去台灣，台式牛肉麵係其中一個必食item，今次介紹香港5間牛肉麵畀大家，間間由湯底、牛肉製法同麵條都有自己獨門秘方，例如台灣新竹嚟嘅過江龍、元朗經常排長龍嘅小店，同埋前半島酒店大廚及調酒師主理嘅台日fusion餐廳等，睇下邊間啱你心水～
台灣新竹市超人氣 段純貞牛肉麵 
過江龍牛肉麵專門店，品牌堅持唔用現成桶裝牛脂製作，而係使用新鮮肥牛提煉出天然牛油脂製作。招牌紅燒腱心牛肉麵用上牛大骨、23種中藥材同香料慢火細燉數小時而成，溫而不火、濃而不膩。而牛肉選用上筋肉比例最佳嘅牛腱心，油脂呈花紋狀，Q彈又有肉香。如果重口味人士推介揀呢款麻辣蒜味腱心半筋半肉麵，辣得嚟又唔會太嗆口，兼有椒麻嘅香氣。每款麵都可自選手工粗麵或幼麵，前者有口感而且滑溜，而後者就更能吸收湯底精華。
台灣人店主主理 六両三
店主來自台灣，店舖都充滿濃濃台灣風味～鎮店之寶係店內嘅兩煲牛骨湯，先用10斤牛筒骨熬至少30小時，然後將一部分湯底轉到第二個煲，加蔬菜、香料藥材等繼續用文火熬製，真係心機之作。牛肉麵湯底有川味紅燒同清燉兩款，湯底無味精，熬製過程亦冇加清水，紅燒湯頭濃郁帶微辣，但又唔會覺得膩，清燉湯則帶蔬菜清甜。
圖: phonebus
兩食牛肉麵 二悅
呢間牛肉麵有兩種食法，一開始先以拌麵形式呈上，手工日曬麵條配上醬油及自家製蔥油，香濃得嚟又唔蓋過麵條麵粉香氣。之後就可以自己用湯碗試下紅燒湯底嘅味道，啱食嘅可以加入變成牛肉湯麵。紅燒湯底用牛骨湯加上如番茄、紅蘿蔔、洋蔥等蔬菜熬成，香濃得嚟帶蔬菜嘅自然甜味。牛肉呢就選用牛腱部位，每一塊都係厚切，半筋半肉好軟腍。
圖: 地道台式料理 台灣郎
好有台灣夜市感覺嘅餐廳，紅燒牛肉麵係招牌菜，湯底煲到微微紅色，牛肉湯底超濃帶蘿蔔嘅香甜，唔會太鹹。紅燒牛肉連住部分筋位， 肉質綿軟又有咬口，麵條係扁身啲嗰款，軟硬適中而且都幾吸湯。
圖: 前半島酒店大廚主理fusion店 木玥巷
呢間舖主打台灣同日本菜，招牌紅燒牛肉麵湯底夠晒清甜，以牛骨、蔬菜同水果熬成，就算飲晒成碗都唔會口渴，足見店家誠意！而且一碗入面有牛𦟌、牛筋加牛肚，入味軟腍。麵條呢度就走煙韌Q彈路線，啱晒鍾意食有咬口麵條嘅朋友～
圖: corgiboo
文: Yanica