致各位成日都諗住整甜品，但又唔想整完一大輪仲要自己洗返晒啲煲煲罉罉，於是從來都冇整過嘅大大，荔枝角最近開咗間由台灣嚟嘅DIY烘焙店，一站式提供晒所有原材料同工具，仲有埋份食譜畀你照住整，方便到一個點，零失敗呀（理論上）。

 「簡單玩」：Tiramisu、冬甩

 「樂趣玩」：生乳酪蛋糕、戚風蛋糕

 「認真玩」：伯爵生乳酪批

呢間烘焙店喺台灣有三間分店，唔少香港人去旅行嗰陣都可能曾經去玩過。佢哋menu上有成40幾款甜品，每三幾個月就會轉一次。有啲好易整，有啲就有多少少挑戰性咁，例如「簡單玩」嘅心太軟、冬甩、或者焦糖奶茶布甸咁，都係將啲食材撈埋一齊，大約個零鐘就整得完；「樂趣玩」嘅cupcake、生乳酪蛋糕、或者戚風蛋糕等等就可能要混合多幾種材料，打發嘅技巧亦需要多少少；至於挑戰級嘅「認真玩」，就有黑森林蛋糕、香蕉批、檸檬撻，甚至立體芭比選擇，製作時間可能需要兩粒幾鐘。

就以熊熊香蕉戚風蛋糕為例，首先人手將香蕉呀蛋呀麵粉呀奶呀之類撈埋同打發之後，再用機器打發製作蛋白糊，加入可可粉等材料，就可以慢慢將兩層糊倒入模再拎去焗，最後運用少少創意同少少美術功力做埋個裝飾，就大！功！告！成！睇住呢個自己一手一腳整嘅蛋糕，係幾有成功感嘅。重點係咩？係整完之後，用過嘅工具唔使自己洗呀！有專人會幫你洗返乾淨㗎喇！啱晒你哋啲懶豬仔啦。

老闆阿Ken話未必個個香港人屋企都有個焗爐或者咁多整甜品嘅工具，所以就過嚟開多間分店，希望將整甜品嘅樂趣同大家分享。呢度同傳統烘焙教室最唔同嘅地方，就係全程自助式，基本上可以話係畀你嘗試整甜品嘅樂趣，多過認真學整嘅技巧。揀啱自己想整嘅款式之後，店員就會畀個iPad老師你，入面有晒短片教學同埋圖文並茂嘅食譜，照單執藥咁執齊晒所需嘅工具，就可以開始製作呢個屬於你嘅甜品。當然啦，整到有唔明嘅時候可以隨時請店員幫手嘅，最後按自己喜好加埋裝飾，就可以拎你嘅大作，返去扮叻豬呃like啦。

Home焙小日子
地址：荔枝角長順街15號 D2 Place TWO 305號

文、相：Kar