長輩揾食飯，長輩好小食啲「古靈精怪」餐，不如傳統啲約佢食返啲酒樓，佢話想食龍蝦，咁記得n年前啲廣告乜乜大皇，好耐無去過，一於揀佢試試。 依家啲食肆由其係酒樓，真係好難生存，難得佢仲屹立倒，都真係有佢哋生存之道。 揀咗個上湯焗龍蝦（伊麵加$60）配蒸龍躉骨腩～呢set嘢龍蝦得二個做法，一係上湯焗，一係蒜蓉開邊蒸，其實二款都唔係好合我杯茶，夾硬上湯焗，唉～出嚟嘅味道真係嘛嘛，上湯焗真係唔夾龍蝦味，龍蝦又煮得過咗火，口感無咗爽嘅口感，而係太實，不過份量很夠。 蒸龍躉骨腩，正正常常，但食骨腩唔係個個人都啱食，下次都係正正常常蒸條魚。 馬拉盞通菜同埋乳鴿，馬拉盞通菜炒得唔錯，聽到馬拉盞一定會同泰菜比下去，覺得佢哋炒得唔錯，唔辣，味道夠之餘帶啲微甜～不俗。乳鴿唔洗講啦，依家飲茶隨時都係三幾拾一隻，二個人，如果叫半隻雞，好似會有啲過份，叫乳鴿當係打麻雀蹬腳咁，有啲肉咁嘅意思，唔太咸我已經收貨。 二個人，加埋一，$680，不過不失，話晒都有龍蝦同「魚」，唯獨是龍蝦選擇煮法太小，多啲選法咪好啲囉，唔洗浪費咗隻龍蝦。

母親節「探」完母親，順便去太古城飲茶，唔係好識呢度，問咗服務台，決定去「西苑」，此終係節日，等位真係在所難免，7個號碼等咗40分鐘～gogogo. 揀咗～鮑汁荷葉飯～鳳爪～牛肉～蝦腸粉～金錢肚～炸韮菜角。 Part 1- 等咗十五分鐘，出場嘅係～荷葉飯同炸韮菜角-荷葉飯打開其實都係炒飯用荷葉去包裝，不過不失，但又無荷葉嘅味。反而韮菜角入面好多料，除咗主角韮菜，仲有幾「舊」仔蝦仁同小小豬肉。 Part2-係食完以上，等到我以為漏單，成廿分鐘至到，當然你哋會話因為節日，但我覺得佢哋又無忙到好誇張咁，正常星期日忙吧，返正題，出場係蝦腸粉同牛肉，腸粉皮「幼嫩滑口」，蝦亦都大隻爽口，牛肉佢哋寫住100%純牛肉，但真係無驚喜同特別。 Part 3再等多成十分鐘至至，牛肚同鳳爪，正常味道。 叫埋單又等咗十分鐘，俾咭又等多五分鐘。 「舊式」～係咪=浪費時間，其實依家大多茶樓都叫客出去埋單，等嚟等去其實係咪浪費晒大家嘅時間？點心又出得慢，如果所有嘢都「現代」啲，大家係咪可以慳好多時間，你哋又可以做多幾轉枱，都唔知管理層點「計數」。 再講～你哋啲點心都已經唔係平！依家仲邊有酒樓放花生架？硬收$12。 結論：食材係新鮮，出貨同埋單慢，價錢偏貴！

出開尖咀識食梗係去海防道入面熟食中心揾食，遊客區平時食個午餐六七拾起跳，入嚟呢度豐儉由人，選擇都多。 去開果間食牛丸明明寫住星期日休息，但今日星期六喎⋯⋯點解⋯⋯？唯有食住對面頂住先。 我哋例牌叫淨牛丸，牛筋墨丸河。 呢度除咗本哋人，當然仲有大量遊客光顧，所以經常爆棚，但係就算點爆，起菜嘅速度依然好快。 牛丸～不錯，基本爽口彈牙 牛筋同墨丸河，份量小啲，但墨丸算俾到我驚喜。大牌檔此終都有一定嘅水準，亦保留傳統風味。 加埋二杯凍飲，埋單佰蚊零蚊，呢個時勢算係咁。 食完行左個圈，順便睇吓有乜其他好嘢食，𥄫到有間食豬扒飯嘅，塊豬扒大到呢⋯⋯預告定，下次再嚟呢度，一定試佢😉

