平時都鍾意每過一排就回訪啲好鍾意嘅餐廳，其中一間口袋清單就係安平燒肉，辛苦完一個月梗係要食餐好慰勞吓自己，今次就揀咗M5和牛套餐，係有成104款嘢食！ ！食完之後覺得...過一排好快又會再嚟 今次都同之前一樣揀咗幾日精選同大家分享~ -肉類- 牛舌芯同薄切牛舌: 兩款都好鍾意，兩種唔同口感，但係都係爽彈為主 美國SRF 極黑牛: 牛肉入邊最鍾意呢款，因為有齊油脂，牛肉香，又軟熟 山椒牛柳丁: 我好少鍾意預先調味過嘅肉類，但係呢個真係好好味，通常一口牛煮得唔好就會好韌，呢隻完全冇呢個問題，調味又啱啱好 牛仔骨: 一啲根都冇，而且好易咬開，好淋 -海鮮- 帆立貝同生蠔都幾好，雖然唔係話好大粒，但係feel到都新鮮，肉質都係彈牙 -小吃- 最鍾意呢度就係有無限咁多小食！鹽酥雞、澎湖花枝餅、安平炸蚵卷，點解每一樣上到枱仲咁熱辣辣！ ！我自己就最鍾意黑松露安平腐皮卷，同埋黃金泡菜，encore咗好幾次

今次直係任你魚肉7小時，近排發現咗間嘢除咗雞煲同打邊爐任食之外，竟然有豬手煲、牛尾煲、烤魚，全部嘢都係任食！我本身就比較細食，淨係試咗雞煲同埋打邊爐 雞煲有幾個辣度揀，就算食完第一次加煲都可以轉辣度，呢樣我係覺得幾貼心嘅，上到枱店員仲會將個雞煲快手兜一兜，令到個雞煲整體更加惹味。 另外嗰幾樣我就冇食，因為想放多啲quota喺打邊爐，不過以我所知佢哋嘅烤魚都做得好好味，有兩種魚可以揀，重點係可以任食，幾個朋友或者大食嘅都可以嚟挑戰吓！ 湯底我哋就揀咗胡椒豬肚雞湯，睇色澤就知道幾濃味。呢度最高質嘅係牛肉，幾款都好值得encore，安格斯封門柳、牛板腱，兩款都好好味！ 其他重點推點推介有牛栢葉，新鮮海蝦，蜆。自助區、飲品區同雪糕區都有好多選擇添~ 比較特別嘅仲有好少見到放題類打邊爐嘅醬料係每台都有自己一set，非常企理乾淨

可能係我喺香港最鍾意嘅打邊爐~ 一啲都無誇張，唔講食物先，由前菜開始，去到飲品、甜品，全部嘢都勁有心思，店員又Nice，收費又公道，應該好快就會回訪 首先講吓佢個玩法先，一坐低就會上咗前菜先，其中最好味嘅係炸雞軟骨，唔講以為係付費食品，超好食！ 除咗前菜之外，每人都會有一個頭盤，頭盤可以揀龍蝦/ 生蠔/ 佛跳牆/ 雞煲或者酸菜魚，我就揀芝士焗龍蝦同埋佛跳牆，隻龍蝦份量完全大過我隻手板，肉質彈牙新鮮 佛跳牆都唔輸蝕，熱辣辣有足料，個湯超鮮甜，依家打緊篇文都有啲掛住 去到真係打邊爐，海鮮拼盤同埋牛肉拼盤係限咗份量，海鮮真係好新鮮，上到枱都係仲郁緊，我自己最鍾意鮑魚同埋蟶子，兩款都係超級鮮甜，果然新鮮嘅海鮮唔使搞啲乜嘢花臣。 牛肉我都唔知邊款打邊款，不過整體都中上，同任食嗰個冇得比。 個湯就嗌咗大排檔豬骨湯同埋沙嗲湯，豬骨湯胡椒味好重，越食越過癮，沙嗲湯夠惹味又唔會太濃太鹹

