文輝墨魚丸大王

營業中

休息中

對曾居於銅鑼灣的我來說，文輝不但是一間墨魚丸大王，更是該區的老字號。此店的特色是環境特別迫夾，自小就不太喜歡那種「人盯人」的環境，時至今日，此傳統仍得以保持，實屬難得，不得不說文輝的炸韮菜角是人間美味，可惜多年前已停止供應，莫非往事只能回帶？近年，文輝開設了數間茶餐廳式經營的連鎖店，但在吃老本、缺乏新意下，回響卻大大不如同樣轉型的「太興」，要吃出其風味，還是回渣甸街的老店迫一迫更好。甫進店內，剛好有一「面璧思過位」，招牌墨丸粉 ($23) 是我貫常選擇，送來時重重河粉蓋著墨丸，保持河粉的爽滑，吃時加點魚露，令鋪上冬菜及莞茜葱清湯底更加鮮甜，馳名的墨丸是手打的，形狀成橢圓，質感新鮮但不算十分彈牙，仍算不俗。紫菜湯底則是文輝另一標誌，一場來到當然要試一試其紫菜墨丸銀針粉 ($26)，紫菜比想像中少，但足令湯底味道更具層次，而用匙盛著爽口的銀針粉連湯吃，更能體驗箇中真味，是一大享受也。 至於蠔油芥蘭 ($10) 主要是菜莖部份，份量頗足亦夠新鮮，可以一吃的。說起港島區的粉麵，華姐爽腩、文輝墨丸、南記春卷、沾仔記乒乓雲吞，都是我喜歡的，想著想著，也有一段日子沒有吃細蓉了，搵機會啪番碗先得！

同女朋友去左兩次... 兩次都係食紫菜墨3鮮河+紫菜墨丸河+通菜大大碗好抵食... 不過係紫菜少d...墨3鮮 -- 墨丸..墨魚仔..墨魚鬚 ...新鮮又彈牙墨丸河-- 有5粒墨丸... 食完好滿足...簡單介紹完... 文輝墨魚丸大王.. 真係一間好野... 抵食好食

7點幾, 和豬豬女友落街, 唔知食乜好.平平地食個麵啦. 好一排冇黎文輝, 今晚唔洗諗喇, 就拖女友來了.星期日, 都幾多人, 但好快都有位.當然, 地方細, 好似餐廳內個魚缸內的7條龍吐珠咁迫...叫了個雙墨紫菜米線+ 碟通菜.勁快上, 好熱~雙墨紫菜米線係墨丸+墨魚片. 26蚊, 份量都不少.米線都幾多架. 咬一口d 墨丸, 係唔覺有麵粉味的, 彈彈地牙, 正~墨片則有咬口得黎又唔韌, 食得出係新鮮的.碟通菜跟自家製的腐乳, 比出面的腐乳略淺色; 味ok.另一檯叫了碟疑似蝦天婦羅的物體, 炸得幾燶... 得唔得架冇食過潮州天婦羅呢... 其實係未聽過...都係食墨魚最穩陣!大王嘛~

果真係潮州怒漢多呀, 在文輝見D waiters 同客agrue緊野都有2-3次. 哈哈次次都係為d芝麻綠豆的事已嘈. 不過無論佢地更黑面, 態度更差都好, 成日都係好多人去. 原因真係好簡單, 食物真係永無失手.1. 紫菜墨丸河-真係好好食, 丸既肉打得好夠, 唔會有d 有粒粒脂肪比你食到, 好彈呀及好有鮮味.2. 豬肉丸 - 好彈口, 好食.3.豬排河-即叫即煎返熱, 豬排有肉汁仲有2大塊 ,河粉有好多芽菜. 豬排既肉汁加湯河好味. 好想知佢地用咩marinated個豬排, 味道好特別.

夜晚的一餐係食潮州湯粉行完黃埔之後, 去到銅鑼灣買衫, 都唔知做セ鬼空氣咁差, 抖氣都抖唔到, 影響埋食慾, 只係想食碗粉就當晚餐吃的, 是一碗紫菜太子墨墨丸雙拚河粉, 太子墨即係八爪魚仔, 日式的八爪魚改成潮州式的處理, 一點都不討好, 因為日本的做法係醃製, 當然野味, 太子墨本身無セ味, 就咁白灼點會好食? 好彩墨魚丸夠彈牙, 又夠味, 挽回不少分數!湯底夠味, 紫菜幾好味, 唔腥!下次再食, 只會食墨丸, 唔要太子墨了!