呢間都算網紅店，好多人大力推介，嘅然今次過咗嚟路環市區呢度行，點都要試試。 因為剛食完午餐，所以唔敢叫太多嘢，一杯凍一杯熱咖啡，加幾隻雞翼就係咁。 凍手打咖啡，係軟錦錦咁，濃味帶小小甘小小苦澀味，但你話係咪好有或者好重咖啡味，我又覺得唔係，真係勉強收貨。 雞翼三隻一碟，下面有片面包墊底，雞翼Size真係細得可憐，好彩我剛食完午餐，所以無乜所謂。 喺路環市區仲要行一大段路至入到嚟，值唔值得就見仁見智，我呢～一次就夠。

依家媒體發達，好多時食店嘅資訊都係由短視頻睇完，然後「出動」去食下，呢間都係其中一間～通記。 都係去開旺角買嘢，順便去試吓佢哋嘅牛丸，十二點半到達，原來老闆至剛剛「拉閘」，叫我哋先入去座，諗住係頭籌，入到去原來已經七成滿座，揀好視頻內推介嘅食物，即時落單，由於剛開店，食物都等咗廿幾分鐘，利害嘅地方係好快爆棚，有人食完走，又有人入場，絡繹不絕～利害。 入返正題，叫咗～一碗牛筋牛肚河，淨牛丸墨魚丸雙拼，牛腩河同二支忌廉。 牛腩～炆得好淋好入味 牛筋同牛肚正常水準，不過份量很足 牛丸～一咬落去，好彈牙，同有種似曾相識嘅味道湧出嚟，好正。 墨丸都不俗，佢哋話牛丸同墨丸都係自家製，咁我覺得牛丸出色啲。 另一樣野係，如果食得辣，可以試吓佢個辣椒油，唔識形容果隻辣度，超辣？勁辣？不如叫超勁辣吧😂😂

今日特登去「姨媽」傢俬買個櫃仔同廚房用具，完成任務正直午餐時間，梗係要醫下個肚，當然「姨媽」入面都有嘢食，但我個人覺得真係嘛嘛，上次嚟「探路」，記得個food court 有日本麵食，今次嘅然再嚟呢度，點都要試吓。 間嘢好似叫樂拉麵～ 柯打咗一個～櫻海老拉麵 另一個～赤貓（辛辣） 小食～鐵板薄牛舌片同，唐揚魷魚鬚 櫻海老依個係有好多櫻花蝦（目測起碼3-4湯匙份量）加龍蝦湯，木耳同葱花，當然仲有幾片叉燒同流心蛋，櫻花蝦加上龍蝦湯二樣嘢撈埋一齊～飲啖湯先，濃郁嘅「蝦」味道衝擊味蕾，喺你嘅口入面一路衝到上腦～正！叉燒亦都係中上水準，呢碗麵整體對得住呢個價錢，當然如果叉燒多一二片就更加完美。😋 另一樣鐵板牛舌片～此終係小食份量唔會太多，呢味反而有驚喜～好嫩滑同口感很好，我會建議食咗呢個先，因為鐵板此終係熱，所以耐咗牛舌會「鞋」，效果會差少少。 魷魚鬚～唔知係咪炸燶咗小小，所以有小小苦。至於另一碗麵，我無偷食，所以唔知點，但另一半話味道不錯～至小佢其實唔食豬肉都清晒啲叉燒🤫，咁味道應該算不錯吧😅。

