今個月嘅十強可以話係呼之欲出，因為全城期待嘅話題餐廳終於登場，同時亦有唔少人氣餐廳冒起，識食嘅你就算冇食過都一定聽過！事不宜遲，即刻同大家睇睇今期流行先，真係食極都食唔切呀！
第10位 養心殿台式養生鍋
「港版無老鍋」繼續大受歡迎，足料嘅寧神養心鍋係首選，藥材香料味濃郁，未落配料一定要先飲湯！另一款招牌麻辣鍋，有齊鴨血及凍豆腐，建議嚐辣人士可以點中辣或大辣，更加過癮！早前引入澳洲和牛及鹿兒島A4和牛等新配料。溫馨提示早少少或食宵夜都有優惠，更加抵食喎！
圖：第9位 餃掂手工餃子雲吞專門店 (*新上榜)
餃子係近期香港人新寵，所以呢間餃子專門店就正中下懷啦！夠膽以「天下第一餃」自居，食評都讚皮薄餡足，而且款式選擇多，好似中山金吒蒸餃子、煎軟心芝士餃、粟米豬肉餃等，而最多人食嘅係松茸豬肉餃，配上一碗以粉葛鯪魚湯，係平靚正嘅醫肚之選。
圖：第8位 スーパー丼
海鮮丼雖然冇早排咁紅，不過天氣開始熱，相信又會多返人食！呢間走小清新路線嘅丼飯專門店仍然不乏捧場客，招牌北海道海鮮丼以外，可以試試其他款式好似最啱夏天食嘅北海道帆立貝北寄貝赤貝丼、吞拿魚三色丼、馬糞海膽丼啦，仲可以自選海鮮配搭添。
圖：第7位 大笪地火鍋 (*新上榜)
天氣熱無損大家打邊爐嘅興致嘅，呢間新店最出名係超濃花膠雞鍋，湯底呈金黃色，濃郁鮮甜亦無味精，而且有大量花膠筒，雞肉亦嫩滑。配料唔算特別多，但貝類就有唔同選擇，好似花蛤皇、刀蚌、胭脂蚌及卜卜蜆等，全部放喺海鮮檔水缸入面，即叫即撈好新鮮。
圖：第6位 一糖 (*新上榜)
呢間位於天水圍嘅甜品店相當有特色，佢係位於屏山嘅一棟獨立屋，雖然感覺相當日式，但甜品款式好多元化，有日式嘅抹茶甜品、沖繩紫薯系列，亦有港式嘅芒果腸粉、雜果紫米露等，甚至黑芝麻及榴槤口味心太軟、芝士撻都有！賣相同質素都唔錯，難怪咁多人專誠去食啦。
圖：第5位 高興 (*新上榜)
呢間新開嘅café位於工廈入面，餐廳裝潢好有心思，其中一角以懷舊港式理髮廳設計，打卡一流！記得要試試呢度帶fusion口味嘅菜式，有昆布菜脯大蝦意粉、蒜香豆豉鯪魚意粉、炸雞翼配煉奶等，創意十足。而且有舞台可以俾本地音樂人jam歌，當然要支持！
圖：技巧樹熊
第4位 Joō de Rolls (*新上榜)
呢間café主打西班牙人當早餐的傳統小食炸肉桂條churros，質感味道都有啲似油炸鬼，新鮮即叫即炸，上枱時仲係熱辣辣！有女生最愛嘅抹茶味，芒果及士多啤梨，或者可選擇配刨冰。唔係淨係得甜品，鹹點有咖喱蛋包飯、竹炭漢堡、熱士熱狗等，唔食甜品來食飯都得！
圖：第3位 鯛魚湯專門店
上個月第一位嘅鯛魚湯專門店今個月微跌兩位，魚湯專門店比較少有，所以值得專程去試試！如果已經食過招牌菜皇帝蟹腳海膽湯飯，可以試埋好似刀削麵咁粗身嘅羽衣烏冬，質感滑溜，而且索晒濃郁魚湯，一樣好味，配料亦可以揀象拔蚌、廣島蠔同鮑魚等海鮮。
圖：第2位 風雲丸 (*新上榜)
來自日本廣島嘅沾麵店，一開業即進佔第二位，日日都大排長龍！招牌豚骨魚介湯底，以大量豬骨、雞骨、魚介粉、沙甸魚油、魚介醬油等材料，熬超過十小時而成，味道極濃，而且放入石鍋入面滾住上枱，食到中途加檸檬汁可令湯底更有層次。最後亦可追加香鬆飯放入湯中，就係最地道嘅食法！
圖：joey-in-wonderland、chongjacky
第1位 芝樂坊餐廳 (*新上榜)
大熱登上今個月榜首，唔使問一定係The Cheesecake Factory！呢間美國連鎖餐廳，當地都要等位，來到香港當然同樣排晒大隊。餐牌選擇超多，沙律、意粉、海鮮、漢堡及三文治等，份量都係美式重量級。來到唔食皇牌芝士蛋糕等於冇來過，有成30幾款一定試唔晒，首推紅絲絨同OREO味！
圖：文：Perrins