花園餐廳 (石山街)

營業中

休息中

由細到大都好鐘意食花園餐廳，唔係話因為好食 而係因為情意結。知道西環開嘅時候本身勁開心，食過2次， 點知d員工勁冇禮貌，叫佢地係唔應人 望到之後走咗去？？？？最無語係有一次夜晚去 ，距離關門仲有兩個鐘，一入到去d侍應互望之後同我講收咗.原來佢哋係早兩個鐘last order， 好癲！總結就係m底先好去！！！

住喺附近，平時食開，知道啲侍應本身都西口西面，平時都叫忍到，今次真係好L嬲去到買單嗰時，因為從頭到尾都冇張單，我哋直接行埋去俾錢。嗰陣店面好少客，行到埋去，俾張卡俾收銀，跟住個收銀西面女人就咁問：點知你坐邊（總之用一種超冇禮貌嘅態度去講）成個體驗超差！冇下次。我直接喺佢面前講咁冇禮貌，佢冇聲出，後悔冇鬧多佢兩句見到其他評語，全部人都話呢間舖侍應個個都黑口黑面冇禮貌，睇佢幾時執笠，啲嘢食又唔係好食，做餐廳做到佢咁

一入到餐廳，無人招呼，咪自己行去自己想坐嘅位，就俾叫住，要坐去另一邊。單未落完侍應就轉身走，又無禮貌。未飲完嘅湯想收走，叫住佢，一句唔好意思都冇。。。全程侍應黑面，無禮貌，以為我得罪左佢，服務衰過茶記。餐包係唔暖嘅，湯無味，食物普通。新舖但係冷氣唔夠。唔會再嚟。

昨天下午特登去堅尼地城的花園餐廳食飯，服務員的態度真係世界級的差，我不停揮手，他們見到也𣎴理我，我忍唔住企左起身，大叫才行過來，真係不知所謂！垃圾級別的服務態度！

平民價扒房，味道是可以，尤是羅宋湯。大件抵食。只要不對服務有期望，以懇求的態度與服務員交流，便沒大問題。因為侍應叔叔由頭到尾不會有好面色，心理脆弱的人會誤以為是欠了侍應錢或誤以為自己是來討飯吃的。1.最好坐已執拾的枱，否則會聽到有人自言自語道『咁多張枱可坐，偏係要選張未執』。2. 叫人來執枱時，會有人大叫『等等先啦，咪催，落緊單』，其實個客見一路揮手但侍應沒回應，以為他們唔知啫。3. 到點餐時，寫下午茶加3元轉薯菜，侍應會說廚房大佬唔鍾意，叫正餐便有薯菜。。。。4. 如果想請侍應取水，他們不會揮手回應或答好或唔好，但之後會緩緩地給你水。大家最好自備開水。5. 有次落單，侍應叔落多了3杯凍飲，我們說是否落錯，侍應叔很不滿地拿走對單。原來他們自己落錯單也是客人的錯。6. 想問取茄汁，侍應會答「隔離枱咪有，自己攞啦」。7. 第一次結帳時，以為在桌上結，侍應只手指向櫃位便走開。但他們沒有放下點餐收據，到收款處老闆問邊張枱，仲贈返你一句點解會冇單，下次你叫侍應攞返啦，這樣搞會好亂嫁。

食左幾次，服務態度如一。今次新年期間去食，大部分侍應口黑面黑般，木無表情，一坐低餐牌都未睇已要你落單，好似唔好阻住佢咁，但其實無咩客。收銀阿姐仲衰，會俾說話你聽，單單打打。價錢徧貴，食物中規中矩，可惜西環少扒房，不過都未必會再去。食物中最期待都算係個餐包了，少少暖，夾啲牛油落去幾正。以前羅宋湯都好好飲，但現在已失色，扒就更不用講，都比以前差。一間服務水平比普通茶餐廳更差的餐廳，真心覺得他們怎可營運下去。

本身心唸都幾多待應, 但原來 10 個得 1 個係做緊嘢, 其餘 9 個最好唔好煩到佢哋落餐時要三催四請, 追個白飯都一樣, 個侍應企你隔離都可以扮睇唔到你, 望唔到你, 一句 “忙緊聽唔到” 就 ko 你嘢食其實不得不失, 仲有少少細個個陣嘅味道, 但係由於服務態度驚人, 應該係無可能再返去呢間, 或任何一間花園餐廳建議俾花園餐廳: 其實可以參考其他茶記咁用返個 QR code 落單, 簡單便利, 又唔洗請 d 又懶又黑面神既叔叔黎趕客可惜又一間兒時回憶毀滅了

其實西環仲有無其他地方鋸扒？已經唔係第一次嚟幫襯，每一次都係好受氣，呢度啲侍應真係當自己喺茶記或街檔到做（直依家啲茶記都好好服務啦）。由入座一下永遠無人理你，嗌極叫人執枱落單，喺旁邊行過都好似見你唔到，嗌多兩次就好似我做錯嘢咁訓示你「等一等啦」，俾個反應有咁難咩？

尋日食完一次外賣，今日諗唔到食咩，又再食多次。Order咗焗豬扒飯、焗肉醬意粉。焗豬扒飯好味😋，好食過大家樂好多，鍾意佢唔會太多番茄醬，豬扒唔會有炸粉👍🏻今日羅宋湯就差咗d，唔夠濃，希咗d，唔夠味。兩舊牛油熔哂，搽唔到餐包。凍飲就忘記我mark低咗走甜，因為太甜，飲咗一半就掉咗。另外，mark低唔需要餐具，熱飲走甜，最後都係有餐具有砂糖，又變成浪費。

