越瀧棧

營業中

休息中

入粉嶺做完嘢，發現左一間越南菜餐廳唔錯，打包D嘢返屋企食。香茅牛肉紙米卷：顏色好睇有紅蘿蔔、青瓜、白色粉絲、新鮮菜、褐色牛肉，包得好紮實，個個都脹脹啲好飽滿，米紙口感煙韌，薄得晶瑩剔透，加埋酸甜汁酸酸甜甜好清新爽口。越式酸辣無骨鳳爪：鳳爪好彈牙，呢個汁同中式酸辣汁唔同，唔止酸辣仲有甜甜嘢，配菜紅蘿蔔白蘿蔔都醃得入味，酸酸辣辣甜甜咁好開胃。越式醬烤骨：份量十足，酱香濃郁，肉质酥爛可口，返到屋企仲熱辣辣。珍多冰：質感爽滑味道香甜。

朋友住附近，但有BB既關係，依然唔方便外出用餐，作為朋友，當然要體諒喇~所以買外賣上去一齊享用吧~見到餐廳於戶外有2張枱，應該係方便帶寵物或吸煙人士吧~入到去表明係外賣，店員都好NICE，招呼我坐低慢慢睇MENU~估唔到店仔細細，MENU有如此多ITEM，睇到D圖都流口水~越式扎肉炒金邊粉($65)~扎肉切了粗片，很有口感，而且調味方面酸甜味適中，加上花生碎及其他脆口佐料，YUMMY YUMMY!香茅雞扒撈檬($52)~撈檬用到既汁料酸酸甜甜的，非常開胃，香茅雞扒亦都惹味非常，要讚美廚師既香煎技巧，外脆內嫰~春卷湯檬($48)~春卷係越式傳統美食，它用米紙來包鬆脆程度與別不同，而湯底好清，相信係精心肴制出嚟，CP值非常高~香葉肉碎生菜包($78)~肉碎炒得非常香口，應該仲加咗D越式香料，特別惹味，菜葉好乾淨而且脆口食得出好新鮮~

粉嶺好近我啊其實黎到搵朋友時食呢間佢介紹既計下都好耐無食越南野啦朝早好餓所以點多少少野佢地出餐效率好高架杯奶茶好好飲唔會奶多茶少又夠滑粉既份量俾足你🤣🤣 小鳥胃既你記得叫少粉春卷脆卜卜裡面係芋頭加豬肉，香上加香架無骨酸辣鳳爪超級醒神開胃酸度夠辣度勁好鬼過癮啊下次再食埋佢地既生牛肉聽到隔離枱女士講話：啲生牛肉好好食引到我呢～而且價錢一啲都唔貴！仲有極多款式任選外賣堂食都係好好既選擇黎我仲打包左份返屋企俾屋企人😬😬

越瀧棧粉嶺聯和墟聯和路3號富貴樓地舖今次黎到粉嶺既越瀧棧，環境別緻，用藍色歐陸式既牆磚，越南風味得來有帶點西化，適合打卡。😆😆生牛肉河（雙拼豬扒）$50+6厚切豬扒夠晒大塊，而生牛肉同預期一樣咁爽口，份量多夠晒抵食又好味🥰🥰豬頸肉撈檬 （雙拼春卷） $58+6係傳統嘅越南撈檬，加埋啲撈檬汁就夠惹味，另外春卷都幾特別可以一試👍🏻👍🏻椰汁冰 三色冰 各+$10椰汁冰同三色冰都係東南亞嘅飲品，發揮還好。😚😚

今日行開粉嶺聯和墟見到好多不同既餐廳，由於好耐冇食過越南菜，去到越瀧棧見到餐牌抵食又覺得啱口味，所以就買外賣返屋企同老婆仔試一試。香葉肉碎生菜包：香葉肉碎炒得好有火候，干身得黎又唔油膩，而且香葉新鮮帶出好清新既味道，辣度又剛剛好包起生包黎食真係一流。青咖哩雞件：越式咖哩有別於泰式咖哩， 越式咖哩沒有泰式咖哩哪種辣法，青咖哩加上一些越式調味清新得黎又有辣味，雞件好滑，青咖哩汁配麵包食係絕配。香茅牛肉紙米卷：牛肉紙米卷加上越式醬汁有甜酸味又有香茅味，做小食一流。

踩單車去到粉嶺球場，見到聯和墟間平民價錢越南餐廳，連埋飲品都係大概50-70蚊一個餐，點知仲要係抵食夾大件。.海南雞飯海南雞配左油飯，飯大大碗，雞嫩滑重好大份，仲有油菜一碟，見到隔離位女士係咁望住我碟野又葡萄地討論，就知自己㨂岩左野食。.生牛肉湯河牛肉湯入味，生牛肉浸過湯之後無話變榎口，重點係最底既蘿蔔，又夠淋無渣而且索哂啲湯汁，讚。

