仲有比較少見嘅港式咖喱雞煲同埋我哋揀嘅特濃沙嗲滑雞煲～🤫 咁應該係因為佢哋呢度嘅滑雞煲寫明即叫即炒..所以雞煲上枱都需要用上五至十分鐘左右時間..期間我哋可以用QR code先落咗一啲放題任食嘅小食同埋飲品食住等..小食嘅選項唔算話好多..主要係兩種冷盤四種炸物同埋一個滷肉飯..個人就相當推介佢哋嘅即炸炸蝦片..雖然蝦片炸得有些少油膩..但係嗰個口感同平時街外邊買到嘅非常之唔同..成件事係香脆啲同埋味道濃郁啲之餘仲要厚實一啲..你見我全程三粒鐘Encore咗三次蝦片就知咩料啦😋🤫 其次嘅炸饅頭亦都係相當之吸引到我嘅..其實炸饅頭呢啲嘢都冇乜點..都係現成拎去炸嘅小食..我同飯腳仔最欣賞嘅都莫過於係佢哋即叫即炸新鮮滾熱辣脆卜卜咁樣送上嚟放入口..所以明知係飽肚嘢都忍唔住要食返兩件過吓癮😏🤫 再嚟就係今餐嘅其中一個精髓～特濃沙嗲滑雞煲🥘首先個煲一上枱就聞到好香嘅沙嗲味..嗰種沙嗲味絕對係平時食開沙嗲牛肉嘅香濃版本🤤數吓手指..喂Siri都應該係我喺香港食過嘅雞煲裏邊數一數二好味道嘅👍🏻🤫 然後雞件嘅份量相當之多..件件啖啖肉之餘仲要係真心嫩滑..我好鍾意佢哋呢度雞煲係有用咗一啲生菜粉絲金菇洋蔥等等嘅蔬菜類墊喺雞煲嘅底部..食起上嚟可以一啖雞肉一啖菜咁樣減少油膩嘅感覺之餘..沙嗲醬汁嘅味道更加能夠喺蔬菜同埋粉絲上邊發揮得淋漓盡致🤫 由於我哋只係兩個人開餐..就唔似得旁邊嘅其他食客咁樣能夠瘋狂Encore個雞煲..所以喺K.O.咗成個雞煲之後..我哋就立即同夥計阿姨講話要加湯轉戰沙嗲湯汁嘅邊爐火鍋..而呢度最正最地道嘅都莫過於係佢哋嘅嗰個相當之傳統嘅Gas爐同埋用一隻大碗裝住晒所有你Order嘅邊爐食材嘅呢一個畫面..真心呢一種風味基本上已經喺香港絕跡咁滯..我懷疑而家嘅Gen Alpha可能根本唔知乜嘢為之Gas爐😳🤫 講返個正題先..火鍋配料大概有五十幾樣嘢揀..最普通嘅豬牛羊雞呢啲就實有㗎啦..丸類雲吞類夾夾埋埋都有十種揀..蔬菜仲更加有十五種之多..雖然全部都冇話係一啲咩極之特色嘅選項..但係個人就覺得百零蚊嚟講真係比上不足比下有餘..完全冇嘢可以挑剔👍🏻最緊要係呢度竟然有揀飲擇食之王飯腳仔最鍾意食嘅通菜..呢件事基本上已經攞滿分💯🤫 至於要數我個人最推介嘅都有幾項..第一個翻兜必食嘅就係佢哋嘅特級牛丸..飯腳仔話呢度呢個牛丸媲美香港出名嘅振興牛丸..佢係嗰種極之彈牙而且入邊爆汁嘅牛丸..喺我食到最飽最飽嘅時候我都仲係忍唔住叫多兩粒就知道佢係勁嘢啦～🤫 其次就係佢哋嘅特級花枝丸都係好高水準..花枝丸口感彈牙就唔再講啦..最緊要係粒丸入邊有好多真嘅花枝粒粒..成個味道都好濃郁🤫 然後呢度嘅鮮牛肉片都係相當推介嘅..尤其是係如果你同我一樣都揀咗特濃沙嗲湯底..因為只要落咗呢隻鮮牛肉片之後..平時常餐必食嘅沙嗲牛肉麵你就已經垂手可得啦😌🤫 火鍋配料除咗以上各種係相當推介之外..住家飯嘅水魷同埋鮮魚片都絕對唔可以錯過㗎～所謂嘅魚片其實係魚件至真😏每塊魚件都相當之厚身好肉而且係冇骨嘅..三兩下手勢淥熟咗之後就相當之滑溜好食..