新桂香燒臘

營業中

休息中

瘦叉又太硬！肥叉又太肥無肉食所以半肥瘦叉燒才是皇道！！新桂香叉燒好味就一向都係出名嫁啦～而且相信好多叉燒迷都唔會感到陌生～但因為坐位真的真的好有限～所以只能外賣了～～叉燒食半肥瘦就最好了！又有肥叉既滑口油脂～肉既部分又唔會太小～配合起上來真係非常非常好味丫！另外小編最愛既燒鵝亦都非常出色！今次仲好lucky咁有燒鵝脾位～～外皮夠脆肉又夠哂滋咪～加埋薑蓉送飯真係好正丫😋😋😋有興趣經過附近真係要一試～

知道新桂香好耐，以前出名係燒排骨! 好耐之前試過真係好食! 大大話話話幾年未再食過，見綱上評論毀譽參半，又咩揾笨全肥又咩香港第一，好吊詭!咁大差別真心想試多次公道D寫下好唔好食! 平日下午點幾仲有叉燒賣，問下如果下晏5點幾洗唔洗拎定籌，亞師傅回應3點5點仲有出爐，平日唔洗攞籌，黎排隊可買到! 咁就5點鬆D去排隊，龍唔係好長，10 個左右! 嘩！D叉燒靚到癲排隊見到狂吞口水! 到我啦到我啦！原條3粒外賣成為兩舊水! 個汁係完美地將條叉燒封住，油光满滿! 食前用碟盛著放飯煲面翻熱，香到企唔穩! 以叉燒黎講我唔敢講係咪第一，但绝對物有所值! 酒店中菜廳一碟黑毛叉燒接近3舊水，新桂香以平民叉燒黎講算貴,但值! 一舊肉有齊爽、淋、肥、滑嘅口感確係唔簡單! 仲有，****記得叉燒係一定要單買**** 唔好叉x 飯，完全唔係嗰回事! 仲有，如果要食瘦叉我勸你不如唔好食!唔诜同師傅講咩切细舊D! 師傅切嘅厚度係最適中嘅大舊叉燒! 嗱！購買貼士講左啦， 非常建議一試嘅!

半肥瘦叉燒：燒到叉燒邊位好脆又香口，正！燒排骨：肉質滑又夠淋，同叉燒一樣咁好味！燒腩肉：燒腩一層肉一層肥，入口香脆又唔太咸，但其實嗰盒燒腩底個層有好多燒肉連大大件骨嗰種嚟墊底，看似好多燒腩，其實係假象…..

_《新桂香燒臘》.全港最岀色叉燒？見仁見智啦😂我覺得過譽左🤨～如果你有時間拎籌吾介意等，我亦試過撲空如果你有大把錢😚我都覺得你可以一試～.買左半肥瘦腍叉，少食肥肉嘅我都食吾停口，因為肥位都幾爽口，肥瘦均勻，食落軟腍多汁，厚切食落啖啖肉🐖的確很不錯👍🏻！可惜冇得加薑蓉🥲有冇人同我一樣鐘意薑蓉餸飯食😂不過佢本身都幾多汁，最啱食多幾碗飯🍚🍚🍚～.但 ... 對於佢HKD180等同我買開都差不多美味lv 嘅HKD50,我就試一次就夠啦😂 平日4點幾5點都會有機會賣曬～ 柴灣亦都吾太就腳🤪你睇你啦～.#新桂香 #新桂香燒臘 #香港叉燒 #香港燒味 #叉燒 #燒味 #柴灣美食 #柴灣 #香港美食 #hkchasiu #chasiu #hkfood #hkfoodie #foodie #foodies #chaiwan #chaiwanfood #pork #porkbelly #foodporn #meat #barbecue #barbecuepork

呢間叉燒我可以話由細食到大，論佢好唔好食！我就覺得係我食過最好食嘅叉燒！叉燒真係用炭爐黎燒！呢個係最原始最正宗嘅方法來製作，咬落去，已經知道d肉係新鮮肉!同行有四人，叫咗d例牌，有乳豬、有燒排骨當然就唔少得叉燒啦！全部真係用明火炭燒，出到嚟熱辣辣！味道夠濃郁！啲乳豬真係好脆，真係未食過咁脆嘅乳豬，食過返尋味！最大件事就係！我係覺得佢係全香港最好食嘅叉燒就係佢哋！堂食嘅叉燒就食晒啦！真係唔夠喉呀！結果又買咗啲叉燒同埋燒鴨返屋企再食過！返到屋企食，味道都冇乜點改變！依然都係咁濃郁！都有好好嘅招呼！老細又好有禮貌！值得一試

經網上一位老實嘅食評家慕名而來，結果係喜出望外。門口企滿源源不絕嘅客人，街坊都知道堂食位置不多所以大部分都外賣斬料，雖然開埋街櫈都只有8個位，但12:30嚟到已經有得坐低。嚟到街坊生意舖頭打算就咁叫睇下會俾啲咩質素，點知舊舊叉燒都燶邊脆脆，亦半肥瘦，非常滿意。燒肉皮脆索索聲，肥瘦比例正常，經驗街坊老店呢樣算基本亦做得好，仲有例湯送。麻雀雖小，更睇到師傅鐵漢柔情，門口燒味師傅每有時間都會仔細問咁多叔叔嬸嬸要咩位，仲教埋返到去點樣整熱先好食，非常體貼。

