呢個時候大家都「我只想身體健康」，飲返碗雞湯補下點睇？太子呢間小店主打花膠雞米線，用近20斤雞、豬肉、鯊魚骨等熬煮濃湯，配搭滷水三黃雞肉同冰島鱈魚膠，好味又養生。另外仲有魚湯米線、秘製口水雞、惹味小食等唔同選擇㗎。
 

癡膠雞嘅廚師每日熬製濃雞湯同魚湯，雞湯用雞、豬肉、鯊魚骨等，而魚湯主要就用梭羅魚，都係先炒香再熬湯，保證出味咁就唔使用味精啦。
 

招牌癡花膠雞濃湯米線（$68）

湯同米線分開上，湯下面有火保溫，食得慢都唔怕呀。裡面嘅花膠係冰島鱈魚膠，當地海水優質而且無化學污染，花膠質素亦自然有保證。而雞肉就選用三黃雞，特色係皮薄肉嫩，骨細味濃。
 

雞湯口感的確幾厚身，睇落幾多油但飲落唔會太油膩，雞香味濃郁。而雞肉的確做到肉質嫩滑，而且浸喺雞湯裡面雞味真係特別香。花膠唔會太薄，滑身得嚟亦夠軟彈唔過腍。雞湯補身就唔少人都知，加上花膠有豐富膠原蛋白，可以補充蛋白質，亦有助滋陰潤燥。
 

口水雞魚湯米線（$42）

雞湯唔啱嘅話仲有魚湯，奶白色嘅魚湯用梭羅魚熬成，貪佢價錢公道味道鮮甜，而且師傅處理得宜，就算魚湯凍咗都唔會有魚腥味！而口水雞就用餐廳自家調配嘅醬汁，用咗十幾款香料，香料味道好出，先麻後辣，辣度適中唔會嗆喉。
 

 

北菇花膠蝦子撈麵（$52）

另外亦有撈麵，撈麵嘅花膠無浸湯所以口感更爽口。最值得一讃嘅係蝦子落得夠爽手，絕對唔使驚唔夠撈，啖啖都有蝦子香呀。撈麵會配埋雞湯同秘製辣醬，辣醬就麻辣各半，鍾意食辣嘅朋友可以落多啲！
 

椒鹽粟米（$28）

食麵太單調呢度亦有唔少小食，椒鹽粟米就夠香口，而且粟米食落又甜又多汁，真係會唔小心一件接一件咁食唔停。
 

金磚豆腐（$28）

餐廳另一推介係金磚豆腐，一啖一粒細細粒咁，外脆內嫩而且完全唔油膩。不過留意返擺得耐嘅話層皮會變腍，建議大家盡快趁熱食呀。
 

羅漢果桑葉菊花茶

最近新型肺炎肆虐，老闆好有心咁煲咗羅漢果桑葉菊花茶免費請各位食客飲，飲落有淡淡菊花香同羅漢果嘅甜味。功效方面，羅漢果可以清熱潤肺，桑葉有助緩解咽喉腫痛，而菊花就可以清熱去火，幫助預防肺炎。
 

癡膠雞
地址：太子荔枝角道78-84號勝興樓地下D號舖

文、相、片：Cathy