話說，銅鑼灣Sogo地庫個超巿又有新嘢食呀，係日本嘅小食嚟，其中有款長成30厘米嘅長薯條，好鬼吸引。

呢個禮拜係超巿嘅「夏祭り」，有唔少特色嘅日本小食駐場，要數最吸引，最多人想食嘅，非長薯條莫屬！長薯條全部即叫即炸，除咗薯條點開嘅蕃茄醬之外，仲有明太子沙律醬可以淋面，有選擇困難症或者貪心仔嘅，混醬要晒兩隻都得。條長薯條真係好長，開飯仔度過，有差唔多30厘米咁長呀。啱啱炸起嗰陣食，幾脆口。

喺薯條隔籬就有師傅keep住喺度現製銅鑼櫻。其實即係銅鑼燒啲friend，不過細細粒，櫻花形咁，幾靚。總共有6款口味：朱古力、紅豆、奶黃、香蕉、士多啤梨同埋芝士。

再行入少少，就有幾款唔同嘅凍食蕃薯製品，包括大大個望落好似芒果咁嘅大圓薯、芋藏、燒芋丼同唐芋卷蛋糕。大圓薯真係成嚿蕃薯嚟㗎啖啖肉，幾甜下，食晒應該飽咗。芋藏嘅甜有啲複雜，有蕃薯本身嘅甜味亦有 面頭嗰層嘅糖漿甜味，甜魔啱晒。唐芋卷蛋糕有紫薯味同綠茶味揀。

講多句，佢哋嚟緊幾個禮拜，每個禮拜都會有唔同嘅主題祭呀，聽講其中有個係北海道，可能會有同蟹相關嘅製品呀。

詳情
崇光銅鑼灣店崇光超市B2「夏祭り」
期間限定：即日 - 7月11日

文、相：Kar