搵個weekends短短地飛返轉台灣，對好多香港人嚟講都係一件平常事（好似係）。如果你每次去都係喺桃園機場落機之後，就直接搭車出台北飲飲食食，少年你太年輕了，桃園都有好多好西食！

DIY小籠包   點水樓

有選擇困難症嘅人嚟到呢間主打江南料理同點心嘅餐廳，肯肯定會病發，因為呢度真係太多嘢食揀喇！唔講其他，淨係講小籠包，都有最少4隻味呀！XO醬啦、九層塔啦、麻辣啦（鍾意辣嘅人記得食！堅辣！），仲有一隻係DIY味！DIY味即係咩？咁要問你自己喇，事關呢度有小籠包教室，你可以自己親手包一籠小籠包出嚟呀！另外仲有雪糕聖代同雪糕蜜糖吐司嘅DIY班。

脆皮烤鴨（aka片皮鴨）都有兩種味，除咗平時食開嘅甜麵醬之外，可以試埋搽桂花蜜醬，清清地甜甜地，同隻片皮鴨又意外地夾喎，小清新！又，如果鍾意食芋頭嘅，必試桂花芋頭同甜品皇室俄羅斯冰淇淋佐百果芋泥！前者混入蜜糖同桂花，後者口感更加豐富，芋泥係熱的，配云呢嗱雪糕，一冷一熱，令甜度都分咗幾個層次。

桂花蜜啫喱   大溪花海農場-梵谷之家

桃園巿同台北巿嘅感覺好唔同，桃園比較鄉郊少少，就好似呢間餐廳咁，出面有個花園，一年四季都會種唔同嘅花，好似呢秋天就種緊洛神花、一串紅同四季海棠等等。畀花海包圍住，食嘅嘢當然都以花為主題，桂花蜜啫喱咁就相當清甜嘞，花香味突出，桂花蜜就甜中帶香，好滋潤。



好手工嘅朋友仔，仲可以join埋魔幻花DIY、歐式精油香包DIY、或者香氛皂DIY嘅工作坊，自己整嚿水蜜桃、玫瑰或薰衣草味嘅靚靚皂拎走，成件事即刻文青晒。

鮮魚料理   石園活魚餐廳

呢間開咗三十幾四十年嘅餐廳，睇個名就知係食活魚為主。佢哋整嘅活魚料理，由清蒸、熬湯、到煎炸等等咩方式都有。其中陶板絲瓜魚片，基本上成個湯淨係得絲瓜同魚片咁滯，所以夠清，味又夠鮮！紅橋芝麻魚餅都係另一道推介，聽完個名就望下個樣，以為佢咪又係煎魚餅~ 點知食一啖，你真係估佢唔到！甜嘅？甜品嚟㗎原來！將魚肉混入冬瓜糖同桔餅再炸，係幾有驚喜。

超抵芋圓豆花    大溪老街

去台灣掃街係指定動作，桃園都有條叫「大溪老街」嘅街，超多嘢食，吃貨可能行兩步又要停一停，食一食。



食爆谷為主嘅正豐米麩，每日都會即場鮮製爆谷，如果你撞啱時間行過，就可能會突然聽到「呯」一聲，堅爆‧爆谷嘅聲呀！新鮮爆好熱辣辣咁食又幾香口。



而老店大房豆干亦有好多種唔同口味嘅豆干揀，原味、黑胡椒、炭燒等等。



大溪拿破崙派嘅拿破崙蛋糕好酥脆下，一層原味一層朱古力味嘅戚風蛋糕再夾埋核桃同提子乾，每啖食落口感都好豐富，即場買即場食固然最新鮮啦，買返嚟做手信都得嘅，但就要小心運送喇，驚散呀！



而陳師兄素肉圓更加係呢區惟一有得食素食肉圓嘅老店，肉圓皮入面包住香菇頭、素麵輪同筍乾，係清爽嘅。



最後最後一定要講嘅，係大家都超鍾意嘅芋圓！和風手工豆腐酪以食豆腐酪為主嘅，之但係無論係豆花定豆腐酪，都一定有芋圓同地瓜圓跟碗呀！煙煙韌韌，正！豆花酪就有抹茶、芝麻等等揀，成碗嘅配搭都係香港人大愛之食，重點係咩呀？抵食吖嘛！40-45蚊台幣一碗咋！圍返港紙即係大約10蚊碗咋！！！

文：Kar



其他國際新食力：
麥記新推爆醬Nutella漢堡 暫只在意大利有得食
可樂招紙一拉變絲帶！日本新出聖誕限定版
日本人氣鬆餅進駐台灣 地區 限定抹茶口味 頭3日免費食

 

隨時接收最新資訊
讚好OpenRice專頁！