波仔記車仔麵

營業中

休息中

諗住食得清淡啲，叫左淨餸，菜同魚丸都正常，點知食到牛腩就出哂事，食落竟然係酸左，連帶啲湯都酸埋，無奈只可以成碗掉左佢，咁就無左$44，絕對唔會有下次，難怪大家都去食九記而呢間就無人排隊。

$47 ….. 有3餸1麵 + 熱飲，抵食、大碗、味道好、服務好。今日1:30pm去到等左5分鐘就有位，坐低姐姐就幫你落單，雖然牛類只有牛筋腩…. 但係味道好又夠淋！大大碗真係抵食！

波仔記車仔麵已經開業40年，位於銅鑼灣鵝頸橋熟食中心一樓，老公話之前返工成日食，好好食，一定要帶我去試，波仔記每日收四點，所以夜晚係冇得食㗎。叫左一份魚餅牛筋腩大腸撈粗麵加腩汁，一份冬菇蘿蔔齋撈粗麵，一份蝦米腸粉，凍檸茶+凍齋啡。好正，蝦米腸粉係即蒸的，海量嘅蝦米，每一口也充滿蝦米香，腸粉薄身又滑，估唔到咁精緻，充滿驚喜！撈粗麵大大碗，大腸、牛腩、蘿蔔無論質感、味道都煮得恰到好處，魚餅是新鮮的，好好吃，撈麵的汁很香甜，量剛剛好，每一口麵都可以粘着汁吃。咖啡好飲，係期待中嘅港式茶檔咖啡味👍🏻波仔雖位於熟食中心內，但地方很潔淨，無論枱面、椅子、筷子筒、醬油瓶等等到好乾淨。好有心嘅餐廳❤️❤️

午餐食下懷舊的車仔麵，一麵三餸$35，四餸$44。我唔係好大食，所以叫左三餸都很足夠。落完單，我唔飲嘢，姨姨都很有禮貌、主動地話拎杯熱茶比我，值得一贊。三餸分別叫咗豬大腸、牛腩、同埋車仔麵精粹的蘿白。先說豬大腸，份量超多，洗得乾淨。牛腩就一般，比較散，可能已所剩無己的水尾。蘿蔔非常入味，冧身，有一兩件有少許渣。整個湯底加埋腩汁好濃味，個人認為落少啲腩汁較好，不過可能我叫咗兩款都是滷水，所以重味左。非常抵食足料的車仔麵！

今日上鵝頸橋熟食中心食晏，天口咁熱冇乜胃口，諗住簡簡單單食碗麵，所以揀咗波仔記。食晏時間真係人山人海，不過嚟呢度係食味道，唔係食環境同服務，最緊要好食。我揀咗一麵三餸$32，有豬紅、豬皮同豬大腸加粗麵。等咗一陣，大大碗車仔麵已經上枱，先呷一口湯，啱喇！就係細時嗰種味道。豬大腸腸味濃， 煙煙韌韌好咬口，正！豬紅夠軟滑，豬皮夠爽，三款餸都好有質素。雖然而家車仔麵越開越多，不過都鍾意搞搞新意思，味道同食材都揾唔番以前嘅味道。難得呢度仲保存到傳統嘅味道，下次嚟一定要叫多两款餸試吓！

初會波仔經朋友介紹這個什麼鵝頸橋街市，樓上有很多大排檔式食物。第一次來到這裡，很多人。走了一圈看到這檔早餐有車仔麵⋯⋯又有菜心腸粉....未聽過衹知道很大碗，吃了二十分鐘也吃不完.....奶茶不錯....到中午還未肚餓

平時鍾意食麵嘅我，今日行過北角，見開左緊車仔麵，就入去試下。午餐時間我揀咗呢一間波仔記車仔麵，呢一間車仔麵有啲不一樣，佢吸引我嘅賣點唔係懷舊裝飾，傳統落單紙，同佢地個擺設真係好有以前個感覺，特別一提泰興辣醬！加上佢哋係良心企業！竟然而家有27蚊食倒碗車仔麵！！！食落口好特別而又唔會太咸亦唔會口渴嘅湯底，認真值得一讚嘅係食落口飲埋碗湯會覺得哩碗係好健康嘅車仔麵，感覺冇咩味精，但最特別嘅係碗湯唔會太清而無味。講番啲餸就不過不失，可能我叫d野普通，所以都無試到d功夫野！不過香港個個都食到好濃味，又個個都加味精。所以哩d鋪真係好少有。下次再黎試其他餸！

十年前在Time square 返工時經常來，為的不是佢超好味，超抵食，只係呢度縮在熟食中心一角，唔似出面那些賣清真呀，賣牛什呀般墟陷，又要排隊。可以在lunch時享受一刻清靜。重回舊地，店面依舊。揀位坐定，今日來個三餸: 印象中以前有做魷魚(有汁燴果種)，唔見咗，有D失望。是但幾樣大路嘢 好彩仲有猪大腸。份量跟以前一樣(隻碗一樣係咁大隻)，一貫平實可口，大腸好入味，蘿蔔夠"淋"。可以揀要湯麵或撈麵，個人覺得撈麵偏咸，所以都係要湯面。唔好漏咗我至愛的熱奶茶，睇隻杯已經好有懷舊風味。茶味好濃!十年前當然不是呢個價，但已經算是十分大眾化。我成日諗會唔會有人嗌6餸呢?當年在店面幫手收錢的小哥哥已經大個仔，不過佢唔認得我囉!

