荃灣鱟地坊條食街一向都好熱鬧，呢幾個月就多咗間漢堡店進駐，雖然地方細細無坐位，但食物味道就好有誠意，無論係食材挑選定調味都好仔細，全部都係即叫即製，而且價錢仲好親民添！

大牛堡配焦糖洋蔥(大牛堡$40/小牛堡$30，跟餐+$10)

漢堡肉選用安格斯牛，廚師將安格斯牛攪碎後加入牛脂肪、炒咗嘅洋蔥同蒜再搓成漢堡扒形狀，然後邊煎邊焗。因為混合咗牛脂肪，所以漢堡肉食落牛味重，而且仲保持到肉汁。夾層嘅焦糖洋蔥用牛油炒到最冧，洋蔥香甜嘅味道同漢堡肉好夾！如果驚食唔哂可以揀Size細嘅小牛堡，配料方面亦都可以揀煙肉或者蛋沙律。

親子漢堡($35，跟餐+$10)

呢個漢堡即係雞肉漢堡，不過就特別啲將雞肉撕成一條條，手撕雞混合咗BBQ醬同蜜糖，味道相對就無咁重。包入面嘅沙律都溝咗檸檬汁，食落就比較fresh～而且夾層仲加咗一隻流心效果嘅太陽蛋！

炸蛋($18)

呢款係英國菜蘇格蘭炸蛋，蛋用咗湖北蛋，店主話呢隻蛋蛋香味會濃啲同埋蛋黃顏色會較深，外面包咗一層安格斯牛再拎去炸約五分鐘，確保蛋黃內部會暖但又Keep到流心效果，加埋辣茄汁一齊食就更惹味～

秘製雞翼($10)

10蚊3隻雞翼而家真係好難搵到，雖然就好平但製作一啲都唔馬虎，雞翼用咗蒜頭、辣椒、丁香同檸檬汁去醃，外脆多肉汁，食幾多隻都無問題。

Mr. M

地址: 荃灣鱟地坊80-84華成樓地下B4號舖

相、片：Tom Li