食咗間好適合幾個朋友傾計，質素又唔錯嘅韓國餐廳，有幾個包廂有埋簾，私隱度極高。有啲套餐裏面菜式係超級多，三四個一定夠食，可以試晒咁多款嘢食，食完一定捧住個肚走 Eat at Seoul $985 Appetizer 韓式前菜: 有足足8款咁多，一定有一款啱口味 醬油帶子配紫菜: 粒粒彈牙，圓軲轆脹卜卜，夠入味 醬油蝦: 每隻都有手掌咁大，非常多膏亦好新鮮 Main 安東燉雞: 連埋火爐上，冇諗過套餐都咁大份，食到最後都熱辣辣 牛肋骨: 又係連埋石頭，超有誠意，望落肉質好結實，但係咬落淋滑，蘿蔔都好入味 Snack 海鮮煎蔥餅: 未見過咁足料嘅煎餅！最特別係有好多魚乾仔，令到海鮮味更加突出 首爾蒸餃: 我當佢係一個過場，中場休息嘅時候食一隻餃子唞唞 韓式甜辣炸雞: 醬汁包裹仲每一嚿炸雞，但係又不失香脆度 另外仲試咗兩杯Cocktail，分別係See You $108同 Snowing Night $118，兩杯都好似果汁咁好飲咁易入口，少有飲到啲韓式調酒咁好味

今次想介紹間好有心思嘅天后小店比大家，相信大家去日本都食過吉列豬扒丼飯，店主好有心機咁樣將起福岡食到呢個飯嘅感覺呈現比大家，不論係食物嘅質素、環境、用餐體驗，同店主傾計，知道佢細心到將食具器皿等等都喺日本帶番黎。知道佢哋嚟緊仲會有新產品，大家都可以留意吓 黃金黑豚豬扒Pan丼 $98 我諗嚟呢度嘅每一個人都係想食呢個，佢最特別係連埋成個鐵pan上，等你影完相再倒落個飯度慢慢食，為咗營造一個超級滑蛋嘅感覺，偏向多汁水潤。不過最難得係個炸豬扒，炸到金黃鬆化，放喺滑溜蛋汁上面都唔會變腍 星嵐雞肉咖喱湯烏冬 $$98 重口味人士之選！ ！嫌親子丼太清淡嘅朋友仔，一定要試呢個烏冬，烏冬扁而淋身，係超級掛到個湯，連埋啲咖喱，濃到似醬汁多過似個湯，勁惹味

上環都算一個其中一個幾多隱世小店嘅地方，今次黎到畢街食泰國嘢，其實佢仲有越南、台灣、日本嘢食架，見到放工時間都好多打工仔過嚟食，最出名就係佢個超巨型炸雞髀，基本上每枱都會見到 👸炸雞髀配泰式冬陰功米粉 $84 係超級濃湯，酸味非常突出，香料味好重，米粉掛哂湯，一次過食入口，好惹味，每啖都激發到味蕾！炸髀唔使我講就知大隻，皮薄肉嫩又多汁，啖啖肉大滿足 越式香茅葱油豬扒煎蛋飯 $70 個豬扒好腍又入味，有香茅味得黎，又脆脆地燶邊咁，最緊要係個甜豉油加蛋汁，再加葱油，嘩一啖飯幾隻味，幾咁豐富 泰式炭燒豬肉串 豬肉嘅肥瘦分明，點埋醬汁又係好香，唔好以為豬肉就好鞋口，我敢講呢度嘅豬肉串係香港我食過最好味

- 今次介紹呢間簡直係牛魔王福音，兩個小時邊爐放題，俾你任食多種牛肉ssss，當然唔少得梗係無限飲品，同埋火鍋配料，咁我就整合幾款必食推介俾大家 牛肉黎講，無論兩個人嚟定係一家人一齊嚟，都會想一碟精選牛肉拼盤俾大家，睇吓自己最鍾意邊款，就再encore，我自己有3款特別深刻。澳洲M7和牛，油花十足，入口即化。封門柳肉味鮮甜，我個人最鐘意。牛板腱就牛味重得黎，又夠淋身。要爽口嘅口感就梗係要和牛金錢展 凍櫃嘅選擇都唔少，竟然有我打邊爐最鍾意食嘅芝士魚豆腐，唔係度度有㗎，見到即刻加20分。另外有大腸頭，洗得乾淨又唔會有怪味。仲有超級大粒嘅貢丸，同埋牛丸都係必食之選。補給庫嗰邊有粉麵提供，比較少見嘅係有銀針粉 講埋個湯底啦，我就揀咗唔使加錢嘅粟米豬骨湯，另外要加錢嘅，都仲有濃味少少嘅麻辣或者比較特別嘅肉骨茶，大家就可以豐儉由人

