有時想食正宗咖喱真係唔知點搵。由外籍大廚主理嘅 “CHUTNEY”由外籍大廚煮理，唔只完美還原傳統印度料理，印度宮廷風環境仲好靚𠻹。一入門口嘅懸垂金色綢絹已經好唯美，店內金色拱形天花用餐區，真係有種身處印度皇宮錯覺。如果拍拖食飯嚟嚟去去都係食西餐，絕對可以嚟試吓精緻印度菜。
印度香飯(Hyderabadi Dum Biryani)
雞肉/羊肉/蔬菜選擇
平時常見嘅印度料理都係咖喱為主，其實印度料理仲有好多學問。好似呢道印度香飯(Hyderabadi Dum Biryani)，就用咗“Dum”煮法，將印度長米、雞肉、香料放入鍋中，再用麵團密封鍋口，食材、香料精華會於鍋中完美融合入晒味。
Hyderabadi Dum Biryani會原個上枱，再喺你面前切開焗到金黃色嘅麵皮，蒸氣噴出嗰吓勁香，用餐體驗好圓滿。食之前記住將甜甜哋嘅炒洋蔥撈勻，每啖飯都有淡淡香料味之餘，雞肉都好嫩又彈牙。
印度香辣雞(Chicken Tikka)
相信大家對印度香辣雞唔陌生，而“Chutney”吸引之處係有Tandoori大窯爐炭烤，瞬間高溫可以鎖住雞肉肉汁。所以香辣雞外層有陣炭香，但咬開一啲都唔乾。
大廚特別為香港人減低辣味，如果自問好食得辣嘅大家，絕對可以叫佢哋加辣㗎。呢款傳統料理會跟配辣辣地嘅青醬，想滑啲又無咁膩可以蘸乳酪醬。
燒盲鰽咖喱(Malabar Fish Curry)
平時多數食咖喱雞、咖喱牛，呢道燒盲鰽咖喱嘅魚味無肉類咁濃，反而更突出咖喱味。呢款咖喱唔係好辣，第一啖仲會覺得幾甜，再慢慢滲出椰奶味，女生應該幾鍾意。
牛肉馬薩拉(Beef Rara Masala)
其實Rara Masala係印度一種濃郁醬汁，濃中帶辣。牛肉仲燜到入晒味，肉質腍到細細力咬落去已經化開。而且牛肉份量勁多，完全係肉控福音。叫多份印度烤餅包住牛肉食，一咬爆汁好正。
CHUTNEY
地址: 中環雲咸街75-77號嘉兆商業大廈4樓
電話: 23300027