鳥山名

放工約咗朋友去愉景新城行街食飯，啲市集檔好有特色，行得好開心🤣買完嘢之後揾咗間日本餐廳食晚飯。勁多嘢食揀，真係包羅萬有，所以我地壽司🍣串燒🍢鍋物🍲刺身都有點🤣刺身三點(大拖羅、中拖羅、赤身) $170 (各一切)————————————本身都好鍾意食拖羅，再加上係料理長特別推介，所以點咗Set試試。個大拖羅真係勁肥美，一入口啲油脂就標晒出嚟；中拖羅個油脂比例都高，夠肥美；赤身入口較爽彈，魚味較重，食晒三件好滿足呀。串燒厚切牛脷心 $80————————————一份有兩串，每串有兩大件，最緊要係真係燒得好好食呀，燒到剛熟，個芯有少少軟綿綿感覺，勁多肉汁，真係好厚切，非常入味，口感脆彈、有嚼勁，韌度剛剛好！真係好出色嘅燒牛舌。串燒雞皮 $38————————————一份有兩串大大塊雞皮，保持雞皮煙韌嘅燒法，表面有少許脆口，口感勁正，保留到雞皮邪惡到爆嘅油脂，燒得剛剛出，啲雞油味逼晒出嚟。北海道海膽壽司 $68 (件)————————————好Creamy嘅海膽，入口即融😋海膽三文魚花之戀 $48————————————哇依個配搭真係正呀，海膽嘅Creamy口感加上三文魚嘅鮮甜同油脂，好邪惡呀🤣安格斯牛肉火鍋 $132————————————牛肉份量都好多，本身已經有皇帝菜、金菇、京蔥心、燒豆腐、冬菇等等嘅配料，仲有好多配料可以追加，我地追加咗個手打烏冬($45)，食到好飽呀🤣…查看更多

依間餐廳係愉景新城屹立左好多年, 以前學生時代一直覺得好貴唔敢食, 今次終於去試下。因為平時行過都見好多人等位, 所以中午打去訂七點兩位。 去到仲有好多位，可能平日關係, 不過過左陣就滿場了‧一入到去帶我地坐底之後就比張QR code我地, 再奉上熱荼同餐牌。睇左個餐牌一陣發現樣樣都想食, 唔想煩所以今次就叫左個二人餐 – 自選極上二人套餐($698) 然後追加兩杯野飲 – 白桃玉露($20)& 陽光兵團($25), 再額外單點份串燒雞皮($38)。最後埋單連加一$859/2位。落完單之後好快就上左個前菜比我地，一份係鮟鱇魚肝，另一份食唔出咩黎。因為一向唔太好肝類野食，第一次試鮟鱇魚肝覺得還可以，另一份黃色望落似水蛋食落似兒時零食芝士腸，依個覺得麻麻地。之後就上刺身，厚切三文魚、厚切吞拿、甜蝦、生蠔。依四樣都大件又抵食, 生蠔好飽滿仲有個汁幾特別。然後就上熟成蕃茄芝士沙律，佢個沙律汁另上，仲要個汁好特別, 幾鐘意。飲品都上喇, 陽光兵團有幾種生果打出黎的果汁, 味道可以，不過放左一陣汁同渣分離。白桃玉露就係桃味加D椰果條唔太特別。個人覺得可以唔洗加野飲(酒除外)，飲茶都已經好足夠。一直都有職員係旁邊行過幫手收碟同加水。佢地會睇我地食完一道先一道咁上菜, 又唔會好急, 所以都食得好舒服。食完沙律就到壽司喇, 有五款，其中最鐘意食個魷魚壽司。之後就上我地額外點的串燒雞皮，依個雞皮係我食過第二好味的燒雞皮！雞皮再配左小小雞脂，食落口又唔會覺得自己食緊肥膏而且唔油膩，好食！再黎就係鵝肝多士、銀鱈魚西京燒、燒蠔。鵝肝多士覺得塊多士大左少少，但鵝肝好食。西京魚係成個餐最好食的(下次我會單點銀鱈魚西京燒黎食)，好好味而且肉唔會散。燒蠔佢冇燒到熟哂，出黎仲見到佢好飽滿，不過唔係我想像中ge燒蠔所以有少少扣分。之後就係西格斯牛肉煲，有西格斯牛肉片、皇帝菜、蛙蛙菜、粉絲、京蔥、豆腐、冬菇、洋蔥仲有隻生蛋。依個煲做完結真係岩岩好, 個湯底甜甜地再配埋西格斯牛肉絕配！最後就係甜品，有四款 – 木糠布甸、紅豆芝麻奶凍、綠茶麻糬、餅乾配朱古力忌廉。甜品對於我黎講有點遜色，四款味道都好淡而且唔岩我地口味。其實依個二人餐有好幾樣都係比我地選擇要點配捨，整體黎講都好滿意！會再黎食，不過下次就唔會再叫二人套餐而家單點野食，特別係雞皮同埋銀鱈魚，仲要試埋今次冇叫到但好想試ge燒菠蘿！…查看更多

前日(27-12-2020 Sat)晏晝,同老公送完膠同衫後食晏,去No Boundary?唔去住lu,因為好似好耐冇食日本嘢,而我記得想食嘅呢間,於是走嚟,我哋去到唔算好多人,等一陣入得,但限時一個鐘.坐低後睇完大大份menu後,決定要兩個假日定食,而定食可配刺身或餐飲,我哋都要生刺身3片.1. 生刺身3片端上嚟時,我哋重以為係wasabi豉油,原來呢3件刺身係好細件,有螺,魷魚同三文魚,口感味道正常,後兩者都薄切.2. $115.00嘅8件壽司定食,配牛肉/蟹柳手打烏冬,沙律,前菜,茶碗蒸蛋同甜品老公揀咗牛肉,牛肉正常嫩滑,我就冇試手打烏冬.8件壽司由呢間嘢自由發版,口感都正常,不過有啲飯好似硬硬地.3. $96.00嘅醬油漬牛舌稻庭烏冬,同樣配沙律,前菜,茶碗蒸蛋同甜品睇見醬油漬牛舌雖然有8片,但薄切,係切到好薄好薄,好似最多得2毫米,但味道仍然好濃郁.稻庭烏冬就唔算好彈牙.湯底只有唔多嘅醬油漬,算OK嘅.沙律好味,係醋嘅功勞.前菜算開胃.茶碗蒸蛋滑,除咗冬菇外,重有魚片,瘦肉同白果.甜品係日式抹茶麻糬,味道口感正常冇驚喜.而由於想要$138.00嘅大滿足甜品係未有,老公就再叫啲,原本想要$42.00嘅串燒鮮鵝腸,但又冇,咁就要:4. $42.00嘅串燒鮮雞腎微鹹彈牙,唔錯.味道: 5分5. $32.00嘅串燒雞皮超邪惡,脆卜卜.6. $58.00嘅蕃薯雪葩好細個好凍同好甜,但唔似雪葩似雪糕.味道: 4分7. $58.00嘅迷你南瓜雪葩呢個味道冇咁甜,好清.味道: 4分味道係3.56分服務:會密密收嘢,但唔會密密斟玄米茶.會問我哋雪葩上得未.…查看更多