有冇朋友仔成日喺Facebook或者行街之類，見到啲餐廳好似好好食咁，心裡暗暗同自己講：搵日去食，但約飯局嗰陣，又醒唔返起嗰間餐廳？有嘅話畀個5我！我畀返個tips你：Bookmark！既方便又快捷。即係點？我唔直接答你，我用例子答你，順便介紹埋呢3間西環小店過你。

啤酒湯底車仔麵   Noodies

圖：Browncony、kinchow625

呢度嘅車仔麵，無論係麵款、湯底定配料，都比平時多選擇，仲要係特別嘅選擇呀，例如手撕雞、溏心蛋等等都有得揀，選擇困難症嘅朋友就頭痕了科科。

要特別介紹下有個「啤酒湯底」，酒鬼必試。湯係白色嘅，用白啤酒煮出嚟，不過唔使怕食完會醉，因為酒香味保留咗，但酒精就已經喺煮嘅過程度揮發咗。呢個湯底甘甘甜甜，幾清香，配埋酸甜甜嘅梅子麵都應該幾夾。如果唔想飲酒嘅，就叫喇沙湯底啦，呢度招牌，色香味俱全。

想收入私人嘅to-eat-list度嘅話，好簡單，登入OpenRice之後，撳入餐廳，再撳右邊嗰粒「收藏」圖案，即係有粒星星嗰粒啦。

士多啤梨西瓜蛋糕  Lifetastic

圖：Clan、Beanie

呢間嘅輕食做得唔錯，賣相仲好吸引。例如牛角包咁，就有牛油果或者黑松露醬炒蛋嘅款式。兩者啲餡料都係多到突晒出嚟，視覺效果先贏一仗。牛角包亦係脆脆der。

而嚟到，冇可能唔食士多啤梨西瓜蛋糕。又係外貌協會行先嘅朋友，紅襯粉紅，仲鋪滿晒花瓣碎，女生一定鍾意。蛋糕分咗幾層，分別係西瓜、啫喱、忌廉同撻底等，最頂有粒粒士多啤梨果肉，中間嘅忌廉亦會食到清甜嘅西瓜汁，成件事好係夏天嘅感覺呀。

講多樣嘢你知，私藏之餘，仲可以分類咁收藏，例如：想去、約會、朋友聚會等等。

蟹膏帶子海膽拌飯  L'attitude

圖：hkeateriespot、Selinatsoi

可能好多人都會認得呢間，佢喺尖沙咀間舖食雲朵甜品嘅。而西環呢間，仲有鹹點食呀。意粉方面，明太子炸軟殼蟹忌廉汁意粉或者卡邦尼溫泉蛋扁意粉（夢幻版）都好受歡迎。咩係夢幻版？啲扁意粉變咗粉紅色呀，好靚呀。典解嘅？原來係加咗新鮮紅菜頭汁。仲有隻「啷下啷下」嘅水波蛋同三文魚子，creamy得嚟又有啲爆汁感覺。

至於蟹膏帶子海膽拌飯，賣相雖然唔係太靚，但見到成大個蟹蓋同啲蟹膏遮住晒啲飯，就一秒變心心眼喇。蟹膏撈飯固然之香口，仲要有海膽同厚切帶子，有罪惡感都係咁話，食咗先算。

Last but not least，收藏分類嗰度，除咗預設嘅分類之外，仲可以自己開啲新嘅分類呀。

之後隨時一撳「收藏」就可以搵得返晒呢啲心水餐廳喇。

仲等？更新或者下載OpenRice App之後即刻bookmark晒佢啦。

文：Kar