朋友話呢度叉燒好食，所以好遠專登走過來食，估唔到今次係我成世人食過最差嘅叉燒，佢地得把聲，講嘢大大聲，又話叉燒唔肥唔好食，點知成碟係肥膏飯，一個叉燒肉都冇，最後我食剩左半碟走咗，千祈唔好中招，環境又污糟又嘈，真係唔明點解咁多人話佢好食

已經叫咗幾次$100半肥瘦叉燒都係發生同一情況明明揀咗一條叉燒係無肥但結果一半叉燒係瘦肉一半叉燒係全肥肥果一半完全放唔到入口食嘅咁即係叫一份只有一半係食得講真，幾好食都唔會再去買偷龍轉鳳根本就係呃人

一個住新界嘅人，山長水遠去柴灣就係為咗久仰大名既新桂香叉燒！平日12 點左右到，已經見唔少人排隊買。鋪頭都有大概6-8 個堂食位置。姐姐態度好親切，仲會話可以放袋係後面。我哋叫咗一個叉燒（半肥瘦）飯同叉燒併燒肉飯！記得叫半肥瘦或者淋叉，之前有同事冇叫，叉燒偏瘦冇咁好食！叉燒賣相超靚仔！每一啖都好幸福！半肥瘦叉燒軟淋入味，個邊有啲焦香！每一舊叉燒立立令，個汁甜甜地，好味到停唔到！值得我山長水遠黎食！燒肉就都好食，但冇叉燒咁出色！堂食就送個例湯，成餐飯好滿足！下次要黎再食！

山長水遠入去柴灣就係為左試呢個熱烈全城嘅叉燒買左半斤唔洗諗喇, 用新鮮豬肉價錢一定係比較貴少少同平時一樣都係叫半肥瘦師傅一手就抽起一舊手起刀落當時望見呢種半肥瘦真係有啲驚因為平日都好少食肥肉但已經手起刀落左返唔到轉頭斬完後,師傅分別加左兩種醬汁一款相信係鼓油另一款係比較杰嘅當信係燒叉燒用嘅蜜汁攞到返屋企都已經過左一個鐘頭本身以為味道點都有影響但正正係師傅加左一層蜜汁令到佢啲肉汁鎖起晒配叉燒只需要一碗白飯就好了講返呢個半肥瘦個半肥膏令人有驚喜因為係爽口嘅都唔會令到你成口油其實唔講真係唔知係肥膏黎的確呢到啲叉燒係出色特別係呢個半肥瘦真係同平日買到又柴又乾身只有鼓油嘅叉燒唔同蜜汁真係令到佢生色不少但可惜住得遠唔可以成日去買但真係值得再買!

No doubt this is the best cha siu you can find in Hong Kong, it’s just an ordinary shop on an ordinary residential area but the price reflects the perfect quality. It’s not ibérico pork but the texture and flavour did the trick, plus the chargrilled skin made it even more authentic. It’s definitely something to bring home if you pass by.

每次柴灣掃墓之後，食义燒飯已經變咗例牌動作。識食一定半肥瘦或多肥少瘦，肥肉係唔油膩而且爽口，加埋燶邊，汁唔鹹就是食神义燒。其實唔係度度有肥义賣。現場食完再買打包返屋企。大滿足！🤤🤤

兩公婆用戶戶送叫左兩盒叉燒油雞飯，外賣到左滿心歡喜，即刻開餐。點知兩盒飯啲叉燒都係肥膏，一係就肥膏之間只係夾住一條幼過牙籤既豬肉，一係1/3係肉+2/3係肥膏…. 啖啖都係肥膏，點食啊大佬，賣剩啲肥叉都唔好咁樣舊舊肥膏畀個客啊！打去舖頭，阿姐叫我地拎番落去換，我唔係住附近，點拎去換？阿姐毫無歉意，係咁話聽唔到，老公講到著哂火，一路食、一路鬧….好彩叫雙併，仲有油雞食下；如果淨叫叉燒飯，就真係淨食白飯都得啦！#嬲爆

✨叉燒飯叉燒半肥瘦 肉質腍略嫌蜜味唔夠飯 正常 偏硬食物可以 但冇其他人講得咁誇環境方面 店內只有兩張枱供堂食服務正常 價錢偏貴 但店家表明係用新鮮豬肉 可以接受可以經過去試 但唔需要特登去另外值得一提既係 店員衛生意識麻麻當時店內得我一人 有兩名職員坐在我對面計數其中一名職員一直都冇戴好口罩 坐下後更不停摸口鼻 之後更在門口冇遮掩既叉燒前大聲講電話 雖然我明白街坊店環境唔會好好 亦唔會要求有咩好服務好環境 但疫情下做飲食行業最基本都應該要戴好個口罩

七月九号近中午時間特登揾朋友車我去新桂香買义燒同燒肉。當時是中午，無人買外賣，堂坐都係得二人。服務員叫我買一斤义瘦，我因二人食所以買咗半條半肥瘦义燒同一條燒煵肉共$172, 比錢時都特一特，觉得幾貴。返到屋企一睇，半肥瘦义燒系肥歸肥半盒，瘦歸瘦半盒。另外燒肉就千奇唔期望D皮糸脆，不過仲有幾夠朱頭骨比過你。結果我真系落唔到口，倒咗半盒肥燒，D瘦义比較甜，我就麻麻地。燒肉也是普通貨。唉，咁大陣仗出錢又出力都糸失望而回，下次就去太X或美X買，勝在方便又價格合理。