好多人都覺得食糖水就等於同唔健康劃上等號，其實只要食得正確，食糖水都可以健康㗎！大角咀呢間糖水店主打中式養生糖水，同時加入少少創新元素，咁就健康得嚟又好味啦，店內仲有超過六十款糖水甜品供選擇，真係多到唔知點揀！

負責人KEN就話因為佢爸爸係一位中醫，所以佢地就知道點樣搭配食材，令到糖水發揮雙倍功效。同埋佢地嘅糖水同甜品都堅持唔用砂糖，只用黑糖、片糖同冰糖。

桂花蜜鮮淮山(細$40/大$70)

選用鮮淮山，將淮山磨成蓉後堆成一個小山形狀，加上桂花蜜增加甜味。鮮淮山磨成蓉仍然保持到營養價值，更有健脾益胃功效，呢個甜品咩人都啱食～

錦衣衛($42)

呢款可以話係新式同舊式嘅結合啦，傳統中式糖水芝麻糊底下有大菜糕，上層再加上馬豆糕、小丸子同花生碎，無論味道同口感都咁豐富。

金沙腰果糊($42)

平時都係食開合桃露多，腰果糊就少見啲啦！腰果先焗後磨，磨完後加入新鮮米漿煮成糊狀，再加上新鮮腰果粒增加口感，食得出真材實料！

六神合體($74)

呢款甜品包括椰汁紅豆糕、椰汁馬豆糕同黑糖紅棗糕，同坊間唔同嘅係特意用上魚膠粉取代罌粟粉，會有入口即溶的feel～另外三神就係三款味道嘅糖不甩，分別係傳統薑味、新式抹茶同鐵觀音味，全部都係手搓㗎～老闆建議先由淡味啲嘅茶味開始食先。

白山黃河($48)

可以話係升級版嘅楊枝甘露，入面有3.7牛乳布丁，牛乳味香濃。西米有利尿、而椰子就有滑腸功效，平時有便秘問題嘅朋友可以考慮吓食呢款。

天糖鳥  

地址: 大角咀利得街14號家慶樓地舖

文、相、片: Yanica