雖然好多人都識得整返幾道中菜，炆蒸煮燉煎炒……都唔會難到各位家中大廚。不過出街食中菜又係另一番風味，因為有啲功夫太多工序太繁嘅菜式，總係冇辦法喺屋企煮到呀。例如明爐吊燒琵琶鵝、響油鱔糊咁，就要靠啲經驗老到嘅師傅幫手喇。
彤福軒（尖沙咀） 
尖沙咀酒店內嘅一間精緻粵菜館，主打中國南部順德地區美食。中菜方面由擁有20經驗嘅行政總廚李志偉師傅主理，擅於以細緻精湛嘅烹調手法炮製粵菜。餐廳坐擁維港海景，設有豪華私人包廂及主宴會廳，可以一邊欣賞維港美景品嚐美食，係孝敬父母嘅不二之選！
明爐吊燒琵琶鵝
明爐吊燒琵琶鵝係必試之選！先用秘製調味料將鵝肉醃制12小時，令鵝肉至骨頭都入晒味，再風乾過夜，最後放入爐中烤令外皮酥脆。成個製作過程超過24小時，可謂心機之作。外皮甘香酥脆，肉質嫩滑，就算加入醬汁都無蓋過鵝肉香氣。
鳳城五彩炒魚麵
餐廳另一道招牌菜炒魚麵，魚麵坊間選擇好多但要做得好食唔容易。魚麵配上魚乾、豆芽和菇絲乾炒，令到整體味道同口感再豐富啲，魚麵爽口彈牙帶有淡淡魚香，而且調味唔會太重，因為想食客食返魚肉本身鮮味。
黑魚籽鮮蟹肉大良鮮奶炒獅頭魚球
以幼滑嘅大良鮮奶配上鮮味蟹肉，味道清新鮮甜，最後加上滿滿黑魚籽令鮮味更突出。獅頭魚球好厚肉，魚味都好濃，適合鍾意食海鮮嘅朋友！
順德拆魚餃
唔好以為係普通點心，呢道係店內另一名菜順德拆魚羹嘅變奏版，精緻花紋以全人手勾畫而成，製作成逼真嘅錦鯉造型，啱晒打卡。魚餃外皮厚薄恰到好處，煙煙韌韌，一入口感受到鮮嫩嘅魚肉及湯汁。
沙田脆皮妙齡鴿
另一道經典菜式，選用12日大嘅妙齡乳鴿，用白滷水醃制過後加上麥芽糖及紅醋上色，風乾後生炸，外皮香脆仲有豐富肉汁。
主打上海菜式嘅餐廳，店名「謝謝儂」喺上海話有「謝謝你」嘅意思，餐廳裝修同餐牌風格都以綠色為主調，師傅有超過33年做上海菜嘅經驗，對食材選取有嚴謹嘅要求，多款菜式嘅醬汁都係自家調製。
三小併
由三款涼菜組成嘅三小併，醬汁都係師傅自家調製，尤其係鎮江排骨嘅醬汁，更加用上十樣食材調製。水晶肴肉啫喱部分口感幼滑，冰凍煙韌；四喜烤麩清新健康；而鎮江小排骨則酸酸甜甜，口感軟腍。作為前菜，相當開胃。
爆汁煎小包
香煎版小籠包，24摺嘅小包厚薄適中，內餡包住新鮮豬肉，同埋打入豬骨湯湯凍，包底煎至微微脆身。咬開有爆汁效果，味道鮮甜。
水煮牛肉、酸菜煮桂花魚
嗜辣嘅朋友仔就最啱食喇。先講水煮牛肉，四川麻辣水煮醬底以廿幾款香料配料調製而成，大部分都係嚟自四川嘅，麻、辣、香集一身，無論牛仔肉定係紅薯粉等都索晒醬汁嘅精華，嫩滑入味。至於酸菜煮桂花魚，坊間一般都係用鱸魚製作，但呢度就特地挑選斤半至兩斤重嘅特大桂花魚，人手起肉，師傅解釋桂花魚嘅肉質會鮮味啲，而且少骨啲。加入魚骨熬製至少兩個鐘嘅魚湯底，再配上酸菜，酸香較重，辣度相對輕微。
蒜片辣味安格斯牛柳粒
師傅嚴選美國安格斯牛肉，配上自家秘製嘅辣汁，同埋烤焗過嘅蒜片，即叫即炒，特別香口。牛柳粒肉質軟腍，滿滿肉香，微微辣，送飯一流。
響油鱔糊跟夾餅
坊間唔太多地方可以食得到鱔糊，因為功夫實在有啲繁複。餐廳採用正宗地道上海做法，將黃鱔起肉再切段烹調，上碟後再喺中間加入蒜蓉爆響油，建議可以配埋夾餅一齊食，增加口感層次。
心動不如行動！有興趣就快啲約埋三五知己去嘆下美食！快啲bookmark定啦！
*以上圖片只供參考，所有食品以實物為準. 食品供應因餐廳而異