終於唔洗再打「#日本先有」 呢個Tag，因為今次Häagen-Dazs推出兩款麻糬雪糕杯，喺香港就搵到！而且新口味都好有日本Feel，分別係九州抹茶同北海道紅豆。即睇開飯仔試食報告！
 

兩款Häagen-Dazs麻糬雪糕即日起有售，Häagen-Dazs九州抹茶麻糬雪糕用咗九州抹茶配以法國牛奶同忌廉，帶抹茶甘香，口感綿密。另一主角麻糬就主要喺杯中間同杯底出現，增加口感。
 

而Häagen-Dazs北海道紅豆麻糬雪糕同樣用咗法國牛奶同忌廉，不過拍檔就改為北海道優質紅豆蓉，甜味比抹茶高。裡面一樣有一粒粒麻糬。
 

唔講真係未必知，原來喺日本麻糬係象徵好運同圓滿，可以話係過節必備。咁呢個聖誕，大家就有藉口、呃應該話係理由瘋狂食麻糬雪糕啦。各大便利店、超級市場同日資超市都買到，有迷你杯同家庭裝呀留意返。

文：Cathy
相、片：Kar