黃埔掃街又有新選擇喇，有間啱啱開咗一星期左右嘅小店，主打英式Fish and chips嘅，魚/海鮮同醬都各有7款選擇，薯條都有2種，即叫即炸夠晒脆口。

7種海鮮分別有招牌鱈魚、三文魚、龍利柳、魷魚圈、鮮蝦、帶子同每日限量10份，肉身較厚嘅紅鯛魚，老闆Jason話盡量都係揀深海魚嚟用，因為可以確保到魚嘅鮮味。

全部都係即叫即炸㗎，就連炸漿都係自己調配嘅，加入咗黑椒、鹽、糖等。炸出嚟層炸皮薄薄地，好脆口，鱈魚亦夠鮮嫩，唔使點醬，就咁食都夠味。而魷魚圈就同坊間食開嘅有啲分別，唔韌得嚟仲要好腍身，各有fans啦。

不過，有醬冇奶油唔點埋嘅，7種醬料嘅選擇包括他他醬、招牌黑松露醬、泰式甜辣醬、蜂蜜芥末醬、辣蒜蓉蛋黃醬、麥芽醋同茄汁，每個餐可以揀兩種醬。大部份都係由Jason親自調製嘅，例如佢最推介嘅黑松露醬同他他醬咁，醬嘅味道非常突出，前者夠香濃，後者仲可以食到一粒粒酸黃瓜添，真材實料呀，不過亦由於太香嘅關係，建議大家點醬時，唔好點太多，以免搶咗魚原先嘅鮮味，變咗食醬而唔係食魚喇。

話明fish and chips，點可以少咗chips？薯條係個餐pre set咗嘅，可以轉甜薯條都得，即係蕃薯條，啱啱炸起即食就最開心，香香甜甜咁，都值得加少少錢轉呀。一盒份量都唔少，跟餐仲有埋杯lemonade，酸酸地中和返，可以降低啲啲罪惡感（好似係）。

Jason's Fish and Chips
地址：紅磡民泰街25號黃埔108商場一號街舖地下

文、相：Kar