出旺角見完客，睇返「開飯」個「想去」List, 揀咗呢間飲茶嚟醫肚。 都係炸物行先～首選必定係春卷，跟著蝦腸，金錢肚，鳳凰糯米夾，上海粗炒，竟然有好得意嘅熊仔奶茶同冰鎮咖啡，最後叫埋粟茸西米焗布甸埋齋。 我唔會講蝦腸啲蝦有蝦味金錢肚有乜味乜味，我淨係想講所有點心係水準以上，係得個金錢肚奇怪哋甜甜哋同上海粗炒欠缺鑊氣同味度差啲～唔夠味，呢間係值得去試或者上去飲茶嘅好地方。 值得一讚係埋單時姐姐話，我哋叫咗咖啡同奶茶，所以茶費係扣翻嘅～讚！ 提外話，去過好多旺角嘅食市，可能由於（流量）大，又多（貴賓），好多洗手間都好污糟，呢間真係好乾淨，呢啲做得好嘅（幕後）功臣真係要讚下👍

一行三人，朋友小聚，友人推薦呢間，講真作為一個住喺九龍嘅人，九龍城泰菜真係食過好多間，今日就try try 佢⋯⋯ 鍾意食炸嘢，梗係首先選個：泰式拼盤，跟著冬蔭功，串燒～雞豬各半（無牛肉選擇），飛天芥蘭（因為無通菜），生菜包，二支象啤。 「全院滿座」，但由柯打到出菜速度不錯，首先出場係拼盤，炸物對我嚟講起碼要乾身無油立立，佢做到兼味道不錯，串燒正正常常不過係無牛選擇同好似細串咗，冬蔭功個人較為喜愛，可能味道啱我😂，生菜包反而一般，因為唔夠味同夠辣，整體水準以九龍城嚟計中上，但真係希望佢哋可以落小啲味精，好耐都未試過食完嘢咁口渴⋯⋯ 最後承惠～$600，都算合理價格。

行過見到，反正都要食晏～試試佢先！ 睇完餐牌，揀咗幾樣嘢： 一，越南牛河，選多一餸加$10 牛根同牛丸河粉，飲凍奶茶 二，馬來喇沙摻摻，選咗海鮮， 飲三色兵 三，咖吔多士餐 班蘭多士半份，加雞翼4隻 湯粉先到，得一舊牛根，二粒牛丸，湯味道正常，但料「孤寒」咗啲。跟著到我的喇沙摻摻，我習慣食湯麵，一定試啖湯先～ 慘慘食得喇沙就係鍾意「濃味」，但佢哋個湯底對於我接近無味，海鮮喇沙係有二隻蝦二塊魚片加二舊豆卜同半隻旦，反正仲有多士加雞翼點都會飽😂😂，再講多士同雞翼，放低唔夠30秒我已經出手拎件多士食～淋同暖嘅？失去晒食多士嘅意義，雞翼味道中規中矩，三杯飲品～凍奶茶同咖啡同樣無乜味道，偏啖，三色冰反而最好。 難得新開，過咗飯市都咁好生意，加油。

Lunch 想食好啲，睇過OpenRice 介紹，就決定上嚟試吓。 我食嘢第一樣嘢係～空間感同私隱度，如果好逼夾，無空間俾自己的，我一定唔入,呢度算ok. 選咗個牛扒set lunch, 有餐湯同沙律選擇，當然有有茶同咖啡，或加錢配埋雪糕。 選咗個沙律，配上2片薄薄的ham ～不錯，主菜牛扒五成熟，配上新鮮嘅四季豆同荷蘭蕃茄仔，份量都足夠裹腹，至於味道，佢唔同大家食開港式西餐，有乜汁乜汁，佢淨係炭燒一塊扒俾你，呢個係食原汁原味，塊扒無咁上下質素～點上。 如果你問我會唔會返轉頭，我會講～會，試多一次晚餐，仲要係座外出，係咁多。