食高質西餐荷包一定大出血？其實都有唔少親民好選擇㗎。就好似黃金海岸呢間4000呎餐廳，坐擁無敵海景，室內樓底高之外景觀仲好開揚，有大玻璃畀食客邊睇海景邊食飯～而且餐廳性價比高，週末遠離都市入去chill吓係個唔錯嘅選擇 。

講到西餐，生蠔係唔少人嘅必食之選。餐廳選用No.1 size嘅生蠔，比起坊間常用嘅No.2大隻啲。除咗供應香港較常見嘅Gilladeau及Ostra Regal外，仲有呢款蠔味重、肉質有彈性又甜嘅Ancelin同埋爽口、重after taste嘅水晶蠔食～

晚餐供應多款set dinner，就好似呢個有齊餐湯、前菜、主菜同甜品嘅set都只係$268。包括匈牙利牛肉湯、前菜秘製三文魚蘋果沙律、主菜低溫油浸法國鴨腿配紅酒黑車厘子汁及是日甜品。主菜仲有得4選1，選擇夠晒多元化。

秘製三文魚蘋果沙律味道清新，做開胃菜就最啱。

低溫油浸法國鴨腿配紅酒黑車厘子汁，鴨腿外脆內軟，肉味濃厚。

如果大胃王驚唔夠飽，都可以試試呢個有六道菜嘅set($468)。包括簿切美國頂級生牛肉配柚子醋汁、阿根廷紅蝦刺身配青檸辣汁、芝士蟹肉焗荷蘭大磨菇、意大利白松露菌湯、烤西班牙橡木果黑毛豬鞍架配黑松露蘋果燒汁同甜品。

阿根廷紅蝦刺身配埋青檸辣汁食酸酸辣辣，又係一個開胃之選。

芝士蟹肉焗荷蘭大磨菇，大磨菇好Juicy，菇味香濃。

小小嘅一碗湯加入大量松露，鍾意松露嘅朋友不可錯過。

黑毛豬鞍架煎至七成熟，帶微微粉紅色，肉質爽口軟腍。

甜品會每日有轉換，朱古力心太軟同焗蘋果撻，兩者都唔會過甜。

食西餐當然要飲返兩杯啦！呢度嘅酒都好抵飲，好似呢杯嚟自澳洲Margaret River 產區嘅Stella Bella紅酒同埋嚟自智利Colchagua Valley嘅白酒都只係$62～

L’atlantis

地址: 屯門青山公路18咪半黃金泳灘

文: Yanica

相、片: Tom Li