水魷就更加唔使講啦..爽口新鮮好味道😉🤫 嘢飲方面..住家飯呢度亦都相當之有特色..絕對係時下連鎖式台式邊爐放題俾唔到你嘅～除咗佢哋主打嘅啤酒任飲有多個唔同嘅牌子選擇之外..更加吸引到我同飯腳仔嘅就係佢哋呢度嘅茶餐廳特飲..我哋都真係第一次喺放題打邊爐入邊一人可以飲到三四杯唔同嘅嘢飲..而且樣樣我哋都飲得好滿足😎我哋分別試咗正路波嘅凍檸茶啦..菊花蜜柚子蜜啦..仲有紅豆冰鹹檸七..同埋打卡一流嘅忌廉泡泡好立克..真係單係叫佢哋嘅嘢飲同埋食個雞煲已經翻咗本㗎啦💰。。翻兜指數：🙆🏻♀️🙆🏻♀️🙆🏻♀️ （5個🙆🏻♀️為翻兜爆燈）。。
繼續閱讀
住家飯 (屯門)屯門青海圍8號屯景大廈地下C號舖-真係估唔到仲可以搵返中學時代咁抵食嘅價錢，絕對稱得上「平、靚、正」！餐廳係典型平民茶餐廳風格，卡位夠多，坐得鬆動又舒服，完全唔會逼狹。 -川味麻辣雞煲雞件大大舊，啖啖肉都掛滿濃郁醬汁，麻辣鹹香勁過癮，完全入味！鍋底仲有洋蔥、蒜頭、辣椒等配料爆香，惹味到爆～重點係！！雞件無限任加，食得落就盡情喪食啦！ -小食有成8至10款小食選擇，款款都冇得彈～炸物即叫即炸，香脆熱辣，最邪惡一定係煉奶炸饅頭，另外仲有蒜香雞翼尖同肉燥飯，點忍得住啊？ -火鍋配料配料多到眼花繚亂，有齊各種肉類、蔬菜、麵食、丸類等等……食到呢度已經飽到上心口！ -飲品仲使講？已經回本，連港式飲品都係任斟任飲，爽到震！
繼續閱讀
屯門呢間雞煲嘅價錢完全係回到過去先搵到，味道仲要有水準，下次一定會再嚟。大排檔奇味滑雞煲佢哋嘅雞係即叫即炒，上枱已經聞到好香，望落亦夠足料。味道方面個醬汁夠濃夠惹味，驚喜嘅係雞肉食落口感好札實，有嚼口而且雞味夠濃郁，同行長輩話應該係用走地雞。食完雞煲就加湯打邊爐，用qr code落單，配料種類非常之多，今次就叫咗美國雪花肥牛、西班牙豚肉片、花枝丸、特級牛丸、蜂巢豆腐同油麥菜。除非火鍋料夠多，仲有提供各式啤酒放題，咁嘅價錢咁多嘢食同飲，真係超級抵。住家飯 (屯門)屯門青海圍8號屯景大廈地下C號舖
繼續閱讀
勁多選擇 每日lunch想有唔同揀每個餐都包野飲同湯大部分$60以下 幾抵食夜晚好似主打抵食雞煲蒜香炒牛肉飯 ($52)D牛肉多到唔使錢咁睇落似肥牛 不過又唔算好多筋又唔係好多脂肪位 所以都幾好撈埋d椰菜炒勁惹味香口不過當然一定係會油 飯底好多油😂但係好食 同埋勁大份 岩哂大食人士湯就每日都唔同 今日係冬瓜湯都好足料咁 不過厭佢太鹹 味精味
繼續閱讀
冇諗過屯門工廠區會藏住間咁正的雞煲火鍋放題， 雞煲即叫即炒，我揀左排檔奇味滑雞煲，蒜頭和洋蔥嘅香氣撲鼻，雞件嫩滑得嚟入味，雞件份量多又滑溜，醬汁濃郁好惹味，仲可以免費追加雞件，食完雞煲仲可以加湯打邊爐，一鍋兩食超滿足。放題配料多到嚇親人，美國雪花肥牛、西班牙豚肉片油花均勻，嫩滑雞件、鮮蝦水餃、香菇貢丸全部無限任點，連炸魚皮、孜然炸茄子呢啲特色小食都有，仲有迷你肉燥飯。放題包冰凍啤酒（藍妹、嘉士伯、健力士），仲有奶茶紅豆冰、忌廉泡泡阿華田呢啲即制飲品，食雞煲配凍啤真係正。
繼續閱讀