甜食系 KitKat 玉露朱古力威化
KitKat又係愈出愈多口味，呢隻玉露味係最近喺日本零食舖度見到嘅，梗係又買返office試下啦。佢唔係平時一條條咁嘅樣，而係一粒粒波波咁，開飯仔隔籬個同事話似泥膠喎。一包唔係好多粒，不過又幾好食，外層係玉露茶朱古力，甜得嚟有茶香，中間就係威化層，成粒波波食落就好鬆脆。
純包裝吸引度：****
一試愛上度：*****
飽肚系 Oreo超薄版
有時食零食係為咗過下口癮，但有時都真係要頂下肚，零食櫃唔可以淨係得薯片，有幾包餅都好重要。呢隻超薄版Oreo呢次出嘅超薄版暫時得云呢嗱同Tiramisu揀，不過薄得嚟中間嘅餡同原本嘅比，又唔係差好遠，純碎係「薄餅」啫。口感幾好，好脆，但朱古力味就輕咗，冇咗Oreo嗰種精髓，但係8.5一盒兩包夾埋16塊，作為填肚嘅零食又幾抵。
純包裝吸引度：****
一試愛上度：****
勇士系 綠茶牛奶
最近行開便利店就會發現，除咗有普通牛奶、香蕉奶、木瓜奶同士多啤梨奶之外，仲多咗盒綠色嘅奶，望一望，原來係新出嘅綠茶低脂牛奶。自問係抹茶控又好奇心重加有少少勇氣嘅，買返Office搵朝早餐飲下都好。唔使驚，正常牛奶味嚟，開盒嗰陣都聞到幾香嘅綠茶味嘅，不過飲落就淡少少啦，都有啲甘澀㗎。
純包裝吸引度：***
一試愛上度：**
貪新鮮系 Chitato營多撈麵味薯片
最近有隻新出嘅薯片，係營多撈麵味呀！平時食撈麵就食得多，變咗薯片會係咩味？答案係……都係咁嘅味！一開個包裝，撈麵味已經撲入鼻。呢隻味嘅像真度都幾高，好似食緊脆嘅Indomie咁，香就幾香，不過就愈食愈辣，食晒一包都幾頸渴。
純包裝吸引度：****
一試愛上度：****
貪新鮮系 什錦水果味辣鞋帶糖
呢隻糖幾特別，成條糖都舖滿晒啲糖喺面，你以為佢會好甜啦，點知又唔係喎，甜得嚟慢慢嗒真啲，會嗒到啲辣辣地嘅味，第一次食感覺都幾得意。一包入面有4隻味㗎：菠蘿、芒果、熱情果同青檸，所以正確嚟講，每條糖都有3種味，甜、酸、辣，哈哈。
純包裝吸引度：***
一試愛上度：***
抹茶系 桃哈多濃抹茶味牛角包
抹茶一向當道，office時嘅零食又點少得佢？首先要介紹嘅係呢隻桃哈多濃抹茶味牛角包。喺office做嘢做到悶悶地，最好就係搵啲脆脆地嘅零食嚟食，卜一卜醒神啲嘛。呢隻牛角包就啱哂嘞，食落嘅質感除咗脆之外，仲都有啲硬度，感覺好實在。而做得首推嘅，味道當然都唔錯啦，抹茶味幾濃厚，甘甘甜甜，直情唔太捨得請隔籬個同事食添呀。
純包裝吸引度：****
一試愛上度：*****
抹茶系 百邦宇治抹茶焦糖爆谷
同樣都係抹茶系嘅脆脆產品，呢隻抹茶焦糖爆谷倒出嚟，見到都堅係幾綠下，不過可惜入口後嘅抹茶味就唔算話好濃，但都有少少甘甘地嘅，外脆皮內軟心，作為口痕時嘅糧食其實都算稱職。但就唔算話好大包，一粒一粒咁食下食下其實都幾快就食晒。
純包裝吸引度：***
一試愛上度：***
抹茶系 森永宇治抹茶燒朱古力
繼續都係抹茶類。森永燒朱古力其實都出過好多種味，而呢隻抹茶味都值得試一試。細細包，打開有10粒，雖然話就話係朱古力，但其實又冇想像中咁甜。佢面頭有層薄薄地燒過嘅朱古力，包住酥軟嘅抹茶，係幾香口嘅。
純包裝吸引度：****
一試愛上度：***
勇士系 味覺糖檸檬味蕃薯片
唔知你哋身邊有冇啲鍾意試新嘢嘅敢死隊同事呢？有嘅話，你大可以叫佢哋試下呢隻味覺系薯片。講明先，試下好喇，唔好太認真。如果你抱住佢會帶畀你味覺糖超酸嘅檸檬感覺畀你，你就真係會食檸檬了。冇錯，食落真係有啲啲酸味嘅，但蕃薯嘅甜味重好多，簡單嚟講，就係一塊有啲厚度而又少少酸多多甜嘅蕃薯片，但零味覺震撼。弱弱地如果真係求酸，啪碎少少用手捂落口，盡量靠個嘴唇同薯片面層嘅酸粉接觸多啲，感覺或者會重少少嘅。
純包裝吸引度：***
一試愛上度：**
童年回憶系 的嗒糖 - 爆谷味
TicTac糖簡直就係童年回憶，細細個真係好鬼鍾意食，一盒細細盒，每粒又細細粒咁，成日都唔捨得食最後一粒。最近，TicTac糖出咗幾款新口味呀！有五顏六色嘅雜果味同熱帶果味，不過最吸引嘅一定係爆谷味！開飯仔都忍唔住買咗嚟試，一擺落口，真係好有爆谷味喎，一次過幾粒幾粒咁啪都幾過癮！不過講真，比較硬，要大力少少咬，同埋都幾甜下，嗯。
純包裝吸引度：****
一試愛上度：**
OT系 日清喇沙味杯麵
杯麵都算係零食？Er… 其實就唔係好算嘅，不過多嘢做到一個點嗰陣，唔好話落街食飯，連嗌個飯盒返嚟食都覺得嘥時間，但又好鬼肚餓嗰陣，杯麵真係最佳之選，沖一沖個熱水三分鐘食得，所以零食櫃點都應該長期有返少少貨喺度，touchwood吖嘛。可能你每次唔係食海鮮味就係香辣海鮮味，下次可以試下新嘢。呢隻喇沙味杯麵，出咗都一段時間，不過就唔係成日都見到。有包喇沙粉畀你落，酸酸甜甜咁都真係幾有喇沙味，但辣就唔算好辣，食完飲多幾啖湯都OK。
純包裝吸引度：****
一試愛上度：*****
提神系 伊藤園罐裝抹茶
喺office全日都淨係飲水，有時都覺得幾dry，口痕又會想搵啲有味嘅嘢飲下。去便利店巡個圈，就畀呢罐茶吸引咗！伊籐園喎，抹茶喎，以日本為家鄉嘅朋友仔都一定聽過佢嘅大名！個罐咁靚，視覺行先嘅又忍唔住買咗罐了。一開罐，就聞到好香嘅抹茶味，不過飲落又冇咁濃，但都係香口嘅，眼瞓嗰陣飲幾好。
純包裝吸引度：****
一試愛上度：***
零食之道，一向都係在於過下口癮嘅啫，飽唔飽、好唔好食，其實都只不過係其次同其其次（好似係），開飯仔會繼續耐唔耐就去搜尋下有咩新零食同大家介紹下㗎喇！
文：Kar
隨時接收最新資訊
讚好OpenRice專頁！