一行2人,嗌左 紫菜墨三鮮河同紫菜四寶米線大家都交換d黎食嗌完好快就有得食, 好大碗我個四寶就實在唔多特別,而墨三鮮d魷魚仔就幾鮮仲有,不得不讚既就係紫菜既份量都好多一邊食米線一邊食紫菜真係未食過,夠哂特別而且味道都唔差如果食完唔係飽,我仲會想食多碗!

一個人行完IKEA，就要醫肚喇。行行吓見到呢間野，之前都聽過佢個名，但就未試過。於是就入去試吓。兩點幾去到，都好多人喎，坐滿咁滯。一坐低，阿叔就遞對筷子埋黎。要了墨丸河。好快就送到。全碗野都無咩色水，河粉白、墨丸又白，湯又係清湯。河粉份量好多，我咁大食都食唔晒。河粉幼身，但有少許煮過火，淋了點。到試墨丸喇！墨丸有4粒。一咬，咁淋嘅？一d都唔彈牙喎，墨魚粒又細又得好少，口感好plain...墨魚味弱！同出面$10店的墨丸無分別。個湯完全無味。清過開水，我加咗辣醬先有少少味。整體黎計，完全稱唔上係大王，墨丸淋、無咩墨魚味同墨魚粒。叫做填得飽個肚囉！

全盛期的文輝, 有三間分店, 現在只剩老舖了, 最主要原因, 是品質失控, 味道不好, 到現在隔了一年, 我才再幫襯或者因為只剩一間, 味道比我之前一次來吃好多了, 湯底都恢復了鮮味, 不再淡, 今次吃一碗豬肉丸米, 豬肉丸一直以來都不錯, 湯有番豬骨, 大地魚的味道, 加埋蔥粒, 冬菜, 成碗粉都充滿生氣!經過今次重臨之後, 令我對文輝回復一點信心, 想食粉都會再來幫襯!

去銅鑼灣買野捐血，下晝兩點，一粒米都未落過肚，入捐血站前當然要搵o的o野咬下。黎左碗紫菜墨丸河同通菜。墨丸仍有墨魚味，唔錯，但粉本身唔算太特別，雖然佢地話河粉係招牌菜，但覺得同出面的河粉差唔多，紫菜比以前少了。不過食完唔口渴，呢樣令我加分。通菜合格，乾乾淨淨，整整齊齊，腐乳醬唔太鹹。唔係第一次幫襯，所以不會對服務有任何期望，咁多次都未試過話遇上好差的經歷，但絕對唔會覺得好。好多人寫親粉麵舖食評都話坐得迫，但稍為好食的粉麵舖都係咁架啦，多人幫襯嘛！坐得舒服既，o的o野就一定唔好食。呢個係粉麵舖的特色，如果真係坐唔慣，不如買走自己搵個地方（例如公園）食吧。其實話非常好食又唔算，價錢亦覺得略貴，不過唔知點解黎親銅鑼灣要醫肚都會諗起呢度。

女友有一特別嗜好, 就係愛在深夜行超級市場, 夜晚一點鐘到皇室堡對面的惠康閒逛一番行完超市見肚餓, 食店未關門的不太多, 文輝係其中一間, 都係可以食碗湯粉唔會太飽訓唔著之選, 兩個人食一碗紫菜墨丸粘, 一碟潮州粉果, 份量剛剛好, 因為碗粉都幾大碗 墨丸有五粒咁多, 唔算好爽口, 不過幾好食, 但係我兩一至認為湯係無味, 要自己再加咸魚露先有味, 第一啖飲既湯仲以為係水嚟潮州粉果就唔係好好食, 粉果皮好厚, 餡又唔多, 女友食左一啖已經放棄了... 結論係只有墨魚丸值得食, 食物水準只係一般吧

宵夜原本想去南記食返碗春卷墨丸米, 點知11點鬆啲就話last order, 老公工作未完又未走得, 唯有放棄南記啦! 等多一陣, 老公搞掂手頭上工作後就立即嚟搵我, 咁夜又唔想周圍行, 所以就腳近近地去文輝食宵夜。其實我一向都鍾意食佢哋啲紫菜四寶米, 湯底淡淡地, 碗米粉又清又少油, 食完一大碗都唔覺膩滯。紫菜OK啦, 好似無以前咁爽, 同埋份量少咗。但墨丸依然好好食, 好鮮好彈牙, 我覺得仲好食過元朗嘉麗園。 魚皮餃亦唔錯, 豬肉丸魚旦同魚片都好味, 不過魚片唔知點解一啲都唔彈, 口感有啲奇怪。價錢越來越貴, $26一碗唔算平。另再點多一杯凍豆漿, 都幾好飲, 唔太甜, 一口氣飲咗半杯, 口渴嘛! 多謝老公琴晚唔食都陪我食 。Happy Easter

