你睇，係人見人愛嘅部長熊本熊呀！原來呢間日式雪糕店最近同日本熊本熊合作，推出期間限定嘅士多啤梨軟雪糕，同時仲有一系列士多啤梨甜品同其他吸睛甜品！
 

Milk Top今次同熊本縣嘅果園果楽合作，用嘅當然係由日本新鮮直送到港嘅熊本士多啤梨，亦係熊本熊第一次喺海外推出嘅雪糕呀！最吸引嘅一定係呢杯熊本縣士多啤梨軟雪糕，落足士多啤梨果肉再搭配北海道3.6牛奶，無添加人造色素同添加劑，味道天然甜美。
 

不過軟雪糕只會喺有雪糕機嘅九龍灣同樂富分店供應，而且期間限定供應至6月7號，Fans想試就記得留意啦。
 

其他區嘅朋友仔亦唔洗咁快失望，其他分店亦有呢杯熊本熊士多啤梨雪糕，上面印住部長得意大頭，入面一樣係熊本士多啤梨加北海道3.6牛奶製造嘅雪糕，可以食到一粒粒果肉一樣滿足。
 

唔夠喉嘅話仲有蛋糕同雪條，一邊食雪條一邊將蛋糕帶返屋企慢慢回味亦得，得咗。
 

同場加映同樣大受歡迎嘅北海道粟米雪糕，北海道粟米味道清甜而且香味濃郁，好似食緊杯凍嘅日本粟米湯咁。如果口感可以再滑少少咁就更好喇。
 

想食一粒粒粟米口感就可以一試呢件粟米蛋糕，裡面有原粒粟米，外層就係白朱古力同粟米慕斯。
 

而鐘意相機食先嘅朋友仔一定要留意呢款手工花花，唧花相當精緻！其實佢係寒天再唧入混入天然色素嘅椰汁。賣相吸引又唔Heavy，同樣係夏天之選。 
 

文、相、片：Cathy