約閨蜜飯局嘅話，梗係想搵間環境好又啱打卡嘅餐廳喇～但口袋名單內嘅餐廳嚟嚟去去都係嗰幾間，想帶啲新鮮感畀朋友，係時候要發掘下仲有咩美食喇！今次介紹嘅兩間餐廳都係近年先開業，一間係來自意大利嘅百年烘焙品牌，另一間就係以藝術為主題嘅Cocktail酒吧，無論你係鍾意同閨蜜打卡影相定係圍埋飲杯酒傾下偈都啱！

Pasticceria Giovanni Pina 1920（尖沙咀、荃灣）

來自意大利嘅百年烘焙品牌，係品牌於海外嘅第一間分店，由第三代傳人，與品牌同名嘅Giovanni Pina開設！Giovanni Pina為意大利首屈一指殿堂級烘焙大師，曾獲選為全球100位最佳甜點大師，今次抵港開店誓要令港人品嚐到最具意大利風情嘅蛋糕及甜點。鹹點方面，供應多款地道意大利菜，以海鮮為主打，值得一試。

意大利經典蛋糕

話明係糕點品牌，蛋糕當然不得不試！意大利蛋糕最大特色，就係喺製作過程中加入酒，加埋十幾種獨家麵粉配方，餐廳供應嘅蛋糕比市面上海綿蛋糕密度更高，更能均勻鎖住酒香，鬆軟可口，有如一件藝術品咁。招牌Saint Honorè多達五層，包括薄薄蛋糕層、軟滑嘅忌廉、朱古力吉士，同每層都會塗上嘅橙酒，層次分明。Tiramisù Modern特別之處則在於蛋糕嘅咖啡香由淡入濃，層層遞進。

意大利羅馬包薄餅

意大利最地道嘅厚身薄餅，又稱羅馬包。品牌特意由意大利直接進口最頂級嘅Italmill專用麵粉，餅底麥香十足，帶有獨特柔韌口感，而且外層酥脆輕盈有嚼勁、內層Q軟，就算食多兩件都唔會太飽肚。

鮮黑松露燴意大利飯

引入意大利百年松露品牌SAVINI TARTUFI嘅新鮮黑松露製成意大利飯，因為該品牌嘅松露來自喺意大利最適合松露生長嘅Tuscany，所以出品嘅松露香味濃郁，口感難忘。呢個意大利飯會喺上枱前刨上新鮮黑松露片，飯粒有咬口，啖啖都係黑松露香氣。

西西里島海鮮沙律

因為意大利帶好多沿海地區，所以唔少菜式都以海鮮為主打，西西里島海鮮沙律包含大蝦、帶子、青口、大蜆、八爪魚等肥美海鮮，一入口就食得出好新鮮，配埋酸酸甜甜醬汁好開胃。

蒜片蕃茄白酒汁煮青口配意大利脆包片

另一道人氣海鮮菜式，青口大隻又飽滿，一入口時番茄味好香濃，之後會感受到陣陣白酒香氣，用跟配嘅意大利脆麵包點汁食仲正，會索晒番茄汁同青口鮮味！

Avenue75（尖沙咀）

想搵個坐得舒服可以慢慢傾嘅地方飲杯酒，尖沙咀呢間cocktail酒吧就啱晒！裝修以維多利亞風為主色調，原木枱配上古董鏡，環境優雅。餐廳每隔一段時間就會推出各種主題Cocktail，今期就以藝術為主題，因為店主覺得Cocktail唔單止係飲品，佢嘅嗅覺、味覺同視覺都可以千變萬化，係一種藝術！飲酒當然需要佐酒料理，呢道集合各國美食，而且環境又好，好啱gathering～

多款串燒

飲酒食串燒就至夾～多款亞洲風味串燒選擇，首推香草牛油蝦串($75)，配上酸酸辣辣泰式汁好醒胃；燒白鱔($75)都係人氣之選，白鱔本身夠肥美重魚油香，秘製燒汁香甜惹味但又無蓋過魚肉鮮味；厚切牛舌($65)同樣配上燒汁，選用牛舌心，口感彈牙爽嫩。另外仲有泰式沙嗲雞/牛串燒，啖啖肉沙嗲汁香濃，燒秋葵加入七味粉，好惹味，款款都值得一試呀。

香草牛油焗蟹蓋

呢度嘅焗蟹蓋超新鮮！因為店主會每日親自去街市揀時令蟹，所以蟹種會每日唔同，夏天就多數用肉蟹，多肉又鮮甜，簡單加入香草及牛油焗熟，唔加太多調味料，咁就唔會蓋過蟹肉鮮味，未上枱已經聞到香氣喇～

燒牛肉青芒果沙律

夏日炎炎，當然要叫款沙律開胃降溫。呢款沙律加入青芒果，酸酸甜甜又夠凍好消暑，而且份量夠多，同朋友share食最啱。燒牛肉選用紐西蘭或澳洲牛肉，用烤爐烤至3至4成熟，肉質軟嫩重牛味，醬汁同樣配上酸辣汁，好惹味，建議大家配返杯甜啲嘅cocktail一齊飲呀。

燒原條牛肋骨．菠蘿青瓜沙律

同樣好適合夏日嘅菜式！平時食西餐多數食原條豬肋骨配BBQ醬汁，原條牛肋骨真係少啲見，呢度就將原條牛肋骨放入焗爐烤製，再配上自家製泰式酸辣汁，牛味一樣咁突出，調味上嘅配搭好有新鮮感，配埋菠蘿青瓜沙律可以中和肉類油膩感，就算夏天食都唔會覺得漏。

黃咖喱虎蝦．烤薄餅

想感受異國風味呢度一樣有。咖喱種類五花八門，餐廳嘅咖喱一開始先會感受到甜味，跟住辣味會慢慢於口腔中散發，好有層次感！虎蝦新鮮大隻，係彈牙爽口㗎。食咖喱最重要嘅醬汁又點可以浪費呢，跟配嘅烤薄餅熱辣辣又香脆，點咖喱食真係一流。

心動不如行動！有興趣就快啲約埋三五知己去嘆下美食！快啲bookmark定啦！    

*以上圖片只供參考，所有食品以實物為準. 食品供應因餐廳而異