朋友突然來電，叫我幫佢買個外賣。仲指明要去「越瀧棧」，因佢好想食越南嘢。 餐廳裝修簡單，以藍色為主，牆上掛滿越南掛畫。 越式拍青瓜$25青瓜配以蒜蓉，再加上酸酸辣辣醬汁，清爽開胃。 越式海南雞餐$60，包有主食、菜、油飯／白飯／湯粉（三選一）雞的份量都幾多，肥瘦適中，肉質軟嫩，加上秘製惹味越南醬汁，油飯粒粒分明椰漿味香濃，非常美味可口。 香茅豬扒撈檬$52豬扒份量多，再加上花生碎粒、青瓜、紅蘿蔔絲、香葱，檬粉，撈上越式酸甜汁，入口有花生香味，青瓜清爽，檬粉彈牙，真是又飽肚又好味。

自從去完越南之後一直對越南菜都有一個情意結原因是越南原來比想像中乾淨人亦很有禮貌於是我今天就即興地去買越南🇻🇳外賣回家吃一去到晚上七點多餐廳內的客人很多我點外賣等了大約十多分鐘就有了效率很高蝦頭膏海鮮炒飯飯很大盒飯粒是粒粒分明😱😱😱海鮮真的很多很豐富🥰🥰🥰🥰🥰而且無雪味每一口飯都有濃濃的蝦膏味越式網紋春卷這盒春卷不貴而且還有六條！網紋很美而且外賣到家仍是脆口每一條都不會有油膩感😆😆😆香茅豬肉紙米卷包得很扎實每一條紙米卷都有很多菜和青瓜絲紅蘿蔔絲和粉絲包得脹脹的很豐盛而且豬肉片也很大片新鮮的蔬配上豬肉十分清新加上酸甜汁很有夏天的感覺越式豬頸肉炒河同樣都是份量很多炒河上配以花生碎增加口感之餘亦能為炒河的味道昇華炒河料多蛋碎豬頸肉和蔬菜🥬都很多豬肉爽口不柴蛋香嫩滑值得一試🤣🤣🤣

早兩日喺粉嶺食嗰間日本野食完嗰陣出嚟見到隔離有間越南野山長水又遠咁入到黎就決定買外賣番去食！燒香茅豬頸肉 $52呢個超好食，大份夾抵食燒到個邊邊位好香脆肉質偏瘦，無肥膏係屬於有爽嘅咬口得黎，又唔會鞋口好有質感越式蒸粉包 $40印象中呢個好似比較少見所謂粉包其實我覺得係好似粉果但係係正方扁型嘅薄薄嘅粉皮入面包住嘅餡料有好多其中最突出嘅有馬蹄，蒜蓉, 豬肉超豐富嘅口感香葉肉碎煎蛋飯 $48嘩，呢個真係超抵喎除咗份量超多之外，味道都唔錯肉碎十分入面仲有滿滿嘅香葉味同少少辣，惹味非常仲有個雞絲紙米卷雖然無乜技巧可言不過包得都札實，菜都新鮮整體來講我外賣已經覺得好正大家可以bookmark定住附近或者入開黎真係好值得試

人地成日話呢頭好多野食, 今次特登黎睇下行下見到有越南野食, 最愛越南的我梗係要入去試一下但係今次太肚餓, 實在唔記左影相太失敗今次叫左兩個粉一個係撈檬, 一個係湯河一於試下乾同濕個分別講下呢撈檬先, 今次係叫左豬頸肉撈檬豬頸肉真係唔錯, 真係幾夠份量個撈檬汁都係唔錯, 酸酸甜甜, 唔會好辣撈左好多汁落去呢一個越南生牛肉湯河當然喇, 第一樣試就一定係個湯呢個湯係深色, 真係夠晒濃味呀我係幾鐘意的, 我相信呢到係用真材實料去煮!牛肉都係薄薄, 個湯岩岩好可以煮到熟晒, 記得要快D食!呢到可能係遠少少, 但食到都高質食物, 遠少少我自己毛覺得值得去試下

早幾日係聯和墟食左間日本餐廳「瀧之亭」，離開餐廳時發現係正隔離有間越式餐廳，所以過兩日老公決定收工去買外賣返嚟試一試。老公總共叫左四樣食物，有蒜香牛油雞翼（6隻）($68)，熟牛肉河($50)（其實我地都鐘意食生牛肉河多啲，但想俾兩個仔仔試埋就叫咗熟牛肉河），海南雞飯套餐($60)同埋香葉肉碎煎蛋飯($50)。先黎蒜香牛油雞翼，剩係聞都聞到好香牛油味，雞翼本身又夠大隻，又炸得好脆，做餐前小食就啱晒，小朋友都岩食👍🏻。熟牛肉河，外賣時會好細心咁分湯，避免浸到啲河粉脹晒，個湯底好清，唔太咸，牛肉都好好味，唔會咬到痴晒牙，老公係牛魔王😂，差唔多一個人食晒成碗👅。海南雞套餐可以揀油飯同香飯，我地梗係揀左油飯喇，個餐仲有油菜同凍熱飲送，真係抵食😍。海南雞好滑，口感好好，雞醬好惹味，酸酸辣辣咁，唔覺唔覺又食晒個飯🤤。最後就係香葉肉碎煎蛋飯，肉碎就係主角，餐廳一啲都唔孤寒，一打開個外賣盒就見到塞滿晒肉碎😱，拎黎撈飯一流💯。總結就係我地三個人加兩個小朋友係清晒所有食物😜，可以講得上個一間幾好食既餐廳，下次就番老公放假就黎試埋個堂食先。

