北京樓 (德福廣場1期)

第一次黎食都已經拉入黑名單…唔洗錢都唔會黎，難食到吞唔落…又無服務…埋單問幾錢先夠拍車都可以唔知…服務又無，出品又唔掂，仲夠膽死收甘貴，絕對係不能接受，難怪星期日都唔洗等位…查看更多

一心想試下招牌菜片皮鴨，點知名過於實，想試的唔好咁大期望，雖然個擺盤好冠冕堂皇咁，又有配菜青瓜京蔥夾埋一齊食，但真心唔覺得好食⋯⋯所謂嘅片皮鴨原來肉質又乾又柴又鞋口，薄餅皮質感好差好難食，感覺唔係即場新鮮整，似預製貨，包住鴨肉食完一兩件已經唔想再食落去⋯⋯真係食返港式燒味好過，同類型食物燒鴨燒鵝好食得多～其他菜式更加不值一提，毫無誠意，完全配唔上價錢。環境裝修幾靚都冇用，最基本同最重要都係食物本身。今次試京菜十分失望，對北京樓出品印象好差，不會再光顧。…查看更多

自從8月31日食完個外賣之後嘔左幾次，連續幾日都冇胃口想食野，個胃又唔舒服，仲有嘔心嘅感覺！越諗越唔忿氣！嗰日食完北京樓個外賣幾個鐘後嘔晒出黎，仲要嘔足幾次先嘔清啲細菌病毒！一同進食的家人都嘔左幾次！搞到人食物中毒餐廳都唔肯退款，打電話同個周店長溝通就不斷推卸責任，真係姓賴啱佢多啲，賴送遞員外送過程問題，賴客人前一日食錯野，前一日食嘅野點會仲喺個胃到，我當天只食過北京樓外賣，嘔出黎嘅都係啲外賣食物，仲聲稱餐廳從來都冇發生過食物安全問題，總之點都唔關佢事，應該一路以來就算有問題都唔會承認先保持到一直都冇問題睇番網上評價咁多分店做得最差就係德福呢間，態度又差，影衰晒北京樓個招牌。呢件事肯定係個外賣污染左細菌病毒，導致我地食物中毒！雖然餐廳店長不斷將責任指向送遞員，但餐廳唔用膠袋綁實個外賣，就咁用個紙袋裝住，又冇貼上膠紙封實開口，又唔用釘書釘封住上邊，完全冇採取任何措施保障個外賣，令送遞員可以輕易接觸到食物又不留下任何痕跡，餐廳方面都責無旁貸啦！北京樓行高檔路線，但做事就咁馬虎求其。其實之前嗌過一模一樣嘅外賣食完都冇事，但今次啲京蔥青瓜睇落已經好唔新鮮乾爭爭咁，唔知切完擺左幾耐⋯⋯所以懷疑今次生嘅蔬菜會唔會沾染左細菌病毒⋯⋯今次的確係因為食完你地餐廳嘅食物而嘔，嘔出黎嘅都係你地餐廳嘅食物，同店長反映完全冇正視問題，只識推卸責任想敷衍了事。呢位周店長明顯冇用心做好管理，唔會諗改善方案，當出現問題只會準備一套說辭作回應來解決，不思進取，毫無反省。食物安全問題明明好嚴重，但係周店長完全唔當係咩一回事，完全冇道歉冇賠償，區區百幾二百都唔肯退，漠視客人健康，仲浪費我時間溝通無果，要我地顧客承受晒一切身體上，時間上，精神上，金錢上損失，簡直離晒譜，令人氣憤！！！！…查看更多

今次喺九龍灣北京樓用餐，雖然嗰日出菜等咗比較耐，不過食物質素確實超出期待，令人覺得等待都係值得。北京填鴨皮脆肉嫩，切件上枱擺盤精緻，鴨皮肥而不膩，配埋甜麵醬、青瓜同京蔥簡直係絕配，每一口都極具層次感。豆苗鮮菇羹賣相清新，湯底濃郁帶鮮甜，豆苗保持嫩綠爽口，配埋香滑嘅鮮菇增添豐富口感，而且非常健康。松鼠魚色澤吸引，醬汁酸甜開胃，魚肉炸得外脆內嫩，掛汁剛剛好，每啖都食到新鮮同惹味。雖然上菜時間有啲長，但服務員態度友善，主菜全都保持高水準，有誠意推介畀鐘意北方菜同大家聚餐嘅朋友。…查看更多

今日叫咗呢度比較出名嘅幾個特色菜：1.片皮鴨（$398)包片皮鴨嘅皮會員有火喺下面heat 住，keep住熱同有彈性，夾埋d 蔥、青瓜，同埋醬，好味！😋2. 小籠包（$88）有湯汁，皮唔厚，有彈性，但又唔會好易穿，有水準。3.回鍋肉（$168）分量充足，比較重口味，會適合送飯食，味道配搭都幾好👍4.松子魚（$398）甜酸汁配落去炸魚嗰度，啱啱好，脆口而且唔會太油，相信都係即叫即整。魚尾嘅部份特別脆，成條都食得飯🤩5.炒羊肉（$168)香口，味道搭配好，唔會太有蘇味，唔太鍾意羊味嘅都Ok.6. 鍋貼正常水準，都不錯😄但個人會比較喜歡小籠包。題外話，佢晚市仲有拉麵表演，幾有氣氛…查看更多