成日思鄉嘅朋友，未儲夠假同錢返鄉下嘅話，近近地去住中環先啦~ 嗰度開咗間日式飯堂，以由早食到晚嘅概念，一個空間入面有三間餐廳，分別有精品烘焙麵包、殿堂級甜品店同燒丼專門店，早午晚三餐都食到家鄉風味呀。

殿堂級甜品店  Chez Shibata

呢間甜品店嚟自名古屋，係國際甜品大師Takeshi Shibata創立嘅品牌，給合咗法國甜品嘅精髓同日本嘅手藝，款款甜品都係以日本雞蛋做原材料，有樣有餡，打卡實呃到like。

招牌甜品野莓心形蛋糕當然要喺度鎮店，以朱古力調色製成嘅紅絨毛心心，有種高貴嘅感覺，心入面係酸酸甜甜嘅果漿果凍，係女生見到都會心心眼。

至於小紅帽 - 櫻桃酒朱古力蛋糕同紫醉金迷 - 紫薯忌廉撻兩款，都係香港限定嘅。前者又朱古力蛋糕又朱古力mousse，味道極濃。但又唔使怕甜膩，因為同時仲有紅桑子果醬同櫻桃酒，酸酸地甘甘地咁；至於後者，係大家嘅飛佛紫薯，同杏仁撻底，甜甜der。

 十層西尾抹茶蛋糕、士多啤梨忌廉撻

日式洋風精品烘焙麵包店   BEAT Bakery

一入門口就見到嘅麵包店，主打七彩顏色嘅歐軟包，以100%日本直送麵粉、天然酵母每日手工製作，作為早餐都幾醒神。

最推介嘅係薯薯家族，唔使介紹就咁望都知呢個係蕃薯包，紫薯同黃金薯都一眼望到，真‧蕃薯肉嚟，冇加任何糖分，但就好香甜，口感綿密，蕃薯控會唔小心愛上。

粉紅色嗰隻係火紅龍捲風，啲粉紅色就係由紅肉火龍果調出嚟嘅，但食落笨冇火龍果味，只係酸酸甜甜嘅紅莓乾同軟芝士；粉藍色嗰隻就係藍色風暴，即係藍莓加新西蘭軟芝士，酸得幾有層次。

黑色就唔一定係竹炭嘅，都可以係墨魚，入面爆多餡，又煙肉又火腿又洋蔥又芝士，係惹味嘅。

日式燒丼專門店   廿一堂

正餐就要入廿一堂喇，燒丼飯，將軍澳都有間嘅，但係山形拖羅三食就係中環呢間先有得食。一碗飯食晒吞拿魚拖羅蓉、三文魚籽、黃金魷魚、蟹肉同油甘魚。所謂三食，就係可以刺身先點芝麻醬，再撈飯一齊食，最後就係茶漬飯，各有特色。

炭燒鳥丼就係新出嘅，中環區50零蚊食到個lunch都算係咁。雞脾肉嚟，幾滑幾多汁，用600度極高溫嘅專門熱爐直接燒製，帶有微微炭香。

酒都有得飲，呢杯係蕃茄生啤，夠晒冰凍夠晒爽，但蕃茄味就比較淡，唔認真嗒都未必飲得出咯科科。

新開張通常有著數，由1月19到25號，喺甜品店同麵包店堂食消費滿港幣100蚊，就會送一件脆脆泡芙（雲呢嗱味），不過名額限量50個咋。

BEAT Bakery、Chez Shibata、廿一堂
地址：中環士丹利街33號地下
開業日期：2019年1月18日

文：Kar
相、片：Tom Li