今日開車經粉嶺，聯和道呢條街比較易泊車🚗所以就泊低試下呢間越南餐廳，見有越南湯河、小食，清清地。豬頸肉金邊粉湯河: 入面都有6片豬頸肉，豬頸肉唔會整得好重味、淺淺地色，食落清清地。個湯幾好味，無咩味精，飲完唔會話口渴蒜蓉包（3件）：個邊整得好脆🤤中間都幾軟身，蒜蓉都夠，所以都幾香口，幾有驚喜👍越式拍青瓜：食落好爽口，應該係即整，調味同中式既拍青瓜都有d似，略嫌少少偏鹹越南冰滴☕：呢到真係有埋越南滴滴壺係面前滴，好有feel😂有埋煉奶係入面，真係做到越南咖啡果種甜甜地、好香濃既咖啡👍

同事話粉嶺聯和墟有間越南菜不錯，剛巧經過,可惜無位，唯有外賣。餐廳環境設計幾越式，可以見到茅草帽，壁畫。不消10分鐘，有得取。為保持食物美味，蒜蓉包和春卷的外賣盒會小孔。香茅雞扒撈檬朋友話香茅味香噴噴的，雞扒幾大塊，香嫩，檬粉口感唔錯。越式咖哩雞扒飯咖哩汁雞扒和白飯🍚分開裝, 咖哩汁香辣，微辣好適合我。雞扒已剪開幾細塊，廚師細心體貼，肉嫩汁香。蒜蓉包和春卷有三塊,外脆內軟，蒜蓉味撲鼻。春卷外脆，餡料夠香。整體而言，環境食物不錯，價錢吸引。

今晚要去大埔交收，去完返返屋企都夜煮唔切飯，聽日又要早起返工，經過見到呢間越南餐廳，就諗住買個外賣返屋企快快吃佢餐牌上邊重有好多嘢食，但係我哋只想快，唔想慢慢揀，所以叫咗個二人套餐A,唔使諗食乜一個set都包咗好多嘢食香茅雞中翼炸得記脆口，唔燶，有淡淡的香茅味，咬落都唔乾扎肉紙米卷男朋友係因為呢個紙米卷而選擇呢個套餐，佢話係手工野，要自己包的。睇相都見到佢幾足料，入邊有塊紫蘇葉，所以食落香香的，點埋個酸汁幾開胃相信嗰餐大部份嘅價錢都喺呢兩隻蝦度。一打開個盒好香牛油味，食落啲蝦肉結實，應該係新鮮蝦黎，蝦腸都清埋。加埋䓤同蒜好好食。我仲用咗啲牛油汁黎撈飯。蝦頭膏海鮮炒飯食落冇話好重口味，入邊有好多款海鮮分別有蟹柳，蝦，硯，魷魚，鳴門卷。海鮮份量好多，真係每啖都會食到海鮮。但我就覺得蝦頭膏味可以再重少少，而家食落去味道就比較清淡。馬拉盞通菜，通菜好靚，我覺得可以再重口味啲。腐竹雞蛋糖水好好食夠甜，腐竹味好濃，雞蛋液變成蛋花好欣賞

有一次去完粉嶺開工，就去咗粉嶺聯和墟搵食 。見到呢一間 《越瀧棧》 企理乾淨，啲二人套餐又抵食，就叫咗個返屋企同屋企人分享。呢一個二人B餐238蚊，有齊小食、主菜、同甜品。《香茅雞中翼拼越式炸春卷》 香茅雞翼返到屋企後仍然微暖， 用光波爐翻熱過後外皮脆卜卜， 香茅味尚算不俗。越式炸春卷酥脆十足， 點埋酸辣甜酸醋， 非常開胃。《青咖哩牛腩煲》 由於用上咗青辣椒，比起黃咖哩和紅咖哩，辣味較多， 但加入咗椰奶，中和辣度，椰香味濃。 牛腩份量足， 而且炆得夠淋，啖啖肉。另外仲加入咗青咖哩必備嘅長青豆以及泰國茄子， 我最愛就係加入咗九層塔葉， 令到整個青咖哩香氣十足。仲配埋《薄餅》， 薄餅翻熱後更加有酥脆香口，可以點埋啲咖哩汁。 《馬拉盞炒時菜》 選擇咗菜心， 馬拉盞鹹香十足，又夠惹味， 菜心新鮮，翠綠又爽口。最後食埋個熱辣辣嘅《腐竹雞蛋糖水》， 糖水甜度適中，有埋蛋花滑捋捋， 飲埋真係飽曬。