第一次在花園買外賣（經openrice)，點了兩客焗魚柳飯，跟羅宋湯、餐包及飲品。回家發現其中一盒俾錯了焗肉醬意粉，但錯有錯着，個意粉好好味😋。相反，個焗魚柳飯就普通咗少少（正常雪藏魚柳咁啦），炒飯底不錯，另外餐包跟牛油，正常，同堂食差唔多。羅宋湯就好好味，夠濃！外賣熱飲走甜走糖都有跟足。👍🏻

【中西區】【花園餐廳】今次同浣紗娘嚟到堅尼地城食嘢，我哋喺呢頭都唔知食乜好，主要係我份人太麻煩，所以都係去呢啲傳統港式扒房簡簡單單攪掂件事就好喇。不過都係佢講我先知呢頭有花園餐廳，唔係真係鬼知咩，佢仲要喺一樓，更加隱蔽。然而入到去見到都幾新淨，可能新開或者新裝修冇耐，感覺幾好。我哋都係叫晚餐，浣紗娘叫 $108 嘅「鐵板紐西蘭肉眼牛扒拼珍寶腸」配薯菜，都係去花園餐廳成日會食嘅嗰款肉眼，感覺好似係呢度嘅經典菜式，成件事唔錯。而我自己就叫 $98 嘅「德國芥末豬手拼吉列魚柳」，上菜嗰吓忍唔住嘩咗出嚟。因為佢大份之餘，面頭仲加咗塊橙肉片，非常有視覺上嘅享受。而啲豬手本身食落都唔錯，好過本身冇乜特別嘅炸魚柳，而薯菜都係平時嗰啲。我曾經講過，去到叫嘢飲環節先係花園餐廳最期待嘅時間，之前叫「忘情森巴舞」都係咁諗。各加 $15 叫晒「雜果賓治」，無疑係一場賭博，因為我都係第一次飲，好彩最後都唔錯。兩個人夾埋食咗 $260，鋸扒嚟講差不多啦。。。（地址：西環堅尼地城石山街35號1樓）#1amfoodie #foodie #hkfoodie #thatfoodiething #hkfood #food

路過堅尼地城唔知食乜好原本諗住上去街市食嘢但係過馬路嗰時見到花園餐廳個招牌就上咗嚟因為有啲肚餓所以叫咗個肉眼套餐（唔係ABC餐嗰啲）另外加$15加多個炒飯湯方面我揀咗白湯味道同想像一樣冇乜味麵包就喺微波爐叮左幾下都叫做熱熱地肉眼扒嚟到果然分量十足淨係肉眼扒都有三大塊下邊仲有薯條蕃茄同埋少少蔬菜幫我仲諗緊點解佢冇叫我揀乜嘢醬汁嗰陣時就有侍應走埋嚟問我要乜嘢醬汁，可以揀黑椒汁同埋蒜蓉汁 咁我揀咗黑椒汁放啲醬汁淋落去咋渣聲嗰下真係鐵板嘅精髓雖然份量十足，但係味道同細個食嗰陣時係一模一樣㗎就係鬆肉粉嘅味道不過$100有咁嘅份量我都冇乜要求㗎炒飯雖然係普通蛋炒飯，但係其實有正常食飯碗三碗咁多如果大家對牛扒好有要求，其實花園餐廳絕對令你失望但係如果純粹以份量價錢未計，其實就正常

呢間野唔知係唔係做生意, 熟客, 你坐耐一陣個老闆會西口西面, 下午茶時間都無咩人, 應該生意太好. 應該生意太好, 附近有大家樂, 譚仔, 都好好招呼, 建議勿幫襯, 唔係佢會覺得咁無問題. 伙計, 都係無禮, 放屁, 無唔該. 講真, 食餐飯要受你氣就不如你自己食埋佢. 

今晚回到過去，點了海陸空三拼＋凍檸茶。塊扒一入口，心裡面即刻有 feedback:「呢D先係扒💯」。三拼餐的大蝦，不能求其俾隻蝦就算，要真係大蝦先好食👍🏻味道係100％三十年前的香港情懷。去其他餐廳食三拼餐，空軍一般都用雞扒， 但係佢哋用半隻燒乳鴿，呢啲咪真材實料囉。意粉係另外叫嘅， 獨立上， 乾身，熱辣辣，上枱仲見到有蒸氣散發出嚟。正！最後嗰杯凍檸茶，有鮮檸味，有茶味，有甜甜地的味道，是真的港式凍檸茶！

路過見樓面不差，所以入去試下，豬排唔好食，偏硬。麵包唔熱。 侍應無反應，無禮貌，其實都唔緊要，最弊係佢係檯隔離放屁。你想像一下， 你食緊飯有人係你碟飯放屁，其實佢可以除褲係檯邊痾屎。之後收錢都係無反應，do完比錢，o唔ok唔會講，六十幾蚊唔會期待有d咩酒店享受，但希望你地當食客係人，唔想做可以辭職，唔舒服可以請假，無話要令客人難受，如果你覺得錢少可以加價，無謂黑口黑面，叫你唔應，應左又無禮貌，尊重自己尊重份工。