墨三寶即係墨丸, 墨魚頭同墨八爪魚仔即係太子墨下晝去文輝食一碗墨三寶河, 一碟腐乳通菜, 三寶之中最值得食係墨丸, 呢度既墨丸打得好彈牙, 仲幾有墨魚味, 墨魚頭因為有好多吸盤, 所以有點似食檢筋 太子墨係無味既墨魚仔, 我唔係太鍾意食!好味既仲有個潮州式魚露湯底同辣到飛起既辣椒油! 只係覺得坐得比較迫夾, 撘哂枱咁, 環境分要扣番

一碗正中潮州湯河﹐當然少不了三寶來調教出潮州人所喜歡的味道。本人所指的三寶就是蒜頭油﹐冬菜&魚露。只要各樣下少許﹐以能夠張一碗平平無奇的湯河變得很好吃。所以是晚帶老婆來這店試試能否吃到這特色潮汕味道。 當晚進入店內顧客不多﹐每張枱還有吉位﹐但是本人跟老婆都被這店內用來鎮店風水的七條白銀色龍吐珠所吸引。條條都很大條﹐泳姿很優美﹐不停地游來游去﹐欣賞了幾分鐘才開始看餐牌點菜﹐但這裡聽聞服務不太好的仕應都沒有給什麼黑臉。最後點了墨魚丸魚片河&紫菜三鮮河。墨魚丸魚片河 $23 - 墨魚丸跟魚片各兩﹐老婆覺得墨魚丸咬落覺得粉比較多﹐魚片亦不錯。紫菜三鮮河 $26 – 三鮮包括墨魚丸兩粒﹐大量原隻墨魚仔兼墨魚肉&墨魚鬚。墨魚肉質爽口新鮮﹐沒有半點霉﹐質素很好。吃到最尾的一啖還有墨魚剩下﹐河粉兼墨魚的份量足夠﹐希望這店能保持這質素。因這店在湯底內下了少許蒜頭油﹐所以味道清淡而香﹐不會蓋過墨魚本身的鮮味。本人亦跟店員拿了些冬菜放在湯內﹐所以其湯底變得更野味。這店做出的味道雖然不是用什麼貴價食材﹐但用料新鮮﹐湯底貫以正中潮州清香味道﹐用蒜頭油兼冬菜稍作調味﹐不會像其他廣東化的潮州店鋪為了配合廣東人的口味

最近中午嗰餐多數都係食湯粉，因為唔想咁肥，已經成面瘡，仲變埋肥妹真係邊度都唔使去了．．星期六喺銅鑼灣行街，中午餐飯就係喺文輝解決，人客唔少，可能係一間名店吧，排排坐咁坐喺一對男女隔離，有點迫．．只係地方淺窄，無辦法，香港地好多地方都係咁．．紫菜雙丸河終於到眼前，墨魚丸比豬肉丸好食，墨魚丸味道好，因為粉少墨魚肉多，而且打到幾彈牙，不錯，其實豬肉丸都唔錯，湯比較淡，同黃明記係兩個世界既出品！始終食唔飽，再叫左兩隻粉果食，只係一般．．呢次想唔肥都難．．

自己一個去到cwb. 唔想空肚而回, 所以食一碗墨丸粉我本身唔太鍾意食墨丸, 因為阿媽煮o個d 太難食, 好林, 搞到我自細就唔食不過哩間野出名墨丸粉, 冇計只係6點鐘成間鋪係full 晒. 好彩我係一個人, 自己坐低伙記就叫我就咁嗌出黎話食咩, 個文化幾特別叫左碗紫菜墨丸粉河粉只斷過幾條, 合格.d 辣油加左幾滴已經夠辣, d 醋加左少少已經夠酸. 所以唔好起勢咁落湯比較清, 好似冇乜味咁至於墨丸有5粒, 打得唔錯, 入面有d 細細粒既墨魚碎, 雖然唔林, 但唔夠彈牙而味道有少少甜至外都冇其他味.都係鍾意食八爪魚丸多d$26/碗粉對比其他潮州粉麵鋪唔係平, 但係佢都幾大碗粉, 算可接受