日本菜係永遠唔會令人煩厭！旺角最近新開一間全新嘅日式居酒屋，裝潢以花為主題，天花上掛上滿滿紫藤花，好有風味～食物方面都有誠意，選材新鮮外仲配上師傅自家秘製醬汁，味道都幾有驚喜，而且新張期間仲有限定嘅龍蝦刺身優惠，同坊間比平一大半，一定唔可以錯過！
鮮龍蝦刺身（$388/每日限定10枱）
原價$688嘅鮮龍蝦刺身，而家推出優惠價$388，可以話係全城至抵！餐廳選用澳洲龍蝦，即撈即劏，龍蝦鮮味十足口感有彈性，點少少豉油及wasabi食啱啱好。
芝士蛋黃龍蝦包（$168）
自創嘅芝士蛋黃龍蝦包，選用波士頓龍蝦，香脆嘅多士配上龍蝦肉及師傅秘製嘅明太子醬汁，惹味之餘仲食得出龍蝦鮮甜，蝦肉一樣咁彈牙，食完麵包記得要食埋個龍蝦鉗。
黃金大蝦燒（ $138）
大蝦即叫即燒，香氣十足，加埋師傅秘製嘅蟹子醬汁夠晒惹味。
生牛肉他他（$288）
選用高質素嘅安格斯牛肉，牛肉無經過冰鮮，所以食落口感軟腍，唔會有雪味，加上洋蔥食口感及味道都更豐富。
三文魚親子丼（$108）
鍾意食三文魚籽嘅朋友就唔可以錯過呢個有爆丼效果嘅三文魚親子丼，厚切三文魚配埋自己醃製過嘅三文魚籽，味道鹹香～
原隻牡丹蝦（$60）、黃金牛油煎蠔（$68）
牡丹蝦刺身內加入秘製海膽醬，海膽醬用新鮮海膽製成，令牡丹蝦鮮上加鮮。而黃金牛油煎蠔就選用廣島蠔，隻隻都好肥美，加上牛油煎成就更香。
地址: 旺角彌敦道558-560號譽發商業大廈1樓
文、相: Yanica