識食之人一定要嚟鵝頸橋街市搵食！由另一邊橋上一入門口就會見到波仔記車仔麵。車仔麵好抵食，餸菜選擇，傳統嘅豬大腸、豬皮，雞翼尖都有。可以揀湯麵或撈麵。食車仔麵，辣椒醬好緊要，波仔記有兩款辣醬可供選擇。三個餸配埋杯凍檸茶先$45 ，仲要大大碗麵

今日介紹朋友一起到鵝頸橋街市熟食市場食呢個波仔記車仔麵，用OpenRice share link 俾我朋友嘅時候，我發現呢一間有幾十年歷史，我由細食到大，有手推車仔做到咁大間鋪嘅老字號， OpenRice竟然咁少食評同咁少讚！老闆真係好低調高手，今次真係要打返一篇推介下俾大家。其實呢間波仔嘅車仔麵係呢一區已經好出名，基本上鍾意食車仔麵嘅人都應該識佢哋。你間車仔麵最有名嘅就係車仔撈麵，聽聞係幾十年前老闆一手開創的！佢嘅秘製醬汁有別於出邊普通嘅豉油撈粗，食落帶點甘香，而且麵質亦都好有水準，唔會太林，有彈性，加上秘製醬汁食落口好滑。我食咁多年都冇失手過。我今次自己冇食到不過都要介紹吓就係煎魚餅，真係好好食，香口得來亦唔會覺得太油膩，中間的魚肉仍會好似外面加好多粉去處理。另外牛腩，雞腳，大腸都係我每次去食僅有一樣會叫！講咁多無謂，未食過真係要去試吓。另外一提佢嘅湯麵都好正，食落口唔會好似飲緊味精湯咁，食完唔口渴之餘，味道亦都好夠。

本人真係好耐無食車仔麵，今次朋友介紹，1個鐘lunch 時間都一齊行成15分鐘過黎街市食哩間車仔麵，沿途個fd 不停叫我一定要試下個車仔撈麵，好傳統同有別於出面嘅中式撈麵。咁趕都特登走過去食，緊係要試試。成碗色水、香味都拎足分，食第一啖後，我明點解d fd話好正，雖然我唔係有咩金舌頭，做唔倒一試就知佢落左咩，不過食落口除左傳統中式豉油撈嘅香味，仲有一種令到碗麵食落口好滑，亦一種淡淡甜香，真係唔識形容。每間鋪都有佢獨特嘅秘製烹調方法，哩間就係佢地低調以又客似雲來嘅原因。

食過好多次衣間 ，但係食左咁多年都冇食過豬紅 。因為自己唔係好中意 ，但今次試下叫黎食！ 原來又幾好食架wor！！！！！ 好似食啫哩咁 ><哈哈..... 已經食到同衣間鋪D呀姐熟晒， 平時一坐底D呀姐就已經知我食乜，今次我簡左豬紅佢地都問我有冇剔錯＠＠不過有時都要試下新野嘅。 我反而最中意食係魚皮鮫， 夠大粒又彈牙夠香！ 同埋真係算好平嘅一碟撈麵！ 今日食佢地個撈果時，D汁搞到我好想大啖大啖咁擺落口！ 但係我自己唔小心將杯野飲倒瀉左！ 不過最後個呀姐比過杯新既我！ 佢地真係好好人😍

車仔面 !!!今日突然想食下齋， 但係銅鑼灣又真係好難搵到一d小齋鋪。 唸唸下行行下，咁就上左街市熟食市場食車仔面， 起碼可以簡d齋黎食。 叫左個羅白、介蘭、齋、撈個幼面。 再整多杯大檸蜜， 好正！ 杯野飲可以轉大！😂😂 我發覺個齋好好食， 羅白好清， 我食過出面有d車仔面d羅白好似食糖咁， 甜到好怪。 但係衣間就完全好清新， 超中意！ 車仔撈面都好特別！ 銅鑼灣咁樣食都係38蚊埋單 我一定日日黎😂😋

平時鍾意上街市去到熟食市場搵好嘢食嘅我，今日行過灣仔鵝頸橋呢個熟食市場，梗係要上去搵吓有冇好嘢食啦，午餐時間我揀咗呢一間波仔記車仔麵，呢一間車仔麵有啲不一樣，佢吸引我嘅賣點唔係有個沙嗲湯底、牛腩汁、咖喱辣汁，而係食落口好特別而又唔會太咸亦唔會口渴嘅湯底，認真值得一讚嘅係食落口飲埋碗湯會覺得哩碗係好健康嘅車仔麵，感覺冇咩味精，但最特別嘅係碗湯唔會太清而無味。講番啲餸先，蘿蔔就不過不失，豬大腸就夠肥夠靚，味道亦都老得好夠味，講到我最印象深刻嘅就係個魚餅，真係好足料嘅凌魚肉，絕對唔係平時食開加好多粉果種！行開呢頭值得一試

平時食好嘢都要捐窿捐啦，今次走上灣仔鵝頸橋哩個街市熟食市場。成日聽到啲朋友講呢間車仔麵有個好傳統又特別嘅車仔撈麵，見得閑點都要黎試吓！山長水遠走過來不負所望！真係幾特別，食完仲想加碼黎多碗！簡簡單單嘅車仔撈麵，食落口麵質又滑又彈牙、唔會太林亦唔會有鹼水味，加上車仔麵嘅餸全部都係自己揀左自己鍾意食嘅餸，冇得彈！等我介紹下啲餸先，牛腩炆得啱啱好，亦入晒味。豬大腸亦都好肥美同好新鮮。豬紅滑得黎又有咬口！總括嚟講呢間車仔麵真係值得去試吓，有別於而家做到泛濫哂嘅辣汁車仔麵。