屯門美食｜市中心8間特色Cafe及餐廳人氣打卡美食

屯門市中心出名美食多，當中包括唔少人氣極高嘅排隊人龍店！唔認真數吓都唔覺，原來呢到有咁多間日本過江龍咖啡店，同埋充滿文藝氣息嘅本地文青餐廳。行街行到攰，隨時搵到間打卡餐廳坐低chill吓！慢活食件蛋糕、嘆杯咖啡，叉足電又可以再shopping。即刻跟住我哋出發，實測呢8間人氣店啦～

日本過江龍蕨餅天花板｜甘味處鎌倉

首先嚟到登上OpenRice「最佳甜品餐廳第1位」嘅甘味處鎌倉（屯門市廣場1期1樓），以鎌倉名物蕨餅闖出名堂，而家喺香港都食到100%原味啦。店家更一反傳統將蕨餅融入嘢飲，如淺川園抹茶蕨餅飲料、草莓牛奶蕨餅飲料都好高人氣㗎。早前更有網友喺「全港排隊人龍關注組」投稿屯門店大排長龍，絕對好評如潮。

「甘味處鎌倉」以招牌名物鎌倉蕨餅闖出名堂。

一反傳統將蕨餅融入嘢飲，必試淺川園抹茶蕨餅飲料、草莓牛奶蕨餅飲料。

空氣感強勁梳乎厘｜PHI Coffee

一旦喚醒甜品胃真係停唔到落嚟，即刻上去3樓食埋呢間日式梳乎厘店！即叫即製梳乎厘真係好蓬鬆柔軟，輕輕郁吓隻碟已經動L動L咁郁，食落仲好有蛋香㖭。同場都有全日早餐、意粉、咖啡、特飲揀㗎。

Lotus海鹽焦糖梳乎厘。梳乎厘控必試！空氣感極強，食落仲好有蛋香。

提拉米蘇咖啡。咖啡味濃郁，做到甜而不膩。

還原日本店｜KOMEDA's Coffee

食完甜嘢，特別掛住高質咖啡。呢個時候…竟然係行入地下AEON百貨？因為KOMEDA's Coffee由日本名古屋開到嚟屯門AEON啦。目測屯門店約3,000呎，沿用日本店木系風格。咖啡依然精選全球咖啡豆再用獨門配方調製，留港都可以體驗地道日本咖啡文化。

招牌KOMEDA咖啡。同日本店一樣於世界各地挑選咖啡豆，再用獨門配方調製。

必食甜品冰與火。牛奶軟雪糕配日本KOMEDA自家製64層丹麥麵包，一凍一熱、一酥一綿多重衝撃。

美式小店｜b.o.t.h Eatery

除咗日本過江龍，其實屯門市中心都有好多本地品牌。好似呢間今年5月先開喺屯門市廣場嘅b.o.t.h Eatery主打地道美式Comfort Food，招牌德州手工漢堡、All Day Breakfast、甜品等，都係性價比高又IGable！特別鍾意呢度近4,000呎空間有好多梳化同靠牆打卡位，主要以綠色植物、木系裝飾營造恬靜氣氛，正如店名b.o.t.h（意指Backyard of the House）成為大家嘅後花園。

香濃風乾豬面及腸肉香濃番茄意大利麵。用上本地餐廳少見嘅意大利產風乾豬面肉，並以豬面肉油分煮出肥而不膩嘅香味。

蟹肉炒蛋吐司配黑松露珍珠。新鮮蟹肉同嫩滑炒蛋鋪滿酸種黑麥包，上面仲有珍貴黑松露珍珠。

驚喜漂書櫃｜牧羊少年咖啡館

本地文青Cafe唔只有靚環境，仲真正有書睇！呢間本地咖啡店一向重視食物同文化連結，第一次見到店內漂書櫃真係有驚喜，好感受到「旅遊 X 漂書 X 未來的信」生活態度。嚟到揀本書坐低，食埋經典窩夫甜品－京都春日，甚至嗌個英式早午餐又得，唔覺唔覺就消磨一個下晝啦。

英式早午餐。精心烹煮意大利黑松露醬炒滑蛋、希臘乳酪、法國核桃杏脯包、澳洲西蘭花等。

（左）京都春日（2人用）。酥脆士多啤梨窩夫配搭細膩Häagen-Dazs雪糕，香甜清爽。

（右）日落巴黎（2人用）。結合濃郁朱古力同香甜香蕉，同樣配上Häagen-Dazs雪糕相當滿足。

紅磚牆咖啡店｜Beans

平時行屯門市廣場一定會行埋DON DON DONKI，買完一袋二袋可以去埋隔籬Beans坐吓，屯門分店紅磚牆幾有格調。而呢度嘅咖啡、All Day Breakfast、意粉、法式吐司、窩夫一向有水準，特別係黑松露軟殼蟹意大利粉，幼滑意粉充滿濃郁松露香，配上外酥內嫩黃金軟殼蟹，每一啖都係豐富口感享受，難怪一直係港人最愛咖啡店之一。

法式吐司配煙肉及希臘式乳酪鮮果杯。厚切麵包浸泡香濃蛋奶再煎至金黃酥脆，配埋楓糖漿同希臘式乳酪，絕對係冬日嘅溫暖甜蜜選擇。

開心果馬蘇里拉芝士薄餅配蜂蜜。人氣開心果熱潮必食薄餅，並以香甜蜂蜜、水牛奶芝士撞出精緻甜蜜風味。

茶師即場沏茶｜THE MATCHA TOKYO

對生活有態度，小至一杯手搖都想飲得精緻啲，喺屯門行街就可以飲到駐場茶師即場沏茶啦。THE MATCHA TOKYO嚟自日本東京表參道，年輕茶師即席以自家茶園嘅100％有機抹茶粉、80度水、奈良高山製茶筅沏茶，入口甘甜少澀味，絕對係抹茶控福音！屯門分店更有堂食座位，好值得坐低試埋抹茶咖啡、抹茶雪糕同窩夫全日早餐㗎。

抹茶鮮奶。以100%有機上質抹茶粉、香濃牛奶黃金比例，沖泡出幼滑醇厚口感，一嚐抹茶甘醇清香同濃郁奶香。

抹茶特濃咖啡啫喱芭菲。抹茶軟雪糕選用100%有機抹茶及北海道牛奶製成，下層仲有Q彈嘅特濃咖啡啫喱。

實現牛油果自由｜More Yogurt

大家身邊一定有個牛油果控，喺屯門唔使周圍搵邊間餐廳有牛油果啦，因為呢間More Yogurt就有原創牛油果系列，品牌口號係「一杯奶昔等於一顆牛油果」，包括原創牛油果乳酪奶昔、巴旦木牛油果乳酪奶昔等，終於實現牛油果自由啦！行街行到攰，就算唔係牛油果控，都可以買返杯芒果乳酪奶昔或者藍莓乳酪奶昔，坐喺店舖嘅長梳化慢慢嘆。