- 近排見到間正宗韓國菜，超抵食$158午市放題，無分ABC級，劃一價錢，有唔少肉類選擇，比較特別嘅係呢度有自家製麵豉辣醬，點肉食又得，加塊蒜片包生菜又得，仲有呢一間舖先特有嘅蔥沙律，真係只此一家！不得不提嘅係仲有單點醬油蟹同韓牛，想食得豪啲，記得要加 一開始餐廳會比一個韓牛九宮格盛盒，比大家打下卡，影下相先，再慢慢點嘢食，9款食物分別係: 肉眼粒，安格斯肥牛，五花腩，青衣柳，韓式辣汁豬頸肉，牛仔骨，豬梅肉，蒜香雞翼，牛舌腩，基本上每樣少少俾你試勻晒 不得不提喺QR code有得點雞腎，！ ！一定要叫呀，超級爽口 我就幾鍾意呢間餐廳嘅肉類唔會有過多嘅調味，反而仲有黑椒同埋鹽，更加有韓式嘅醬料，比你自己調味，唔會好快就食到好漏 出邊自助區嘅選擇雖然唔多但係講得出嘅正宗韓式食品都係有，例如泡菜年糕，韓式牛肉湯，泡菜湯，海鮮煎餅，泡菜煎餅等等，都真係過足癮㗎 環境都好闊落，就算兩個人都有好大張枱坐得好舒服，慢慢食。另外爐頭抽油煙機功能唔錯，食完繼續同朋友出街都冇問題

講到近排大熱嘅燒肉，一定非呢間露營主題嘅燒肉店莫屬，成間餐廳嘅佈置有齊帳篷、露營櫈、露營燈，連餐具同埋紙巾套都係露營用品。除此之外，成個環境都好有空間感，同其他人嘅位置有一定距離，食個燒肉都勁舒服，好Chill 其實之前有見過網上文章覺得呢間性價比好低，黎之前好擔心唔好食，但食物質素同價錢我覺得成正比，唔會話定價偏高，始終以地段，餐廳佈置，主題噱頭，食物小細節同服務，我覺得無嘢可以挑剔，個人覺得呢間係ATUM三間入面整體我會比最高分添~ 全牛特選拼盤 $458 拼盤包括牛肋肉、牛舌、牛胸腹、牛三筋、雪花牛小排，有選擇困難症嘅朋友仔都唔使驚，而且唔係每樣得一兩塊做下樣，自己最鍾意牛舌同牛胸腹 阿波酢橘雞腿肉 $78 雞髀肉醃製過，係超級超級入味！呢個入面仲有芫茜，平時嘅我好怕，但呢個我可以。燒完雖然唔算好juicy，但都夠嫩滑 鮮蜆 $58 呢個就算係所有之中較為失色，大小不一，食到好幾隻有沙 蒜蓉牛油金菇 $38 呢個組合就唔會錯啦，配料蒜蓉同埋牛油嘅份量一啲都唔吝嗇，燒完係每一條金菇都包滿調味，邪惡又好味 👸月見醬燒飯糰 $38 自己覺得呢個係餐廳必點！蛋黃汁勁香濃蛋香味，飯團兩面燒到微焦，入面嘅飯粒軟糯，每粒都包裹住醬汁，滿足咗食燒肉都想下carbs嘅慾望 海鹽菠蘿梳打 $38 食燒肉一定要食梳打Gur一Gur條氣！幾乎有菠蘿都會係我piority，呢個仲好有心思咁用咗海鹽圍住杯邊，又靚又好飲

上年試過呢間餐廳之後，一試難忘，仲記得第一次試嘅時候每一道都食到哇哇聲，一直念念不忘想再過嚟試下其他嘢。當中最好食嘅羊架今次就無食，試咗個新嘅豬鞍，亦都非常有驚喜 頂級牛板翼扒 原本好似無食過呢個部位，呢個位牛油脂最豐富，肉質非常柔軟，可以話係牛最珍貴嘅位，食落口感係勁軟熟，其實除咗油花豐富之外，牛味都好重。配菜嘅薯蓉都好棉密，係小小顆粒感都無 法式豬鞍扒 老實說，呢個比起牛扒更加有驚喜！之前已經知道靚嘅豬鞍，係唔需要食到10成，今次都係一樣，係大約7成，無諗過件事係可以perfect到咁，肉質出奇地比其他豬扒更加淋滑。除咗一般配嘅蘋果醬，仲有蜜糖芥末醬，減淡咗少少油膩感，增加咗啲刺激感 爆醬芝士熱菇熱菇 呢個前菜嘅芝士真係唔係係咁倚，啲芝士醬多到一切漏哂出黎，仲要有埋泡菜喺入面，又香又辣，愈食愈過癮！